ກອງປະຊຸມສື່ມວນຊົນທົ່ວປະເທດ ເພື່ອປຶກສາຫາລືການສົ່ງເສີມວຽກງານໂພຊະນາການຂອງແມ່-ເດັກ ແລະ ການລ້ຽງດູເດັກອ່ອນ ແລະ ເດັກນ້ອຍ ໄດ້ຈັດຂຶ້ນໃນລະຫວ່າງວັນທີ 5-6 ກັນຍານີ້, ທີ່ເມືອງວັງວຽງ ແຂວງວຽງຈັນ. ໂດຍການເປັນປະທານຮ່ວມຂອງທ່ານ ສົມສະຫວາດ ພົງສາ ຫົວໜ້າກົມສື່ມວນຊົນ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ( ຖວທ ) ແລະ ທ່ານ ອິນປົງ ທົງພະຈັນ ຮອງຫົວໜ້າສູນສະຖິຕິ ແລະ ຂ່າວສານສາທາລະນະສຸກກະຊວງສາທາລະນະສຸກ , ທ່ານ ໄຊມ້ອນ ເນເຊີ້ ຫົວໜ້າພະແນກສື່ສານອົງການຢູນີເຊັບປະຈຳ ສປປ ລາວ ແລະ ທ່ານ ສຳພັນ ມະນີຈັນ ຮອງຫົວ ໜ້າພະແນກ ຖວທ ແຂວງວຽງຈັນ, ມີຊ່ຽວຊານດ້ານສາທາລະນະສຸກ ແລະ ສື່ມວນຊົນຈາກ 18 ແຂວງໃນຂອບເຂດທົ່ວປະເທດເຂົ້າຮ່ວມ.
ໃນກອງປະຊຸມທ່ານ ສົມສະຫວາດ ພົງສາ ໄດ້ຍົກໃຫ້ເຫັນບົດບາດຂອງສື່ມວນຊົນໃນການເຜີຍແຜ່ຂໍ້ມູນກ່ຽວກັບບັນຫາການຂາດສານອາຫານ ແລະ ຄວາມສໍາຄັນຂອງໂພຊະນາການທີ່ດີ, ການບໍລິການດ້ານໂພຊະນາການທີ່ມີຄຸນນະພາບ ແລະ ການສົ່ງເສີມພຶດຕິກໍາດ້ານການກິນທີ່ດີ ຕໍ່ການແກ້ໄຂບັນຫາດັ່ງກ່າວໃນສປປ ລາວ. ຊຶ່ງ “ການກະຈາຍຂໍ້ມູນຂ່າວສານແບບຕໍ່ເນື່ອງຈະຊ່ວຍໃຫ້ຊຸມຊົນມີຄວາມຮັບຮູ້ເຂົ້າໃຈຢ່າງເລິກເຊິ່ງ, ມີການປ່ຽນແປງທັດສະ ນະຄະຕິ ແລະ ພຶດຕິກໍາຂອງຕົນໃນການກິນຢູ່ ແລະ ການຮັກສາສຸຂະພາບ. ຮຽກຮ້ອງໃຫ້ສື່ມວນຊົນເອົາໃຈໃສ່ປະກອບສ່ວນໃນການໃຫ້ຄວາມຮູ້ແກ່ຊຸມຊົນຢ່າງປົກກະຕິ ແລະ ຕໍ່ເນື່ອງ.” ຊຶ່ງບັນຫາທ້າທາຍດ້ານເສດຖະກິດໄດ້ສົ່ງຜົນກະທົບຕໍ່ການໃຊ້ຈ່າຍໃນຄົວເຮືອນ, ໂດຍສະເພາະການໃຊ້ຈ່າຍດ້ານອາຫານການກິນ.
ທ່ານ ໄຊມ້ອນ ນາເຊີ້ ກ່າວວ່າ: “ສື່ມວນຊົນສາມາດໃຫ້ທັງຄວາມຮູ້ແກ່ຊຸມຊົນ, ເສີມສ້າງຄວາມເຂົ້າໃຈ ແລະ ຊຸກຍູ້ການປະຕິບັດຕົວຈິງໃນຊຸມຊົນໃນຂະນະທີ່ພວກເຮົາວາງແຜນວຽກງານໂພຊະນາການ ສື່ມວນຊົນຈົ່ງສືບຕໍ່ເປັນພັນທະມິດທີ່ສຳຄັນໃນການເຜີຍແຜ່ຍຸດທະສາດທີ່ອີງໃສ່ຫຼັກຖານ ເພື່ອຊ່ວຍໃຫ້ພວກເຮົາສາມາດເພີ່ມທະວີຄວາມພະຍາຍາມໃນການສ້າງການປ່ຽນແປງທີ່ມີຄວາມໝາຍໃນຊີວິດ ແລະ ໂພຊະນາການຂອງເດັກນ້ອຍໃນທົ່ວ ສປປ ລາວ.” ອີງຕາມການປະເມີນຜ່ານມາຂອງອົງການອຸຍນີເຊັບ ແລະ ກະຊວງສາທາລະນະສຸກ ອັດຕາການລ້ຽງດູເດັກອ່ອນໄດ້ຫຼຸດລົງຢ່າງຫຼວງຫຼາຍພາຍໃນໜຶ່ງປີ, ອັດຕາການບໍລິໂພກອາຫານຂັ້ນຕໍ່າສຸດທີ່ຍອມຮັບໄດ້ສໍາລັບເດັກນ້ອຍອາຍຸຕໍ່າກວ່າ 2 ປີໄດ້ຫຼຸດລົງຈາກ 21% ໃນປີ 2022 ເປັນ 15% ໃນປີ 2023 ຊຶ່ງໄດ້ສອດຄ່ອງກັບການເພີ່ມຂຶ້ນຂອງອັດຕາການຂາດສານອາຫານແບບເຕັ້ຍໃນກຸ່ມເດັກນ້ອຍອາຍຸຕ່ຳກວ່າ 5 ປີຈາກ 33% ເປັນ 37%. ດັ່ງນັ້ນ, ຈຸດປະສົງຂອງກອງປະຊຸມຄັ້ງນີ້ ແມ່ນການສະໜອງຂໍ້ມູນລ້າສຸດໃຫ້ກັບບັນດາສື່ມວນຊົນ ເພື່ອກະຕຸ້ນການປ່ຽນແປງພຶດຕິກຳທີ່ກ່ຽວຂ້ອງກັບໂພຊະນາການໃນທົ່ວປະເທດ. ຜູ້ເຂົ້າຮ່ວມກອງປະຊຸມຍັງໄດ້ຮັບຂໍ້ມູນກ່ຽວກັບບົດລາຍງານຄວາມຄືບໜ້າປະຈຳປີໃນການຈັດຕັ້ງປະຕິບັດແຜນປະຕິບັດງານແຫ່ງຊາດດ້ານໂພຊະນາການ ແລະ ຍຸດທະສາດສຳລັບປີ 2023 ໂດຍສູນໂພຊະນາການກະຊວງສາທາລະນະສຸກ ທັງນີ້ເພື່ອປຶກສາຫາລືຊອກຫາວິທີການແກ້ໄຂບັນຫາການຂາດສານອາຫານໃນກຸ່ມເດັກນ້ອຍອາຍຸຕ່ຳກວ່າ 5 ປີໃນ ສປປ ລາວ. ກອງປະຊຸມດັ່ງກ່າວຊຶ່ງເປັນຂໍ້ລິເລີ່ມຮ່ວມລະຫວ່າງລັດຖະບານແຫ່ງສປປ ລາວ, ສະຫະພາບເອີຣົບ ແລະ ອົງການຢູນິເຊັບ(UNICEF)
