ພິທີເປີດສົກຮຽນໃໝ່ທົ່ວນະຄອນຫຼວງວຽງຈັນ ສົກຮຽນ 2023-2024 ໄດ້ຈັດຂຶ້ນໃນວັນທີ 1 ກັນຍາ ນີ້ ທີ່ໂຮງຮຽນ ມ.ສ ວຽງຈັນ ເປັນກຽດເຂົ້າຮ່ວມຂອງທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫຼວງວຽງຈັນ, ມີທ່ານນາງ ສີສຸກ ວົງວິຈິດ ຮອງລັດຖະມົນຕີກະຊວງສຶກສາທິການ ແລະ ກິລາ, ທ່ານ ສົມພອນ ສອນດາລາ ຫົວໜ້າພະແນກສຶກສາທິການ ແລະ ກິລານະຄອນຫຼວງວຽງຈັນ ພ້ອມດ້ວຍແຂກຖືກເຊີນ, ຜູ້ບໍລິຫານການສຶກສາ, ຄູ-ອາຈານ, ນັກຮຽນເຂົ້າຮ່ວມ. ທ່ານ ສົມພອນ ສອນດາລາ ໄດ້ລາຍງານຫຍໍ້ຜົນການຈັດຕັ້ງປະຕິບັດແຜນພັດທະນາການສຶກສາ ແລະ ກິລາ ປະຈຳສົກຮຽນ 2022-2023 ແລະ ແຜນພັດທະນາການສຶກສາ ແລະ ກິລາປະຈຳສົກຮຽນ 2023-2024 ວ່າ: ປັດ ຈຸບັນທົ່ວນະຄອນຫຼວງວຽງຈັນມີໂຮງຮຽນລ້ຽງເດັກ-ອະນຸບານທັງໝົດ 401 ແຫ່ງ, ໂຮງຮຽນລັດ 121 ແຫ່ງ, ໂຮງ ຮຽນເອກະຊົນ 280 ແຫ່ງ, ມີນັກຮຽນທັງໝົດ 38.212 ຄົນ ຍິງ 18.768 ຄົນ, ໂຮງຮຽນລັດ 11.371 ຄົນ ຍິງ 5.546 ຄົນ, ໂຮງຮຽນເອກະຊົນ 26.841 ຄົນ ຍິງ 13.219 ຄົນ, ຄູສອນທັງໝົດ 2.777 ຄົນ ຍິງ 2.745 ຄົນ, ໂຮງຮຽນລັດ 630 ຄົນ ຍິງ 625 ຄົນ, ໂຮງຮຽນເອກະຊົນ 2.147 ຄົນ ຍິງ 2.120 ຄົນ; ຊັ້ນປະຖົມສຶກສາມີທັງ ໝົດ 545 ແຫ່ງ, ໃນນີ້ມີໂຮງຮຽນເອກະຊົນ 189 ແຫ່ງ, ໂຮງຮຽນລັດ 356 ແຫ່ງ, ມີນັກຮຽນທັງໝົດ 79.387 ຄົນຍິງ 38.022 ຄົນ, ໂຮງຮຽນລັດ 44.640 ຄົນ, ໂຮງຮຽນເອກະຊົນ 34.747 ຄົນ, ມີຄູສອນທັງໝົດ 3.489 ຄົນ ຍິງ 2.682 ຄົນ; ຊັ້ນມັດທະຍົມສຶກສາມີທັງໝົດ 192 ແຫ່ງ, ມີນັກຮຽນ 86.628 ຄົນ ຍິງ 43.149 ຄົນ, ໂຮງ ຮຽນເອກະຊົນ 86 ແຫ່ງ, ຈໍານວນນັກຮຽນ 19.900 ຄົນ ຍິງ 9.355 ຄົນ, ໂຮງຮຽນລັດມີ 106 ແຫ່ງ, ມີນັກຮຽນ 66.728 ຄົນ ຍິງ 33.794 ຄົນ, ມີຄູສອນທັງໝົດ 4.097 ຄົນ ຍິງ 2.320 ຄົນ.
ສຳລັບແຜນວຽກຈຸດສຸມໃນສົກຮຽນ 2023-2024 ແມ່ນຈະລົງທຶນໃສ່ການສຶກສາກ່ອນໄວຮຽນເປັນບຸລິມະສິດສໍາຄັນ ເພື່ອປັບປຸງຄຸນນະພາບການສຶກສາກ່ອນໄວຮຽນ ສົ່ງເສີມການຈະເລີນເຕີບໂຕຂອງເດັກໃຫ້ມີການພັດທະນາຢ່າງ ຮອບດ້ານສຸມໃສ່ການປັບປຸງການອ່ານອອກ-ຂຽນໄດ້ ແລະ ທັກສະການຄິດໄລ່ເລກພື້ນຖານຍົກສູງຄຸນນະພາບການຈັດການຮຽນ-ການສອນຫຼັກສູດໃໝ່ຊັ້ນປະຖົມສຶກສາແຕ່ ປ.1 ຮອດ ປ.5 ຍົກລະດັບຄູສອນ ແລະ ຜູ້ອຳນວຍການໂຮງຮຽນຢ່າງເປັນລະບົບ ສືບຕໍ່ສ້າງນັກຮຽນເກັ່ງຂັ້ນນະຄອນຫຼວງວຽງຈັນ, ຂັ້ນລະດັບຊາດ ແລະ ລະດັບສາກົນໃຫ້ກາຍເປັນຊັບພະຍາກອນມະນຸດທີ່ມີຄວາມຮູ້-ຄວາມສາມາດເພື່ອຈະໄດ້ບຸກຄະລາກອນທີ່ດີໃນອະນາຄົດ.
ໂອກາດນີ້, ທ່ານ ພູວົງ ວົງຄຳຊາວ ໄດ້ເນັ້ນໃຫ້ຜູ້ບໍລິຫານການສຶກສາແຕ່ລະຂັ້ນເອົາໃຈໃສ່ວຽກງານການເມືອງແນວຄິດໃຫ້ຄູ-ອາຈານ ຄຽງຄູ່ກັບການສ້າງຄວາມເຂັ້ມແຂງທາງດ້ານວິຊາສະເພາະ, ເອົາໃຈໃສ່ສຶກສາອົບຮົມລູກ-ຫຼານນັກຮຽນໃຫ້ຫ່າງໄກຈາກສິ່ງເສບຕິດ ແລະ ປະກົດການຫຍໍ້ທໍ້ຕ່າງໆ ຍາດແຍ່ງການຊ່ວຍເຫຼືອຈາກອົງການຈັດ ຕັ້ງສາກົນ, ຄູ່ຮ່ວມພັດທະນາ ແລະ ພາກສ່ວນທາງສັງຄົມ ເພື່ອມາພັດທະນາວຽກງານການສຶກສາ, ສູ້ຊົນເຮັດໃຫ້ວຽກງານການສຶກສາເລັ່ງໃສ່ການສັບຊ້ອນ ແລະ ຈັດສັນຄູໃຫ້ສອດຄ່ອງໃນສົກຮຽນ 2023-2024 ໃຫ້ເປັນສົກຮຽນທີ່ມີຜົນສໍາເລັດຫຼາຍຂຶ້ນກວ່າເກົ່າ. ຮຽກຮ້ອງມາຍັງຜູ້ປົກຄອງ-ນັກຮຽນເພີ່ມທະວີຄວາມເອົາໃຈໃສ່ດູແລລູກຫຼານຂອງຕົນໃຫ້ໄດ້ມາໂຮງຮຽນ, ກະກຽມອຸປະກອນການຮຽນໃຫ້ມີຄວາມພ້ອມກ່ອນເຂົ້າຮຽນ, ສືບຕໍ່ຊຸກຍູ້ສົ່ງເສີມລູກຫຼານໃຫ້ກາຍເປັນນັກຮຽນດີ, ນັກຮຽນເກັ່ງ ມີຄຸນສົມບັດ-ສິນທຳປະຕິວັດ ພ້ອມກັນກະກຽມເປັນເຈົ້າພາບທີ່ດີໃນປີ 2024.
ຂ່າວ-ພາບ: ພູວັນ
