ໃນໄລຍະເປີດສົກຮຽນໃໝ່ 2023-2024 ເຈົ້າໜ້າທີ່ພະແນກຕຳຫລວດຈະລາຈອນ ນະຄອນຫລວງວຽງຈັນ (ນວ) ໄດ້ຈັດວາງກຳລັງຕາມຈຸດສຳຄັນຕ່າງໆ ທັງໝົດ 153 ຈຸດ ແລະ ນຳໃຊ້ກຳລັງ 423 ສະຫາຍ ເພື່ອລົງແກ້ໄຂບັນຫາຄວາມຫຍຸ້ງຍາກແກ່ຜູ້ຊົມໃຊ້ລົດໃຊ້ຖະໜົນ.
ທ່ານ ພັທ ສັງຄົມ ພົມມະລາດ ຫົວໜ້າພະແນກຕຳຫລວດຈະລາຈອນ ປກສ ນະຄອນຫລວງວຽງຈັນ ໄດ້ໃຫ້ຮູ້ໃນວັນທີ 29 ສິງຫາ 2023 ຜ່ານມາວ່າ: ໃນໄລຍະເປີດສົກຮຽນໃໝ່ 2023-2024 ນີ້, ເຈົ້າໜ້າທີ່ພະແນກຕຳຫລວດຈະລາຈອນ ໄດ້ຈັດວາງກຳລັງຕາມຈຸດສຳຄັນຕ່າງໆ ເປັນຕົ້ນ 3 ແຍກ, 4 ແຍກ, ທາງຮ່ອມ, ໜ້າໂຮງຮຽນ, ສະຖາບັນສຶກສາ ແລະ ຈຸດທີ່ເຫັນວ່າ ການສັນຈອນສັບສົນ ຊຶ່ງທົ່ວນະຄອນຫລວງວຽງຈັນ ມີທັງໝົດ 153 ຈຸດ. ໃນນີ້, ໂຮງຮຽນ 39 ຈຸດ, ຕາມສາຍທາງ, ແຍກ, ວົງ ວຽນ ແລະ ບ່ອນອື່ນໆ 114 ຈຸດ ແລະ ໄດ້ນຳໃຊ້ກຳລັງ 423 ສະຫາຍ ເຂົ້າໃນການປະຕິບັດໜ້າທີ່, ສະເພາະເມືອງຢູ່ສັງທອງ ແມ່ນບໍ່ມີຈຸດລະບາຍ. ນອກຈາກນັ້ນ, ຍັງປະຈຳຢູ່ຕາມບັນດາປ້ອມຍາມຖາວອນ ແລະ ປ້ອມ 24 ຊົ່ວໂມງ ເພື່ອເຮັດໃຫ້ນ້ອງນັກຮຽນ-ນັກສຶກສາ, ຄູອາຈານ, ພໍ່ແມ່ປະຊາຊົນ, ຜູ້ໃຊ້ລົດໃຊ້ຖະໜົນ ທີ່ສັນຈອນໄປມາໃນໄລຍະທີ່ເປີດສົກຮຽນໃໝ່ ມີຄວາມເປັນລະບຽບ ແລະ ປອດໄພ.
ໃນທຸກໆປີທີ່ເປີດສົກຮຽນໃໝ່, ສະພາບການສັນຈອນຕາມຖະໜົນເພີ່ມຂຶ້ນ ໂດຍສະເພາະໃນໂມງໄປການ-ເລີກການ ຊຶ່ງບັນຫາດັ່ງກ່າວ, ໄດ້ສ້າງຄວາມຫຍຸ້ງຍາກໃຫ້ຜູ້ໃຊ້ລົດໃຊ້ຖະໜົນ ທັງມີຄວາມສ່ຽງພາໃຫ້ເກີດອຸບັດເຫດ. ດັ່ງນັ້ນ, ຈຶ່ງຮຽກຮ້ອງມາຍັງຜູ້ຂັບຂີ່ ຈົ່ງພ້ອມກັນປະຕິບັດກົດລະ ບຽບການສັນຈອນທີ່ວາງອອກຢ່າງເຂັ້ມງວດ ໂດຍສະເພາະການຈອດລົດຂອງຜູ້ປົກຄອງທີ່ມາສົ່ງລູກຫລານເຖິງໂຮງຮຽນ ໂດຍໃຫ້ຈອດບ່ອນທີ່ກຳນົດໄວ້, ບໍ່ໃຫ້ຈອດຊ້ອນກັນ ແລະ ຈອດເປັນເວລາດົນ ກີດຂວາງການສັນຈອນ ເພາະຈະສົ່ງຜົນໃຫ້ລົດຄັນອື່ນໆຕິດຂັດອັ່ງອໍ.
ຂໍ້ມູນ: ກອງໂຄສະນາວຽກຈະລາຈອນ ນວ
ພາບ: ໜພ ສຶກສາ-ກິລາ
