ຕາມຂ່າວຈາກວິທະຍຸສາກົນ ຫວຽດນາມ, ຕັ້ງແຕ່ວັນທີ 27-31 ສິງຫາ, ອົງການ ກວດສອບ ບັນຊີ ແຫ່ງລັດ ຫວຽດນາມ ເປັນເຈົ້າພາບ ຈັດກອງປະຊຸມ ຜູ້ນຳ ສາມອົງການ ກວດສອບ ບັນຊີແຫ່ງລັດ ກຳປູເຈຍ-ສປປ ລາວ-ສສ ຫວຽດນາມ ຄັ້ງທີ 10 ດ້ວຍຫົວຂໍ້ “ຕິດຕາມ ການປະຕິບັດຂໍ້ສະເໜີ ກ່ຽວກັບ ການກວດສອບ”. ຈາກນັ້ນ ຜູ້ຕາງໜ້າ ອົງການກວດສອບ ແຫ່ງລັດຂອງ 3 ປະເທດ ໄດ້ຍົກອອກ ບັນດາຂໍ້ສະເໜີ, ວິທີການແກ້ໄຂ ແນໃສ່ປະກອບ ສ່ວນເພີ່ມທະວີ ປະສິດຕິຜົນ ຂອງວຽກງານຕິດຕາມ ການປະຕິບັດ ຂໍ້ສະເໜີ ກ່ຽວກັບ ການກວດສອບ ແລະ ສ້າງຮູບແບບ ການພັດທະນາທີ່ເຂັ້ມແຂງ ຂອງບັນດາອົງການ ກວດສອບ ແຫ່ງລັດ. ບັນດາຜູ້ແທນ ໄດ້ສຸມໃສ່ ປຶກສາຫາລື ບັນດາບັນຫາພື້ນຖານເຊັ່ນ: ພື້ນຖານ ດ້ານນິຕິກຳ ກໍ່ຄື ທຳນຽມ ຂອງສາກົນ ກ່ຽວພັນຕໍ່ ວຽກງານ ການປະຕິບັດ ຂໍ້ສະເໜີ ກ່ຽວກັບການກວດສອບ; ການ ປະຕິບັດ ຕົວຈິງ ແລະ ບັນດາ ບົດຮຽນ ທີ່ຖອດຖອນມາໄດ້ ຂອງແຕ່ລະປະເທດ ໃນວຽກງານ ຕິດຕາມ ການປະຕິບັດ ຂໍ້ສະເໜີ ກ່ຽວກັບ ການກວດສອບ; ບັນດາ ສິ່ງທ້າທາຍ ທີ່ມີຕໍ່ກັບ ບັນດາ ອົງການ ກວດສອບ ສູງສຸດ ແລະ ວິທີການຍົກສູງ ຄຸນນະພາບ ຂອງວຽກງານ ຕິດຕາມ ການປະຕິບັດ ຂໍ້ສະເໜີ ກ່ຽວກັບ ການກວດສອບ. ແຕ່ລະຝ່າຍ ກໍ່ໄດ້ເປັນເອກະພາບກັນ ກ່ຽວກັບ ຫົວຂໍ້ ໃນກອງປະຊຸມ ຄັ້ງທີ 11 ເຊິ່ງ ຈະຖືກຈັດຂື້ນ ຢູ່ ກຳປູເຈຍ ພາຍໃນປີ 2025.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
