ກອງປະຊຸມຄະນະກໍາມະການປະເມີນຜົນ ຄັ້ງທີ 1 ສໍາລັບການສໍາຫຼວດຄວາມຍືນຍົງຂອງທຸລະກິດ (SDGs) ກັບພາກເອກະຊົນຂອງໂຄງການບຳບັດນໍ້າເປື້ອນແບບແຜ່ຂະຫຍາຍຈຸລິນຊີຍ່ອຍສະຫຼາຍ ໂດຍນໍາໃຊ້ວັດສະດຸມີເດຍ KIDS ໃນ ສປປ ລາວ ຈັດຂຶ້ນວັນທີ 30 ສິງຫາ 2023 ຢູ່ໂຮງແຮມຄຣາວພລາຊາ ໂດຍເປັນປະທານຂອງທ່ານ ສົມປອງ ສິດທິວົງ ຫົວໜ້າກົມນໍ້າປະປາ ກະຊວງໂຍທາທິການ ແລະ ຂົນສົ່ງ (ຍທຂ) ມີທ່ານ ຮສ ໂພສີ ທິບດາວັນ ຮອງອະທິການບໍດີມະຫາວິທະຍາໄລແຫ່ງຊາດ (ມຊ) ທ່ານ ປອ ແຫຼມທອງ ລັດ ດາວັນ ຄະນະບໍດີຄະນະວິທະຍາສາດທຳມະຊາດ ທ່ານ Shunichiro HAYASHI ຜູ້ຕາງໜ້າອົງການ JICA ປະຈໍາລາວ ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ.
ໂຄງການບຳບັດນໍ້າເປື້ອນແບບແຜ່ຂະຫຍາຍຈຸລິນຊີຍ່ອຍສະຫຼາຍ ໂດຍນໍາໃຊ້ວັດສະດຸມີເດຍ KIDS ຢູ່ສູນອາຫານ ມຊ ໄດ້ຮັບການຊ່ວຍເຫຼືອລ້າຈາກລັດຖະບານຍີ່ປຸ່ນ ກໍຄືອົງການ JICA ເປັນໂຄງການຕົວແບບໃນການຈັດຕັ້ງປະຕິບັດການບຳບັດນໍ້າເປື້ອນ ໂດຍນໍາໃຊ້ວັດສະດຸ ອຸປະກອນທີ່ເຮັດຈາກວັດສະດຸຍ່ອຍສະຫຼາຍ (KIDS) ໃນ ສປປ ລາວ ໂດຍບໍລິສັດ Accrete Co., Ltd ເປັນຜູ້ຈັດຕັ້ງປະຕິບັດ ມີບໍລິສັດ Nihon Suido Consultants Co., Ltd ເປັນທີ່ປຶກສາ ແລະ ກົມນໍ້າປະປາ ເປັນຜູ້ຄຸ້ມຄອງໂຄງການ ໄລຍະການປະຕິບັດແຕ່ເດືອນທັນວາ 2019-ມິຖຸນາ 2024 ມູນຄ່າ 100 ລ້ານເຢນ ໂດຍບໍລິສັດໂຊກໄຊຊະນະກໍ່ສ້າງ ແລະ ສ້ອມ ແປງເຄຫາສະຖານ ຈໍາກັດຜູ້ດຽວ ເປັນຜູ້ຮັບເໝົາ ແລະ ບໍລິສັດ Archineer Association Co.,Ltd ເປັນທີ່ປຶກສາໂຄງການ ໄລຍະຜ່ານມາການຈັດຕັ້ງປະຕິບັດໂຄງການມີຄວາມຊັກຊ້າ ຍ້ອນການແຜ່ລະບາດເຊື້ອພະ ຍາດໂຄວິດ-19 ການເຂົ້າມາ ສປປ ລາວ ຂອງຊ່ຽວຊານ ໄດ້ມີການກັກຕົວ ເຮັດໃຫ້ບໍລິສັດທີ່ປຶກສາບໍ່ສາມາດມາຈັດຕັ້ງປະຕິບັດໂຄງການໄດ້ ຈຶ່ງໄດ້ຂະຫຍາຍເວລາການຈັດຕັ້ງປະຕິບັດແຕ່ປີ 2022-2024 ແລະ ນັບແຕ່ວັນທີ 1 ຕຸລາ 2022-29 ກຸມພາ 2023 ບໍລິສັດຮັບເໝົາ ຈຶ່ງໄດ້ເລີ່ມກໍ່ສ້າງລະບົບບໍາບັດນໍ້າເປື້ອນ.
ຈຸດປະສົງຂອງໂຄງການ ແຜນພັດທະນາທຸລະກິດຂອງໂຄງການ ໄດ້ຖືກກະກຽມຜ່ານການທົດລອງດໍາເນີນງານ ແລະ ການເຜີຍແຜ່ກິດຈະກໍາ ໃນ ສປປ ລາວ ໂຄງການຍັງປະກອບສ່ວນເຂົ້າໃນເປົ້າໝາຍພັດທະ ນາແບບຍືນຍົງ (SDG) ທີ 6 “ຮັບປະກັນໃຫ້ມີນໍ້າໃຊ້ ແລະ ການບໍລິຫານນໍ້າແບບຍືນຍົງ ແລະ ສຸຂະອະນາ ໄມສໍາລັບໝົດທຸກຄົນ” ໂດຍສະເພາະ SDG 6.3: “ພາຍໃນປີ 2030 ປັບປຸງຄຸນນະພາບນໍ້າ ໂດຍການຫຼຸດ ຜ່ອນມົນລະພິດ ກໍາຈັດການຖິ້ມຂີ້ເຫຍື້ອຊະຊາຍ ແລະ ຫຼຸດຜ່ອນການປ່ອຍສານເຄມີ ແລະ ວັດຖຸທີ່ເປັນອັນຕະ ລາຍ ຫຼຸດຜ່ອນປະລິມານນໍ້າເປື້ອນທີ່ບໍ່ໄດ້ຮັບການບຳບັດໃຫ້ໄດ້ເຄິ່ງໜຶ່ງ ແລະ ເພີ່ມທະວີການນຳນໍ້າທີ່ໃຊ້ແລ້ວ ກັບມາໃຊ້ຄືນໃໝ່ຢ່າງປອດໄພ ໃຫ້ຫຼາຍຂຶ້ນໃນທົ່ວໂລກ“ ເປົ້າໝາຍຂອງໂຄງການ ຄວາມເໝາະສົມ ແລະ ປະ ສິດທິຜົນຂອງລະບົບບໍາບັດນໍ້າເປື້ອນ ໂດຍນໍາໃຊ້ວັດສະດຸມີເດຍ KIDS ຈະໄດ້ຮັບການພິສູດ ການສ້າງຄວາມເຂັ້ມແຂງໃຫ້ກົມນໍ້າປະປາ ແລະ ອົງການຈັດຕັ້ງກ່ຽວຂ້ອງໃນການໃຊ້ງານ ແລະ ສ້ອມແປງລະບົບບໍາບັດນໍ້າເປື້ອນໂດຍນໍາໃຊ້ວັດສະດຸມີເດຍ KIDS ແຜນພັດທະນາທຸລະກິດຂອງລະບົບບໍາບັດນໍ້າເປື້ອນໂດຍນໍາໃຊ້ວັດສະດຸມີເດຍ KIDS ຖືກກະກຽມຜ່ານມາດຕະຖານເຕັກນິກ ຄະນະກໍາມະການຕັດສິນ ການປະຊຸມ ສໍາມະນາດ້ານວິຊາການ ແລະ ການລົງເບິ່ງຕົວຈິງພາກສະໜາມ ຂອບເຂດຂອງໂຄງການຈະສັງລວມເອົານໍ້າເປື້ອນຈາສູນອາຫານ ແລະ ອາຄານຮຽນຂອງຄະນະວິທະຍາສາດທຳມະຊາດ ໃນນີ້ມີອ່າງບໍາບັດນໍ້າເປື້ອນ 1 ອ່າງ ສາ ມາດບໍາບັດນໍ້າເປື້ອນໄດ້ 30 ແມັດກ້ອນຕໍ່ວັນ ໜ້າວຽກທີ່ໄດ້ຈັດຕັ້ງປະຕິບັດແມ່ນກໍ່ສ້າງລະບົບອ່າງບຳບັດນໍ້າເປື້ອນ ພ້ອມຕິດຕັ້ງລະບົບທໍ່ ອ່າງຕົກຕະກອນ ອ່າງບຳບັດ ໂດຍໄດ້ຕິດຕັ້ງວັດສະດຸຈຸລິນຊີຍ່ອຍສະຫຼາຍມີເດຍ KIDS ແລະ ລະບົບໄຟຟ້າແສງອາທິດ ສໍາລັບຜົນໄດ້ຮັບເພື່ອຈັດຕັ້ງປະຕິບັດ ແລະ ສູ້ຊົນໃຫ້ບັນລຸຕາມຍຸດທະສາດຂອງກົມນໍ້າປະປາ ໂດຍເຮັດໃຫ້ນໍ້າເປື້ອນໃນຕົວເມືອງ ແລະ ຊຸມຊົນ ຖືກບໍາບັດ 50% ໃນທົ່ວປະເທດ ໃນປີ 2030 ເພື່ອບັນລຸ SDGs ໂດຍສະເພາະ SDG 6.3 ເພື່ອປັບປຸງສະພາບແວດລ້ອມໃນຕົວເມືອງ ເຮັດໃຫ້ຕົວເມືອງມີຄວາມສະອາດ ແລະ ຫຼຸດຜ່ອນເຊື້ອພະຍາດທີ່ເກີດຈາກນໍ້າເປື້ອນ.
