ຂ່າວຕ່າງປະເທດລາຍງານ ໃນວັນທີ 29 ສິງຫາ ຜ່ານມາ, ລັດຖະບານອິນໂດເນເຊຍ ກຳລັງກຽມພ້ອມຮີບເລັ່ງຄວບຄຸມມົນລະພິດທາງອາກາດກ່ອນຈະຈັດກອງປະຊຸມສຸດຍອດອາຊຽນຄັ້ງທີ 43 ຊຶ່ງມີກຳນົດຈັດຂຶ້ນທີ່ນະຄອນຫຼວງຈາກາຕາ ໃນຕົ້ນເດືອນກັນຍາ ໜ້ານີ້.
ມົນລະພິດທາງອາກາດຮຸນແຮງໃນນະຄອນຫຼວງຈາກາຕາ ຊຶ່ງເປັນໜຶ່ງໃນພາກພື້ນທີ່ມີມົນລະພິດຫຼາຍທີ່ສຸດໃນໂລກ ນຳໄປສູ່ບັນຫາສຸຂະພາບທີ່ເພີ່ມຂຶ້ນຂອງປະຊາຊົນ. ທ່ານ ອາກຸສ ຄວີ ຊູຊານໂຕ ຜູ້ອຳນວຍການດ້ານການຄວບຄຸມພະຍາດທາງເດີນຫາຍໃຈ ກະຊວງສາທາລະນະສຸກຂອງອິນໂດເນເຊຍ ກ່າວວ່າ: ໃນປີ 2022 ຜ່ານມາ, ຈຳນວນຄົນເຈັບສະເລ່ຍລາຍເດືອນທີ່ເຊື່ອມໂຍງກັບການຕິດເຊື້ອທາງເດີນຫາຍໃຈກະທັນຫັນ ໃນນະຄອນຫຼວງຈາກາຕາ ແລະ ເມືອງໃກ້ຄຽງ ຕໍ່າກວ່າ 100.000 ຄົນ, ໃນລະຫວ່າງເດືອນມັງກອນ ເຖິງ ເດືອນສິງຫາ 2023 ນີ້ ມີຄົນເຈັບຫຼາຍກວ່າ 100.000 ຄົນ. ດັ່ງນັ້ນ, ຈຶ່ງຂໍແຈ້ງເຕືອນປະຊາຊົນທີ່ຕ້ອງອອກໄປເຮັດກິດຈະກຳກາງແຈ້ງເກີນ 8 ຊົ່ວໂມງ ໃຫ້ໃສ່ຜ້າປິດປາກ-ດັງ ປ້ອງກັນມົນລະພິດຢ່າງສະໝ່ຳສະເໝີ. ຂະນະທີ່ຄະນະຜູ້ກວດການຈາກກະຊວງສິ່ງແວດລ້ອມ ແລະ ປ່າໄມ້ ຂອງອິນໂດເນເຊຍ ດຳເນີນການທາງກົດໝາຍກັບປະຊາຊົນ ແລະ ທຸລະກິດທີ່ມີສ່ວນກໍ່ໃຫ້ເກີດມົນລະພິດທາງອາກາດໃນເມືອງ.
ທາງດ້ານສຳນັກງານບໍລິຫານນະຄອນຫຼວງຈາກາຕາ ແລະ ຕໍາຫຼວດ ໄດ້ສົ່ງລົດດັບເພີງໄປສີດນ້ຳຕາມທ້ອງຖະໜົນສາຍຫຼັກທົ່ວນະຄອນຫຼວງ ໂດຍຫວັງວ່າການດຳເນີນການດັ່ງກ່າວຈະຊ່ວຍຊຳລະລ້າງຝຸ່ນ ແລະ ມົນລະພິດຕ່າງໆທີ່ກໍ່ໃຫ້ເກີດມົນລະພິດທາງອາກາດ ພ້ອມທັງຮຽກຮ້ອງໃຫ້ສະຖາບັນຂອງລັດ ແລະ ທຸລະກິດພາກເອກະຊົນໃຊ້ແຜນການເຮັດວຽກຢູ່ບ້ານ ໂດຍສະເພາະໄລຍະກອງປະຊຸມສຸດຍອດຜູ້ນຳອາຊຽນ ຊຶ່ງຈະຈັດຂຶ້ນທີ່ນະຄອນຫຼວງຈາກາຕາ ລະຫວ່າງວັນທີ 5-9 ກັນຍານີ້.
