——–
ໃນໂອກາດລົງເຄື່ອນໄຫວຢ້ຽມຢາມ ແລະ ຊຸກຍູ້ໃຫ້ກຳລັງໃຈ, ຢື້ຢາມຖາມຂ່າວຄວາມທຸກສຸກຂອງພໍ່ແມ່ປະຊາຊົນຜູ້ທີ່ໄດ້ຮັບຜົນກະທົບຈາກໄຟນ້ຳຖ້ວມຢູ່ແຂວງຄຳມ່ວນ, ວັນທີ 29 ສິງຫາ 2023 ທີ່ເຮືອນຮັບແຂກເລກ 01 ຂອງແຂວງ ທ່ານ ບຸນທອງ ຈິດມະນີ ກໍາມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ ໄດ້ໃຫ້ກຽດພົບປະໂອ້ລົມພະນັກງານການນໍາຂອງແຂວງ, ໂດຍມີ ທ່ານ ວັນໄຊ ພອງສະຫວັນ ກຳມະການສູນກາງພັກ, ເລຂາພັກແຂວງ, ເຈົ້າແຂວງຄຳມ່ວນ, ພ້ອມດ້ວຍທ່ານຮອງເລຂາພັກແຂວງ, ບັນດາທ່ານຄະນະປະຈໍາພັກແຂວງເຂົ້າຮ່ວມ.
ທ່ານ ວັນໄຊ ພອງສະຫວັນ ໄດ້ລາຍງານໂດຍສັງເຂບກ່ຽວກັບສະພາບການພັດທະນາເສດຖະກິດ-ສັງຄົມຂອງແຂວງຜ່ານມາ ແລະ ສະພາບໄພພິບັດນ້ຳຖ້ວມຢູ່ແຂວງຄໍາມ່ວນ ໂດຍສະເພາະແມ່ນຜົນເສຍຫາຍດ້ານກະສິກໍາ, ໄຟຟ້າ, ພື້ນຖານໂຄງລ່າງຕ່າງໆ, ສໍາລັບເມືອງທີ່ໄດ້ຮັບຜົນກະທົບໜັກໜ່ວງມີ 3 ເມືອງຄື: ເມືອງຄູນຄຳ, ເມືອງນາກາຍ ແລະ ເມືອງຫີນບູນ, ສ່ວນອີກ 7 ເມືອງ ແມ່ນຖືກຜົນກະທົບ ນ້ຳຖ້ວມເນື້ອທີ່ທຳການຜະລິດ. ບັນຫາທີ່ໜັກໜ່ວງແມ່ນ 2 ເຫດການໃຫຍ່ຄື: ເຫດການຜົນກະທົບຈາກນໍ້າຖ້ວມຂັງ ແລະ ເຫດການ ດິນເຊາະເຈື່ອນ ຕາມເສັ້ນທາງເລກ 8A ເຂດພູໄຮ ລະຫວ່າງ ບ້ານຄູນຄໍາ ເມືອງຄູນຄໍາ ແຂວງຄຳມ່ວນ ຫາ ບ້ານ ໜອງກອກ ເມືອງຄຳເກີດ ແຂວງບໍລິຄໍາໄຊ. ປະຈຸບັນ ສະພາບນໍ້າຖ້ວມເຖິງວ່າລະດັບນໍ້າຈະຫຼຸດລົງ ເຂົ້າສູ່ສະພາບປົກກະຕິແລ້ວ, ແຕ່ກໍ່ຍັງຕິດຕາມເຝົ້າລະວັງ ສະພາບປ່ຽນແປງຂອງດິນຟ້າອາກາດ, ເນື່ອງຈາກບາງພື້ນທີ່ຂອງແຂວງ ກໍ່ຍັງມີຄວາມສ່ຽງເກີດນ້ຳຖວ້ມ. ຜ່ານການລົງເກັບກໍາຂໍ້ມູນຜົນເສຍຫາຍທີ່ເກີດຂຶ້ນ ສາມາດສັງລວມໄດ້ ຄື: ມີບ້ານທີ່ຖືກກະທົບຈຳນວນ 123 ບ້ານ; 6.027 ຄອບຄົວ, ຂົງເຂດວຽກງານກະສິກໍາ ເນື້ອທີ່ປັກດຳຕົວຈິງ 86.948 ເຮັກຕາ, ຖ້ວມ 10.089 ເຮັກຕາ, ເສຍຫາຍ 3.323 ເຮັກຕາ. ເນື້ອທີ່ປູກພືດຕົວຈິງ 17.887 ຮຕ, ຖ້ວມ 2.604 ຮຕ, ເສຍຫາຍ 1.186 ຮຕ, ຜົນກະທົບຕໍ່ສັດລ້ຽງ: ຄວາຍຕາຍ 384 ໂຕ, ງົວຕາຍ 222 ໂຕ, ແບ້ຕາຍ 301 ໂຕ, ໝູຕາຍ 328 ໂຕ, ສັດປີກຕາຍ 4.925 ໂຕ, ໜອງປາຖືກຖ້ວມ 468 ໜອງ, ລະບົບຊົນລະປະທານຖືກກະທົບ 56 ໂຄງການ, ຄອງເໝືອງ 1.637 ແມັດ. ນອກນີ້ຍັງມີລະບົບໄຟຟ້າ, ສາທາລະນະສຸກ, ເສັ້ນທາງ ແລະ ຂົວຢູ່ 9 ຕົວເມືອງ ໄດ້ຮັບຜົນກະທົບເສຍຫາຍລວມເຖິງຂົງເຂດການສຶກສາ, ສະຖານທີ່ແຫຼງທ່ອງທ່ຽວຕ່າງໆ ມາຮອດປະຈຸບັນສາມາດປະເມີນຜົນເສຍຫາຍທີ່ຖືກຜົນກະທົບຈາກໄພພິບັດນ້ຳຖ້ວມໃນທົ່ວແຂວງ ມູນຄ່າທັງໝົດເກືອບ 200 ຕື້ກີບ, ໃນນີ້ ຜົນເສຍຫາຍຈາກນໍ້າຖ້ວມສະເພາະເມືອງຄູນຄຳປະມານ 131 ຕື້ກວ່າກີບ, ສ່ວນຍອດທີ່ໄດ້ຮັບການຊ່ວຍເຫຼືອ ທັງໝົດ 12 ຕື້ກວ່າກີບ, ໃນນັ້ນເປັນເງິນສົດຈໍານວນ 7 ຕື້ກວ່າກີບ.
ໂອກາດນີ້ ທ່ານ ຮອງປະທານປະເທດ ໄດ້ມີຄໍາເຫັນໂອ້ລົມຕໍ່ຄະນະພັກ, ຄະນະນຳຂອງແຂວງເຊິ່ງທ່ານໄດ້ສະແດງຄວາມເປັນຫ່ວງເປັນໄຍ ແລະ ຕີລາຄາສູງຄວາມຮັບຜິດຊອບໜ້າທີ່ການເມືອງຂອງການນໍາຂັ້ນແຂວງ, ຄຽງຄູ່ກັນນັ້ນໄດ້ເນັ້ນໃຫ້ ເອົາໃຈໃສ່ສືບຕໍ່ໃນການແກ້ໄຂສະພາບຜົນກະທົບພາຍຫຼັງນໍ້າຖ້ວມ ເພື່ອຟື້ນຟູລະບົບພື້ນຖານໂຄງລ່າງ ແລະ ຊີວິດການເປັນຢູ່ຂອງປະຊາຊົນດ້ວຍການວາງແຜນການຜະລິດກະສິກໍາ ໂດຍເລັ່ງໃສ່ດ້ານຊົນລະປະທານ ແລະ ແນວພັນ ເພື່ອຕອບສະໜອງການຜະລິດຕາມເງື່ອນໄຂຂອງແຕ່ລະທ້ອງຖິ່ນ, ສ່ວນດ້ານພື້ນຖານໂຄງລ່າງຖະໜົນຫົນທາງສ່ວນໃດທີ່ເປັນຄວາມຮັບຜິດຊອບຂອງແຂວງກໍ່ໃຫ້ສືບຕໍ່ເລັ່ງມືແກ້ໄຂໂດຍໄວ ແລະ ສ່ວນໃດທີ່ເປັນຄວາມຮັບຜິດຊອບຂອງສູນກາງກໍ່ໃຫ້ປະສານສົມທົບກັບບັນດາກະຊວງທີ່ກ່ຽວຂ້ອງ, ພ້ອມນັ້ນກໍ່ຕ້ອງແກ້ໄຂດ້ານກະແສໄຟຟ້າ ຕອບສະໜອງໃຫ້ປະຊາຊົນໄດ້ຊົມໃຊ້ໃຫ້ທົ່ວເຖິງ, ດ້ານການພັດທະນາເສດຖະກິດ ໃຫ້ສືບຕໍ່ຊີ້ນໍາແຕ່ລະຂະແໜງການຈັດເກັບລາຍຮັບເຂົ້າງົບປະມານໃຫ້ໄດ້ຕາມແຜນ, ດ້ານວັດທະນະທໍາ-ສັງຄົມ ເລັ່ງໃສ່ ປັບປຸງພື້ນຖານໂຄງລ່າງ ເພື່ອກຽມພ້ອມໃນການເປີດການຮຽນ-ການສອນ, ພ້ອມທັງແນະນໍາໃນການປ້ອງກັນພະຍາດລະບາດຕ່າງໆ ແລະ ເຝົ້າລະວັງຕໍ່ບັນຫາໄພພິບັດທີ່ອາດຈະເກີດຂື້ນເພື່ອກະກຽມຮັບມືໃຫ້ທ່ວງທັນ. ນອກນັ້ນຍັງໄດ້ຊີ້ນໍາໃນດ້ານວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມ, ລວມເຖິງການສ້າງຂະບວນການກະກຽມດໍາເນີນກອງປະຊຸມໃຫຍ່ 3 ຂັ້ນ ຕິດພັນກັບການຫັນເອົາພະນັກງານລົງກໍ່ສ້າງຮາກຖານການເມືອງ ປັບປຸງການຈັດຕັ້ງຢູ່ຂັ້ນຮາກຖານໃຫ້ມີຄວາມໜັກແໜ້ນ ເຂັ້ມແຂງ ແລະ ມີຄຸນນະພາບ.
