ຈັດກິດຈະກໍາ “ກວດສຸຂະພາບດ້ວຍຮັກ” ໃຫ້ແກ່ພະນັກງານທາງລົດໄຟໂດຍບໍ່ເສຍຄ່າ
ເພື່ອຮັບປະກັນໃຫ້ພະນັກງານຂອງທາງລົດໄຟລາວ-ຈີນມີສຸຂະພາບທີ່ແຂງແຮງ, ມີຄວາມພ້ອມ ແລະ ກຳລັງຫ້າວຫັນໃນການປະຕິບັດໜ້າທີ່, ໃນວັນທີ 19 ສິງຫາທີ່ຜ່ານມາ, ເນື່ອງໃນໂອກາດ “ວັນແພດຈີນ” ຄັ້ງທີ VI, ບໍລິສັດທາງລົດໄຟລາວ-ຈີນ ໄດ້ເຊີນຄະນະທີມແພດຈີນຜູ້ຊ່ຽວຊານ ຈຳນວນ 8 ທ່ານທີ່ມາຊ່ວຍເຫຼືອຢູ່ລາວເດີນທາງຈາກສະຖານີນະຄອນຫຼວງວຽງຈັນໄປຍັງສະຖານີວັງວຽງ ເພື່ອຈັດກິດຈະກຳປິ່ນປົວພະຍາດໂດຍບໍ່ເສຍຄ່າໃຫ້ແກ່ພະນັກງານທາງລົດໄຟ. ກິດຈະກຳດຳເນີນໄປດ້ວຍບັນຍາກາດອົບອຸ່ນ ແລະ ຄວາມເອົາໃຈໃສ່ຂອງແພດໝໍໃນການກວດພະຍາດໃຫ້ແກ່ພະນັກງານທົ່ວໜ້າ, ພໍແຕ່ມາຮອດສະຖານີວັງວຽງ, ທີມແພດຈີນຜູ້ຊ່ຽວຊານກໍຮີບລົງຈາກລົດ ແລະ ເລີ່ມກວດສຸຂະພາບຢ່າງວ່ອງໄວໃຫ້ແກ່ພະນັກງານທາງລົດໄຟທີ່ມາລໍຖ້າຢູ່ໃນຫ້ອງລໍຖ້າຂອງສະຖານີວັງວຽງ.
ທີມຜູ້ຊ່ຽວຊານແພດໝໍໄດ້ວັດແທກຄວາມດັນເລືອດ, ອັດຕາການເຕັ້ນຫົວໃຈຂອງພະນັກງານແຕ່ລະຄົນ, ໃຫ້ຄຳປຶກສາບັນຫາສຸຂະພາບ, ຮັບຟັງເຖິງປະຫວັດຂອງຄົນເຈັບ ແລະ ແນະນຳວິທີການໃຊ້ຢາໃຫ້ແກ່ຄົນເຈັບຢ່າງລະອຽດ, ພ້ອມທັງໃຫ້ຄວາມຮູ້ດ້ານການປະຖົມພະຍາບານເບື້ອງຕົ້ນເຊັ່ນ: ການເຮັດ PCR; ເຜີຍແຜ່ຄວາມຮູ້ ແລະ ຂໍ້ຄວນລະວັງໃນການປ້ອງກັນພະຍາດທີ່ມັກເກີດໃນສະພາບອາກາດຮ້ອນເຊັ່ນ: ພະຍາດລົມແດດ, ໄຂ້ເລືອດອອກເປັນຕົ້ນ; ນອກນີ້, ກໍໃຫ້ຄວາມຮູ້ດ້ານການຮັກສາສຸຂະພາບ ແລະ ອາຫານການກິນເພື່ອປ້ອງກັນພະຍາດຊ້ຳເຮື້ອຕ່າງໆເຊັ່ນ: ພະຍາດຄວາມດັນເລືອດສູງ ແລະ ພະຍາດເບົາຫວານ; ພ້ອມທັງໄດ້ວິເຄາະເຖິງສາເຫດຂອງການເກີດຕິດເຊື້ອໄຂ້ຍຸງລາຍ ແລະ ມາລາເລຍ ທີ່ກຳລັງແຜ່ຫຼາຍໃນປະເທດລາວ ແລະ ໄດ້ໃຫ້ຄຳແນະນຳເຖິງວິທີປ້ອງກັນຢ່າງມີວິທະຍາສາດ.
ພະນັກງານຈາກສູນສ້ອມແປງຫຼວງພະບາງໄດ້ກ່າວວ່າ: “ກິດຈະກໍາກວດສຸຂະພາບໃນຄັ້ງນີ້ ແມ່ນຮອງຮັບໄດ້ທັນເວລາຫຼາຍ, ບໍ່ພຽງແຕ່ຊ່ວຍໃຫ້ພວກເຮົາເຂົ້າໃຈກ່ຽວກັບສະພາບຄວາມແຂງແຮງຂອງຮ່າງກາຍຂອງຕົວເອງ, ຍັງຊ່ວຍໃຫ້ພວກເຮົາມີຄວາມຮູ້ດ້ານການປະຖົມພະຍາບານ ແລະ ວິທີການການປ້ອງກັນພະຍາດເບື້ອງຕົ້ນອີກດ້ວຍ, ເຊິ່ງຊ່ວຍເຮັດໃຫ້ພະນັກງານທີ່ເຮັດວຽກຢູ່ພາກສະໜາມຄືພວກເຮົາມີຄວາມຫ້າວຫັນຂຶ້ນກວ່າເກົ່າ ຮັບປະກັນຮ່າງກາຍມີສຸຂະພາບດີ”
ພະນັກງານລາວທີ່ມາກວດສຸຂະພາບໄດ້ກ່າວວ່າ: “ຂອບໃຈຜູ້ຊ່ຽວຊານຈາກທີມແພດຈີນທີ່ເດີນທາງຈາກແດນໄກເພື່ອມາຊ່ວຍຊ່ວຍກວດສຸຂະພາບໃຫ້ພວກເຮົາ ແລະ ຍັງໄດ້ຊ່ວຍເຫຼືອປະເທດເຮົາໃນການພັດທະນາວຽກງານທາງການແພດ, ຖ່າຍທອດຄວາມຮູ້ໃຫ້ແພດລາວໃນການປິ່ນປົວພະຍາດໃຫ້ມີປະສິດທິພາບຫຼາຍຂຶ້ນ, ຂະໜາດມື້ພັກທາງລັດຖະການແບບນີ້ ທາງທີມແພດຫມໍກໍໄດ້ສະຫລະເວລາພັກຜ່ອນມາຊ່ວຍຈັດກິດຈະກຳການປິ່ນປົວພະຍາດ ແລະ ກວດສຸຂະພາບໂດຍທີ່ບໍ່ເສຍຄ່າໃຊ້ຈ່າຍໃຫ້ແກ່ພວກເຮົາ, ພວກເຮົາມີຄວາມຕື້ນຕັນໃຈຫລາຍ, ຫຼັງຈາກນີ້ພວກເຮົາຈະຕັ້ງໃຈເຮັດຫນ້າທີ່ວຽກງານໃຫ້ດີ, ບໍລິຫານທາງລົດໄຟລາວ-ຈີນມີຄວາມປອດໄພສູງ ແລະ ມີປະສິດທິຜົນສູງທີ່ສຸດ ເພື່ອເປັນຜູ້ສືບຕໍ່ສ້າງຄູ່ຮ່ວມສະຕາກຳລາວ-ຈີນ ແລະ ນ້ຳໃຈມິດຕະພາບລາວ-ຈີນທີ່ຍືນຍົງ! ”
ໃນເວລາກວ່າ 2 ຊົ່ວໂມງທີມງານແພດໝໍຈີນໄດ້ໃຫ້ຄໍຳປຶກສາດ້ານສຸຂະພາບ ແລະ ກວດສຸຂະພາບໂດຍບໍ່ເສຍຄ່າໃຊ້ຈ່າຍໃຫ້ແກ່ພະນັກງານທັງລາວ ແລະ ຈີນໄດ້ເປັນຈຳນວນຫຼາຍ. ໃນຕອນທ້າຍ, ທຸກຄົນກໍຍັງບໍ່ຢາກຈະອຳລາກັນ, ພາຍໃຕ້ສາຍຕາທີ່ເຕັມໄປດ້ວຍຄວາມປາບປື້ມໃຈຂອງທຸກຄົນ, ພະນັກງານທາງລົດໄຟໄດ້ໂບກມືລາ ແລະ ສົ່ງຄະນະທີມແພດຈີນຜູ້ຊ່ຽວຊານ ຂຶ້ນລົດໄຟກັບຄືນໄປ ນະຄອນຫຼວງວຽງຈັນ.
#Medialaos#MMD
#ແຫລ່ງຂໍ້ມູນ: ບໍລິສັດລົດໄຟລາວ-ຈີນ ຈຳກັດ
