ແຫລ່ງຂ່າວຈາກຊ່ອງຂ່າວເມືອງວິລະບູລີ ແຂວງສະຫວັນນະເຂດ ໃຫ້ຮູ້ວ່າ: ເນື່ອງຈາກທີ່ສະພາບຝົນຕົກລິນຕິດຕໍ່ກັນຫລາຍວັນໃນຜ່ານມາ ຈຶ່ງເຮັດໃຫ້ນໍ້າໃນສາຍຫ້ວຍ, ສາຍເຊນ້ອຍ-ໃຫຍ່ຕ່າງໆ ຢູ່ເຂດເມືອງວິລະບູລີ ແຂວງສະຫວັນນະເຂດ ໄດ້ມີປະລິມານທີ່ເພີ່ມຂຶ້ນ ແລ້ວໄຫລລົ້ນຝັ່ງຖ້ວມໄຮ່ນາຮົ້ວສວນ, ໜອງປາ ພື້ນທີ່ທໍາການຜະລິດຂອງປະຊາຊົນເປັນຫລາຍບ້ານຢູ່ເມືອງວິລະບູລີ ເປັນຕົ້ນ ແມ່ນເຂດບ້ານປ່າຜັກເນົ່າ, ບ້ານນາສະເລາະ, ບ້ານນາແກ ແລະ ບ້ານອື່ນໆ, ເຂດຈຸດສຸມເມືອງວັງ ແມ່ນໄດ້ຖືກນໍ້າຖ້ວມໄດ້ 2-3 ວັນແລ້ວ. ພ້ອມນີ້, ບັນດາເສັ້ນທາງສາຍຫລັກ, ສາຍນ້ອຍ ລະຫວ່າງບ້ານຫາບ້ານ, ບ້ານຫາເມືອງກໍ່ໄດ້ຖືກນໍ້າຖ້ວມໃນຫລາຍຈຸດເຊັ່ນ: ຈຸດຂົວນໍ້າລົ້ນຫ້ວຍນໍ້າແມງ ເສັ້ນທາງບ້ານດົງບັງຫາບ້ານທາດ,ຈຸດຂົວຫ້ວຍເດື່ອ ຫລື ຫ້ວຍຂົວແປ້ນ ເສັ້ນທາງບ້ານໄຊຍະລາດ ຫາບ້ານແກ້ວວິໄລ, ຈຸດຂົວຫ້ວຍອີຮູ້ບ້ານນາແກ, ມີດິນເຊາະເຈື່ອນຕາມເສັ້ນທາງບາງຈຸດ, ມີເສົາໄຟຟ້າຫັກກົ່ນ ເສັ້ນທາງໄປບ້ານນໍ້າປະເຄນ ແລະ ອື່ນໆ.
ປັດຈຸບັນ, ລະດັບນໍ້າໃນບາງເຂດ ກໍຍັງເພີ່ມລະດັບຂຶ້ນຢູ່, ໃນບາງບ້ານກໍໄດ້ຫລຸດລົງແດ່ແລ້ວ, ແຕ່ຝົນກໍຍັງສືບຕໍ່ຕົກລິນຢູ່. ສະນັ້ນ ຂໍໃຫ້ອໍານາດການປົກຄອງບ້ານ ພ້ອມດ້ວຍພໍ່ແມ່ປະຊາຊົນໃນແຕ່ລະບ້ານ ຈົ່ງໄດ້ມີສະຕິກຽມພ້ອມຢູ່ຕະຫລອດເວລາ, ຍົກຍ້າຍສິ່ງຂອງມີຄ່າ, ສັດລ້ຽງໄປໄວ້ໃນເຂດທີ່ປອດໄພໄວ້ກ່ອນ ເພື່ອປ້ອງກັນຜົນເສຍຫາຍທີ່ອາດຈະເກີດຂຶ້ນ ເຊິ່ງຜົນເສບຫານ ຍັງບໍ່ສາມາດປະເມີນໄດ້.
ຕໍ່ກັບສະພາບການດັ່ງກ່າວ, ໃນບ່າຍວັນທີ 3 ສິງຫາ 2023 ນີ້, ທ່ານ ແສງເພັດ ຄໍາສຸວັນ ຮອງເລຂາພັກເມືອງ, ປະທານກວດກາພັກລັດເມືອງ ກໍໄດ້ລົງຕິດຕາມເບິ່ງສະພາບນໍ້າຖ້ວມ ເພື່ອປະເມີນສະພາບການ ແລະ ກະກຽມຄວາມພ້ອມດ້ານຕ່າງໆ ເພື່ອຊ່ວຍເຫລືອຜູ້ທີ່ໄດ້ຮັບຜົນກະທົບ.
