ສຳນັກຂ່າວ ຊິນຮວາ ຂອງ ສປຈີນ, ເມື່ອບໍ່ດົນມານີ້, ຟີລິບປິນ ແລະ ສະຫະພາບ ເອີຣົບ(EU) ເຫັນດີ ຈະຟື້ນຟູ ການຄ້າ ແລະ ເຈລະຈາ ຂໍ້ຕົກລົງ ການຄ້າ ເສລີ (FTA) ອີກຄັ້ງ ໂດຍ ທັງສອງຝ່າຍ ຈະສືບຕໍ່ ຄວາມຮ່ວມມືໃໝ່ອີກຄັ້ງ ລະຫວ່າງ ກອງປະຊຸມຂອງ ທ່ານ ເຟີຣດີນານ ໂຣມວລເດຊ ມາຣກອດ ປະທານາທິບໍດີ ຟີລິບປິນ ແລະ ທ່ານ ເອີຣຊູລາ ຟອນ ເດີຣ ລາເຢນ ປະທານ ຄະນະ ກໍາມະທິການ ເອີຣົບ ໃນນະຄອນຫລວງ ມະນີລາ ຂອງ ຟີລິບປິນ. ທ່ານ ເອີຣຊູລາ ຟອນ ເດີຣ ລາເຢນ ໃນຖານະ ເປັນ ປະທານຄະນະ ກຳມະທິການ ເອີຣົບ ຄົນທຳອິດ ທີ່ ເດີນທາງ ຢ້ຽມຢາມ ຟີລິບປິນ ໃນຮອບເກືອບ 6 ທົດສະວັດ ໂດຍ ທ່ານກ່າວວ່າ: ການຢ້ຽມຢາມ ຄັ້ງນີ້ ເປັນການ ສົ່ງສັນຍານ ເລັ່ງຊຸກຍູ້ ຄວາມຮ່ວມມື ໃນຍຸກໃໝ່ ລະຫວ່າງ ເອີຣົບ ແລະ ຟີລິບປິນ ພ້ອມທັງສະແດງ ຄວາມມຸ່ງໝັ້ນ ພັດທະນາ ການຄ້າ ທະວີພາຄີ ໃຫ້ກ້າວຂຶ້ນສູ່ລະດັບຕໍ່ໄປ.
ສ່ວນ ທ່ານ ເຟີຣດີນານ ໂຣມວລເດຊ ມາຣກອສ ໄດ້ປຶກສາ ຫາລືກັບປະທານ ຄະນະກຳມະທິການ ເອີຣົບ ກ່ຽວກັບ ຄວາມສຳພັນ ທາງເສດຖະກິດ ໂດຍແນ່ໃສ່ ຟື້ນຟູການຄ້າ ລະຫວ່າງ ສອງພາກພື້ນ , ພ້ອມທັງສະແດງຄວາມຍິນດີ ຕໍ່ການຟື້ນຟູ ເຈລະຈາ ການຄ້າເສລີ ຟີລິບປິນ-ສະຫະພາບ ເອີຣົບ ແລະ ຄະນະບໍລິຫານ ຈະເຮັດວຽກ ຮ່ວມກັບ ຜູ້ຊ່ຽວຊານຂອງ ເອີຣົບ ເພື່ອໃຫ້ບັນລຸ ຂໍ້ຕົກລົງ ການຄ້າ ເສລີ ທະວີພາຄີ ທີ່ມີ ການເຈລະຈາ ຄັ້ງທຳອິດ ໃນປິ 2016. ນອກນີ້ ທ່ານ ມາຣກອສ ຍັງໄດ້ສະແດງ ຄວາມຂອບໃຈ ມາຍັງ ສະຫະພາບ ເອີຣົບ ສໍາລັບ ການສະໜັບສະໜູນຟີລິບປິນ ໃນໄລຍະຍາວ ໂດຍສະເພາະ ກໍລະນີ ສະຫະພາບ ເອີຣົບ ຍອມຮັບໃບຮັບຮອງ ທີ່ອອກໂດຍຟີລິບປິນ ຊຶ່ງຈະເປັນ ປະໂຫຍດຕໍ່ຈຸເຮືອຟີລິບປິນ ທີ່ ເຮັດວຽກ ຢູ່ເທິງເຮືອຂອງສະຫະພາບ ເອີຣົບ ກວ່າ 50.000 ຄົນ.
