ກົມວັນນະຄະດີ ແລະ ພິມຈຳໜ່າຍ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຈັດຊຸດຝຶກອົບຮົມວຽກງານການພິມຈຳໜ່າຍຄັ້ງທີ V ຂຶ້ນໃນວັນທີ 1 ສິງຫາ ນີ້ ທີ່ຫ້ອງປະຊຸມສູນກາງແນວລາວສ້າງຊາດ (ສນຊ), ໂດຍການເຂົ້າຮ່ວມຂອງ ທ່ານນາງ ບົວໄຂ ເພັງພະຈັນ ຫົວໜ້າກົມສິລະປະ-ວັດທະນະທຳ, ມີທ່ານ ຫງວຽນ ຫງອກ ບາວ ຮອງຫົວໜ້າກົມການພິມ ແລະ ຈຳໜ່າຍ ກະຊວງຖະແຫຼງຂ່າວ ແລະ ການສື່ສານ ສສ ຫວຽດນາມ, ມີບັນດາຫົວໜ້າກົມ, ຮອງກົມ, ນັກສຳມະນາກອນເຂົ້າຮ່ວມ.
ທ່ານນາງ ຈັນເພັດ ຄຳຟອງ ຫົວໜ້າກົມວັນນະຄະດີ ແລະ ພິມຈຳໜ່າຍ ກ່າວວ່າ: ການຝຶກອົບຮົມຄັ້ງນີ້ ເພື່ອເປັນການຍົກລະດັບຄວາມຮູ້ ດ້ານວຽກງານການພິມຈຳໜ່າຍໃຫ້ພະນັກງານ-ລັດຖະກອນ ທີ່ເຮັດວຽກງານດ້ານການຈັດພິມ, ການພິມ ແລະ ການຈຳໜ່າຍໃຫ້ເຕັມໄປດ້ວຍເນື້ອໃນທີ່ອຸດົມສົມບູນ, ຮັບປະກັນລັກສະນະວິທະຍາສາດ ເພື່ອນໍາເອົາບົດຮຽນດັ່ງກ່າວມາໝູນໃຊ້ເຂົ້າໃນວຽກງານຂອງຕົນ, ພ້ອມທັງເປັນການກະກຽມສະເຫຼີມສະຫຼອງວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 61 ປີ, ເພື່ອຂໍ່ານັບຮັບຕ້ອນວັນຊາດ ສສ ຫວຽດນາມ ຄົບຮອບ 78 ປີ ແລະ ສະເຫຼີມສະຫຼອງວັນສ້າງຕັ້ງສື່ມວນຊົນ ແລະ ການພິມຈຳໜ່າຍ ຄົບຮອບ 73 ປີທີ່ຈະມາເຖິງນີ້. ການຝຶກອົບຮົມຄັ້ງນີ້ຖືເປັນຜົນງານ ທັງເປັນການສ້າງຂະບວນການປະກອບສ່ວນເຂົ້າໃນການສະເຫຼີມສະຫຼອງວັນສຳຄັນຕ່າງໆ. ສະນັ້ນ, ຈຶ່ງຮຽກຮ້ອງໃຫ້ບັນດານັກວິທະຍາກອນ ແລະ ສຳມະນາກອນຈົ່ງໄດ້ສຸມສະຕິປັນຍາຖ່າຍທອດ, ແລກປ່ຽນຄວາມຮູ້ເພື່ອບັນລຸຄາດໝາຍທີ່ວາງໄວ້.
ຂ່າວ-ພາບ: ບຸນອູ້ມ
