ຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ສະພາປະຊາຊົນຂັ້ນແຂວງ ແລະ ພະນັກງານເສນາທິການຊ່ວຍວຽກໃນການຮັບ ແລະ ພິຈາລະນາຄໍາຮ້ອງຂໍຄວາມເປັນ ທໍາຂອງສະພາແຫ່ງຊາດ 13 ແຂວງໃນທົ່ວປະເທດ ເຂົ້າຮ່ວມສໍາມະນາຍົກສູງຂີດຄວາມສາມາດ ໃນການຮັບ ແລະ ພິຈາລະນາຄໍາຮ້ອງຂໍຄວາມເປັນທໍາ ລະຫວ່າງວັນທີ 27-28 ກໍລະກົດ 2023 ຢູ່ເມືອງວັງວຽງ ແຂວງວຽງຈັນ ພາຍໃຕ້ການເປັນປະທານຂອງ ທ່ານ ຄຳແພງ ວິລະພັນ ປະທານກຳມາທິການຍຸຕິທຳ ສະພາແຫ່ງຊາດ ໂດຍໄດ້ຮັບການສະໜັບສະໜູນຈາກ ໂຄງການສ້າງຄວາມອາດສາມາດໃຫ້ແກ່ສະພາແຫ່ງຊາດ (WFD).
ການຈັດສຳມະນາຄັ້ງນີ້, ກໍເພື່ອເປັນການຍົກສູງຂີດຄວາມສາມາດ ໃຫ້ແກ່ກໍາມະການຂອງກໍາມາທິການຍຸຕິທໍາ, ຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ສະພາປະຊາ ຊົນຂັ້ນແຂວງ ແລະ ກົງຈັກເສນາທິການຊ່ວຍວຽກ ທີ່ຮັບຜິດຊອບວຽກງານ ຮັບ ແລະ ພິຈາລະນາຄໍາຮ້ອງຂໍຄວາມເປັນທໍາຂອງສະພາປະຊາຊົນຂັ້ນແຂວງ ແລະ ສະພາແຫ່ງຊາດ ໄດ້ຮັບການຍົກລະດັບຄວາມຮູ້, ຄວາມສາມາດ ກ່ຽວກັບບົດຮຽນການຮັບຕ້ອນ ແລະ ໃຫ້ຄໍາປຶກສາແກ່ປະຊາຊົນ ແລະ ວິທີການ ຄົ້ນຄວ້າ, ວິເຄາະ, ວິໄຈ ຄໍາຮ້ອງຂໍຄວາມເປັນທໍາ ລວມທັງຂັ້ນຕອນການພິຈາລະນາຄໍາຮ້ອງຂໍຄວາມເປັນທໍາໃຫ້ມີປະສິດທິພາບ ແນໃສ່ເຮັດໃຫ້ການປະຕິບັດພາລະບົດບາດ ຕິດຕາມກວດກາຂອງສະພາປະຊາຊົນຂັ້ນແຂວງ ແລະ ສະພາແຫ່ງຊາດ ໃນຖາເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນ ມີຜົນສັກສິດ ຢ່າງເຕັມສ່ວນ.
ໂອກາດນີ້, ຜູ້ເຂົ້າຮ່ວມໄດ້ຮັບຟັງ ແລະ ສຸມໃສ່ປະກອບຄຳເຫັນແລກປ່ຽນບົດຮຽນເຊິ່ງກັນ ແລະ ກັນ ກ່ຽວກັບການເຜີຍແຜ່ກົດໝາຍວ່າດ້ວຍການແກ້ໄຂຄຳຮ້ອງທຸກ (ສະບັບປັບປຸງ ປີ 2022) ແລະ ມະຕິວ່າດ້ວຍການຮັບ ແລະ ພິຈາລະນາຄຳຮ້ອງຂໍຄວາມເປັນທຳ ສະບັບເລກທີ 07/ຄປຈ, ລົງວັນທີ 9 ມັງກອນ 2023; ກົນໄກການຮັບ ແລະ ພິຈາລະນາຄໍາຮ້ອງຂໍຄວາມເປັນທໍາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ບົດຮຽນການຮັບຕ້ອນ ແລະ ໃຫ້ຄໍາປຶກສາຜູ້ທີ່ມາຍື່ນຄຳຮ້ອງຂໍຄວາມເປັນທຳ.
ຂ່າວ-ພາບ: ປາກລັກ ພົມມີໄຊ
