ກົມອະນາໄມ ແລະ ສົ່ງເສີມສຸຂະພາບ ກະຊວງສາທາລະນະສຸກ, ໄດ້ຈັດພິທີສະເຫຼີມສະຫຼອງວັນໂພຊະນາການແຫ່ງຊາດ ປະຈໍາປີ 2023 ຂຶ້ນໃນວັນທີ 30 ກໍລະກົດ ຜ່ານມາ ທີ່ສູນການຄ້າວຽງຈັນເຊັນເຕີ ນະຄອນຫຼວງວຽງຈັນ, ເປັນກຽດເຂົ້າຮ່ວມໃນພິທີຂອງ ທ່ານ ພອນປະເສີດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸຂະພາບ ຮອງຫົວໜ້າກອງເລຂາຄະນະກໍາມະການແຫ່ງຊາດ ດ້ານໂພຊະນາການ, ມີຜູ້ຕາງໜ້າຈາກສະຫະພາບເອີຣົບ, ພ້ອມດ້ວຍ ແຂກຖືກເຊີນ ແລະ ມວນຊົນເຂົ້າຮ່ວມ.
ໃນພິທີ, ທ່ານ ພອນປະເສີດ ອຸນາພົມ ກ່າວວ່າ: ງານສະເຫຼີມສະຫຼອງວັນໂພຊະນາການແຫ່ງຊາດ ປະຈຳປີ 2023 ພາຍໃຕ້ຄໍາຂັວນ: “ກິນດີມີສຸກ” ລັດຖະບານ ສປປ ລາວ ພ້ອມດ້ວຍຄູ່ຮ່ວມງານທັງພາຍໃນ ແລະ ສາກົນ ຄືສະຫະພາບເອີຣົບ ໄດ້ສືບຕໍ່ຄົ້ນຄວ້າການເຊື່ອມໂຍງລະຫວ່າງການລົງທຶນດ້ານໂພຊະນາການໃສ່ການຈະເລີນເຕີບໃຫຍ່ຂອງເດັກໃນຊຸມຊົນ ແລະ ທາງດ້ານການພັດທະນາວຽກງານໂພຊະນາການ ເພາະວ່າໂພຊະນາການແມ່ນຈຸດສຸມຫຼັກໃນການບັນລຸເປົ້າໝາຍ ວຽກງານການພັດທະນາເສດຖະກິດ-ສັງຄົມຂອງຊາດ ກໍຄືເປົ້າໝາຍການພັດທະນາແບບຍືນຍົງ (SDGs) “ຮອດປີ 2030 ແມ່ນປີທີ່ພວກເຮົາຕ້ອງບັນລຸເປົ້າໝາຍທີ່ລະບຸໄວ້ໃນການພັດທະນາແບບຍືນຍົງ(SDGs), ວຽກງານໂພຊະນາການຍັງເປັນບູລິມະສິດອັນດັບໜຶ່ງຂອງ ສປປ ລາວ ຍ້ອນວ່າມີຄວາມສໍາຄັນຕໍ່ກັບຊີວິດການເປັນຢູ່, ການເຕີບໃຫຍ່ຂະຫຍາຍຕົວ ແລະ ພັດທະນາການຂອງເດັກ, ຊຸມຊົນ ແລະ ປະເທດຊາດ.”
ທ່ານ ນາງ ອະສຸນຕາ ເທສຕາ ໄດ້ກ່າວວ່າ: ກິດຈະກໍາສະເຫຼີມສະຫຼອງວັນໂພຊະນາການແຫ່ງຊາດປີນີ້ແມ່ນຈັດຂຶ້ນໃນຮູບແບບຂອງການໃຫ້ຄວາມຮູ້, ຄວາມບັນເທິງ ແລະ ອັດແໜ້ນດ້ວຍຂໍ້ມູນຂ່າວສານທີ່ຈຳເປັນ, ສະຫະພາບເອີຣົບຂໍຢືນຢັນວ່າ: ພາຍໃນງານໄດ້ເຕົ້າໂຮມເອົາບັນດາພາກສ່ວນອົງການຈັດຕັ້ງດ້ານໂພຊະນາການຕ່າງໆ ມາວາງສະແດງໃຫ້ຄຳແນະນຳທີ່ເປັນປະໂຫຍດກ່ຽວກັບອາຫານການກິນ ເພື່ອສຸຂະພາບທີ່ດີ, ອົງການຕ່າງໆເຫຼົ່ານີ້ລວມມີ ສະຫະພາບເອີຣົບ, Child Find, ANRCB, WFP, UNICEF, Care, Sur CSA, Caritas, SCI, WVL NIPN. “ໂພຊະນາການທີ່ດີເລີ່ມຕົ້ນຈາກສະມາຊິກພາຍໃນຄອບຄົວໂດຍການປຸງແຕ່ງອາຫານທີ່ສົດ ໃໝ່ ແລະ ມີປະໂຫຍດ, ເຊັ່ນ: ໝາກໄມ້, ຜັກ ຫຼາກຫຼາຍຊະນິດ, ພືດຈຳພວກຖົ່່ວ ຊຶ່ງສາມາດນຳມາປຸງແຕ່ງ ອາຫານແຊບໄດ້ຫຼາຍແບບ ແລະ ຍັງເປັນມິດຕໍ່ສິ່ງແວດລ້ອມອີກດ້ວຍ.
