ນັກຮຽນລາວ ຈາກໂຮງຮຽນນານາຊາດອົດສະຕາລີ ໄດ້ເຂົ້າຮ່ວມການແຂ່ງຂັນຄະນິດສາດ ທີ່ປະເທດສິງກະໂປ ໃນລະຫວ່າງວັນທີ 23-24 ກໍລະກົດ 2023 ຜ່ານມາ ສາມາດຍາດໄດ້ 1 ຫລຽນຄຳ, 4 ຫລຽນເງິນ, 3 ຫລຽນທອງ, ລາງວັນຊົມເຊີຍ 1 ຫລຽນ ແລະ ໃບຍ້ອງຍໍ 11 ໃບ ເຊິ່ງການແຂ່ງຂັນດັ່ງກ່າວ, ມີຜູ້ເຂົ້າຮ່ວມ ທັງໝົດ 1.500 ກວ່າຄົນ ຈາກ 32 ປະເທດ.
ການແຂ່ງຂັນຄະນິດສາດ ປະກອບມີ 3 ຮອບ ຄື: ຮອບທີ 1 ຕອບຄຳຖາມໂຈດເລກ, ຮອບທີ 2 ຫລິ້ນເກມພັດທະນາທັກສະເລກ (ປະກອບມີ 1 ທີມ, ທີມລະ 3 ຄົນ) ສ່ວນຮອບທີ 3 ແກ້ໂຈດຄະນິດຄິດໄວ ເຊິ່ງຜ່ານການແຂ່ງຂັນ ທ້າວ ສຸຣິຍະເດດ ແສງສຸຣິຍະ ຫ້ອງ ປ2 ສາມາດຍາດໄດ້ 1 ຫລຽນຄໍາ ແລະ 1 ຫລຽນທອງ, ທ້າວ ສຸກສໍາລານໄຊ ພົມມີສິດ ຫ້ອງ ປ2 ສາມາດຍາດໄດ້ 2 ຫລຽນທອງ ແລະ 1 ຫລຽນເງິນ, ນາງ ຫົງທອງ ພົ້ນວິໃສ ຫ້ອງ ມ2 ສາມາດຍາດໄດ້ 2 ຫລຽນເງິນ ແລະ ນາງ ເອມິກະ ວິລະວົງ ມ4 ສາມາດຍາດໄດ້ 1 ຫລຽນເງິນ ເຊິ່ງຜົນງານທີ່ຍາດມາໄດ້ໃນຄັ້ງນີ້ ແມ່ນໄດ້ສ້າງຊື່ສຽງ, ສ້າງຜົນງານ ໃຫ້ກັບຕົນເອງ, ໂຮງຮຽນ ແລະ ປະເທດຊາດ, ເຮັດໃຫ້ສາກົນ ກໍຄື ບັນດາປະເທດ ໃນທົ່ວໂລກ ໄດ້ຮັບຮູ້ ສປປ ລາວ ຫລາຍຂຶ້ນ ເຊິ່ງມັນສ່ອງແສງໃຫ້ເຫັນເຖິງ ລະບົບການຮຽນ-ການສອນ ກໍຄື ຄວາມເອົາໃຈໃສ່ຂອງນ້ອງນັກຮຽນ ແລະ ຄວາມເອົາໃຈໃສ່ ຂອງ ຄູ-ອາຈານ ໃນການສິດສອນ ຢູ່ໂຮງຮຽນຕ່າງໆ ໂດຍສະເພາະ ຢູ່ໂຮງຮຽນນານາຊາດ ໃນ ສປປ ລາວ ໄດ້ຮັບການພັດທະນາຢ່າງມີປະສິດທິພາບ ແລະ ປະສິດທິຜົນ ສາມາດແຂ່ງຂັນໃນລະດັບສາກົນໄດ້.
ນາງ ເອມິກະ ວິລະວົງ ໄດ້ໃຫ້ສຳພາດວ່າ: ຕົນເອງມີຄວາມຮູ້ສຶກດີໃຈຫລາຍ ທີ່ສາມາດຄວ້າໄດ້ 1 ຫລຽນເງິນ ຈາກການແຂ່ງຂັນຄະນິດສາດ ທີ່ປະເທດສິງກະໂປ ແລະ ສາມາດສ້າງຊື່ສຽງໃຫ້ກັບປະເທດລາວ ພ້ອມສະແດງຄວາມຂອບໃຈຕໍ່ຄອບຄົວ ແລະ ໂຮງຮຽນ ທີ່ໃຫ້ການສະໜັບສະໜູນຊ່ວຍເຫລືອຕະຫລອດມາ ເຊິ່ງກ່ອນຈະເຂົ້າຮ່ວມແຂ່ງຂັນ ຕົນເອງກໍໄດ້ກະກຽມຄວາມພ້ອມ ໂດຍທາງໂຮງຮຽນ ກໍໄດ້ສອນເພີ່ມພິເສດ ສົມທົບກັບການຄົ້ນຄວ້າດ້ວຍຕົນເອງເປັນປະຈຳ ເພື່ອໃຫ້ຕົນເອງມີຄວາມສາມາດທີ່ເໜືອກວ່າຄົນອື່ນ ແລະ ສາມາດຍາດແຍ່ງໄຊຊະນະໃນເວລາເຂົ້າຮ່ວມການແຂ່ງຂັນຕ່າງໆ. ໃນສົກຮຽນຜ່ານໆມາ ຕົນເອງກໍໄດ້ເຂົ້າຮ່ວມແຂ່ງຂັນຄະນິດສາດ ພາຍໃນປະເທດຫລາຍຄັ້ງ ແລະ ສາມາດຍາດໄດ້ຫລຽນເງິນ 2 ຫລຽນ ແລະ ໃບຍ້ອງຍໍຈຳນວນໜຶ່ງ. ພ້ອມນີ້ ກໍຝາກເຖິງໝູ່ເພື່ອນ, ນ້ອງນັກຮຽນ ໃຫ້ຕັ້ງໃຈຮໍ່າຮຽນ ຝຶກຝົນຫລໍ່ຫລອມຕົນເອງໃຫ້ກາຍເປັນຄົນທີ່ມີຄວາມຄວາມຮູ້, ຄວາມສາມາດ ແລະ ມີຄວາມເຂັ້ມແຂງທາງດ້ານການສຶກສາ ເພື່ອກ້າວໄປສູ່ ການແຂ່ງຂັນໃນລະດັບສາກົນ.
ການແຂ່ງຂັນດັ່ງກ່າວ, ໄດ້ເລີ່ມມາແຕ່ປີ 2006 ພາຍໃຕ້ຊື່ການເເຂ່ງຂັນເລກລະຫວ່າງ ໂຮງຮຽນໃນສິງກະໂປ ເເລະ ທະວີບອາຊີ( SASMO) ແລ້ວໄດ້ປ່ຽນມາເປັນການແຂ່ງຂັນວິທະຍາສາດລະດັບນານາຊາດ (VANDA), ການເເຂ່ງຂັນເລກອາເມລິກາ (AMO) ແລະ ການເເຂ່ງຂັນເລກສິງກະໂປ (SINGA), ໂຮງຮຽນນານາຊາດອົດສະຕຣາລີ ເປັນໂຮງຮຽນແຫ່ງດຽວໃນປະເທດລາວ ທີ່ຮ່ວມມືກັບສູນການເເຂ່ງຂັນເລກນານາຊາດສິງກະໂປ(SIMCC) ແລະ ເປັນໂຮງຮຽນດຽວທີ່ຈັດການແຂ່ງຂັນຕ່າງໆຂອງ SIMCC ຕັ້ງແຕ່ປີ 2018 ແລະ ໄດ້ສົ່ງນັກຮຽນທີ່ມີພອນສະຫວັນ ເພື່ອສະແດງທັກສະຄວາມສາມາດໃນດ້ານການແກ້ໂຈດຄະນິດສາດ ແລະ ເລກສົມຜົນ ເຂົ້າຮ່ວມລາຍການຕ່າງໆຢ່າງເປັນປະຈໍາ.
ຂ່າວ: ກິດຕາ
