ແມນເຊັສເຕີ ຢູໄນເຕັດ ຫວັງຈະເຊັນສັນຍາ ຣາສມຸສ ຮອຍລຸນ ຈາກ ອະຕາລັນຕາ ໄດ້ກ່ອນລະດູການໃໝ່ ພຣີເມຍລີກ ຈະເລີ່ມຕົ້ນ ໂດຍທີ່ ປາຣີ ແຊັງ-ແຊັກແມັງ (PSG) ກໍຍື່ນຂໍ້ສະເໜີຊີງຕົວແລ້ວ.
ເອຣິກ ເທນ ຮາກ ເນັ້ນໜັກອີກຄັ້ງວ່າ ແມນເຊັສເຕີ ຢູໄນເຕັດ ຈໍາເປັນຕ້ອງຊອກຫາກອງໜ້າຄົນໃໝ່ຢ່າງຮີບດ່ວນ ຫຼັງຈາກພ່າຍແພ້ໃຫ້ກັບ ຣີວ ມາດຣິດ 2-0 ໃນເກມອຸ່ນເຄື່ອງ.
ເປັນທີ່ຍອມຮັບກັນວ່າ ຮອຍລຸນ ເປົ້າຫມາຍຂອງພວກເຂົາຍັງມີປະສົບການບໍ່ຫຼາຍ ແລະ ຖືກເບິ່ງເປັນເພັດທີ່ຍັງບໍ່ໄດ້ຜ່ານການເຈຍລະໄນ ເຊິ່ງຕໍ່ໃຫ້ໄດ້ຕົວເຂົາມາ ແຕ່ບາງຄັ້ງ ມາຄັສ ແຣຊຟອດ ອາດຕ້ອງຢືນເປັນກອງໜ້າແດ່.
ຢ່າງໃດກໍຕາມ, ພວກເຂົາຮູ້ສຶກວ່າ ຮອຍລຸນ ຄືນັກເຕະປະເພດທີ່ຈະໄດ້ຮັບຜົນປະໂຫຍດຈາກວິທີການສັ່ງສອນ ແລະ ຄຸມເຂັ້ມຂອງ ເທນ ຮາກ
ຈົນເຖິງຕອນນີ້ ຍັງບໍ່ມີຂໍ້ຕົກລົງໃດໆເກີດຂຶ້ນ ພາຍຫຼັງ ແມນຢູ ຍື່ນຂໍ້ສະເໜີໄປ 50 ລ້ານເອີໂຣ ບວກກັບ 10 ລ້ານເອີໂຣເພີ່ມຕື່ມ ໂດຍ ອະຕາລັນຕາ ຍັງຢາກໄດ້ຄ່າຕົວຢູ່ໃນລະດັບ 70 ລ້ານເອີໂຣ ເຮັດໃຫ້ການເຈລະຈາຕ້ອງດຳເນີນຕໍ່ໄປ.
ຢ່າງໃດກໍຕາມ, ພວກເຂົາຫວັງວ່າການເຊັນສັນຍາ ຮອຍລຸນ ຈະສໍາເລັດກ່ອນທີ່ລະດູການໃໝ່ ພຣີເມຍລີກ ເລີ່ມຕົ້ນ ເຊິ່ງພວກເຂົາຈະພົບກັບ ວູຟແຮມຕັນ ໃນວັນທີ 14 ສິງຫາເປັນເກມທໍາອິດ.
ທາງຝ່າຍ PSG ທີ່ໃຫ້ຄວາມສົນໃຈນັ້ນ ກໍຫຍັບຕົວແລ້ວເຊັ່ນກັນ ດ້ວຍການຍື່ນຂໍ້ສະເໜີເຂົ້າໄປ 50 ລ້ານເອີໂຣ ຢ່າງໃດກໍຕາມ ລາຍງານລະບຸວ່ານັກເຕະອາຍຸ 20 ປີຍັງມີຄວາມສົນໃຈທີ່ຈະຍ້າຍໄປສູ່ຖິ່ນ ໂອລ ແທຣບຟອດ.
ໂອກາດໃນການເຊັນສັນຍາຂອງ ແມນເຊສເຕີ ຢູໄນເຕັດ ກໍເພີ່ມຂຶ້ນ ຫຼັງຈາກ ອະຕາລັນຕາ ໃກ້ຈະໄດ້ຕົວ ເອວ ບິລານ ຕູເຣ່ ມາຈາກ ອັນເມເຣຍ ເພື່ອມາທົດແທນຕໍາແໜ່ງຂອງນັກເຕະຊາວເດນມາກ.
ແມນເຊັສເຕີ ຢູໄນເຕັດ ຍັງມີເປົ້າໝາຍອື່ນອີກ ຫາກພາດການໄດ້ຕົວ ຮອຍລຸນ, ຫຼັງເພັ່ງເລັງນັກເຕະແບບ ຣັນດາລ ໂຄໂລ ມູອານີ່ ເອົາໄວ້ ລວມເຖິງ ໂມຮໍາເໝັດ ຄູດຸສ ທີ່ສາມາດຫຼິ້ນໄດ້ທັງກອງກາງ ແລະ ກອງໜ້າ.
ງົບປະມານຂອງແມນເຊັສເຕີ ຢູໄນເຕັດ ມີຂ້ອນຂ້າງຈຳກັດ ເນື່ອງຈາກກົດຍຸຕິທໍາດ້ານການເງິນແບບໃໝ່ ແຕ່ພວກເຂົາເດີນໜ້າດ້ວຍການເຊັນສັນຍາ ຮອຍລຸນ ໄດ້ດ້ວຍການປ່ອຍນັກເຕະອອກໄປ.
ພວກເຂົາຂາຍ ອັນໂທນີ ເອລັງກາ ໄປໃຫ້ກັບ ນັອດຕິງແຮມ ຟໍເຣສ ແລ້ວ ແລະ ຄາດໝາຍວ່າຈະມີການລະບາຍນັກເຕະອອກໄປຫຼາຍກວ່ານີ້ອີກ.
