Sky Bet ໄດ້ຈັດການສໍາຫຼວດຄວາມຄິດເຫັນຂອງກອງເຊຍບານໃນຫົວຂໍ້ ຜູ້ຈັດການຂອງພຣີເມຍລີກ ທີ່ໃຊ້ງານໄດ້ຢ່າງກຸ້ມຄ່າທີ່ສຸດ ເມື່ອທຽບກັບຜົນຕອບແທນທີ່ໄດ້ຮັບ ແລະ ປາກົດວ່າມີຜົນການລົງຄະແນນສຽງທີ່ໜ້າຕົກໃຈ.
Sky Bet ສອບຖາມຄວາມຄິດເຫັນຂອງກອງເຊຍບານ ເມື່ອວັນທີ 27 ກໍລະກົດ ພາຍໃຕ້ຫົວຂໍ້ຜູ້ຈັດການໃຫຍ່ໃນ ພຣີເມຍລີກ ຄົນໃດທີ່ໃຊ້ເງິນໄດ້ຢ່າງກຸ້ມຄ່າຫຼາຍທີ່ສຸດ ແລະ ເປັນ ເປບ ກວາດິໂອລ່າ ທີ່ຄອງອັນດັບໜຶ່ງຈາກຜົນການລົງຄະແນນ 23,7% ເນື່ອງຈາກເຂົານໍາພາ ແມນເຊສເຕີ ຊີຕີ ຄວ່າ 3 ແຊັມໄດ້ຢ່າງຍິ່ງໃຫຍ່.
ຢ່າງໃດກໍຕາມ, ອັນດັບ 2 ເຊິ່ງໄດ້ຮັບຄະແນນສຽງ 13,3% ຕົກເປັນຂອງ ເຈີເກນ ຄລັອບ ຜູ້ຈັດການໃຫຍ່ຂອງ ລິເວີພູລ, ເຊິ່ງລະດູການທີ່ຜ່ານມາ ມີຜົນງານທີ່ຫຼົມແຫຼວ ບໍ່ອາດນຳທີມຄວ້າໄຊໄດ້ເລີຍ ແຖມພາດຄວ້າໂຄຕ້າລົງຫຼິ້ນຂັນ ຢູຟ່າ ແຊັມປຽນລີກ ດ້ວຍ.
ສໍາລັບອັນດັບ 3 ໄດ້ແກ່ ເອັດດີ ຮາວ ເຊິ່ງນຳພາທີມ ນິວຄາສເຊິນ ຄວ້າ 4 ອັນດັບສູງສຸດ 9,6% ຕາມມາດ້ວຍ ໂທມັສ ແຟຣງ ຜູ້ຈັດການທີມ ເບຣນຟອດ 7,2% ແລະ ໂຣແບໂຕ ເດ ແຊບີ (ໄບຣຕັນ) 6,8% ແລະ ຣອຍ ຮັອດສັນ (ພາເລຊ) 4,4%.
ສ່ວນ ມິເກວ ອາເຕຕາ ຜູ້ຈັດການທີມ ອາເຊນອລ ຮອງແຊັມ ພຣີເມຍລີກ ຄອງອັນດັບ 7 ຈາກ 3,8% ຂອງສຽງລົງຄະແນນ ແຕ່ທີ່ໜ້າຊ໊ອກທີ່ສຸດ ໜີບໍ່ພົ້ນ ເອຣິກ ເທນ ຮາກ ຜູ້ຈັດການທີມ ແມນເຊັສເຕີ ຢູໄນເຕັດ ເຊິ່ງນຳພາແມນຢູລົງຫຼິ້ນໃນລາຍການ. ແຊັມປຽນລີກ ໄດ້ໃນລະດູການທໍາອິດຂອງເຂົາໃນຖິ່ນ ໂອລ ແທຣບຟອດ ແລະ ນໍາພາທີມຄວ້າແຊັມ ຄາຣາບາບ ຄັບ ຕະຫຼອດຈົນເຂົ້າຊີງຂັນ FA Cup ດ້ວຍ ແຕ່ຜູ້ຈັດການຊາວໂຮນລັງ ຄອງອັນດັບທີ 13 ຈາກການລົງຄະແນນສຽງ 2,4% ເປັນຮອງທັງ ຣັອບ ເອັດເວິດ ແລະ ແວງຊອງ ກອມປານີ ສອງຜູ້ຈັດການທີມນ້ອງໃໝ່ ລູຕັນ ແລະ ເບີນລີ່ ຂະນະທີ່ ຈູເລນ ໂລເປເຕກີ ຜູ້ຈັດການທີມ ວູຟແຮມຕັນ ທີ່ຢູ່ອັນດັບສຸດຈາກຄະແນນສຽງ 0,5%.
