ຂ່າວຕ່າງປະເທດລາຍງານ ເມື່ອບໍ່ດົນມານີ້, ກະຊວງການຄ້າມຽນມາໄດ້ເປີດເຜີຍບົດລາຍງານການຄ້າສາກົນຂອງມຽນມາ ມີມູນຄ່າຫຼາຍກວ່າ 9,7 ພັນລ້ານໂດລາ ໃນໄລຍະ 3 ເດືອນທຳອິດຂອງສົກປີງົບປະມານ 2023-2024 ເພີ່ມຂຶ້ນຈາກໄລຍະເວລາດຽວກັນໃນສົກປີທີ່ຜ່ານມາ ຊຶ່ງຢູ່ທີ່ຫຼາຍກວ່າ 9,6 ພັນລ້ານໂດລາ.
ບົດລາຍງານລະບຸວ່າ: ມຽນມາ ສາມາດສ້າງລາຍໄດ້ຈາກການສົ່ງອອກຫຼາຍກວ່າ 4,4 ພັນລ້ານໂດລາ ໃນລະຫວ່າງວັນທີ 1 ເມສາ – 14 ກໍລະກົດ 2023 ຂະນະທີ່ການນຳເຂົ້າມີມູນຄ່າຫຼາຍກວ່າ 5,3 ພັນລ້ານໂດລາ. ໃນໄລຍະເວລາດັ່ງກ່າວ, ສິນຄ້າປະດິດຖະກຳເປັນສິນຄ້າສົ່ງອອກທີ່ມີມູນຄ່າສູງທີ່ສຸດດ້ວຍລາຍໄດ້ຫຼາຍກວ່າ 2,6 ພັນລ້ານໂດລາ ຮອງລົງມາຄືສິນຄ້າການກະເສດຄິດເປັນມູນຄ່າ 968,05 ລ້ານໂດລາ. ການຄ້າທາງທະເລຂອງມຽນມາໃນໄລຍະເວລາດັ່ງກ່າວມີມູນຄ່າຫຼາຍກວ່າ 6,6 ພັນລ້ານໂດລາ ຂະນະທີ່ການຄ້າຊາຍແດນມີມູນຄ່າ 3,08 ພັນລ້ານໂດລາ ໂດຍມຽນມາເຮັດການຄ້າຕ່າງປະເທດສ່ວນຫຼາຍຜ່ານເສັ້ນທາງເຮືອ ເນື່ອງຈາກມີແຄມຝັ່ງທາງທະເລຍາວ ແລະ ເຮັດການຄ້າກັບຈີນ, ໄທ, ບັງກລາເທດ ແລະ ອິນເດຍ ເປັນຫຼັກ.
ທັງນີ້, ສິນຄ້າສົ່ງອອກຂອງມຽນມາໄດ້ແກ່ ສິນຄ້າການກະເສດ, ຜະລິດຕະພັນຈາກສັດ, ສິນຄ້າການປະມົງ, ແຮ່ທາດ ແລະ ຜະລິດຕະພັນຈາກປ່າ, ສິນຄ້າປະດິດຖະກຳ ແລະ ອື່ນໆ ຂະນະທີ່ສິນຄ້ານຳເຂົ້າໄດ້ແກ່ ຊັບສິນທຶນທຸກປະເພດ ແລະ ສິນຄ້າອຸປະໂພກບໍລິໂພກ.
