ທ່ານ ພົທ ສຸວອນ ເລືອງບຸນມີ ຮອງປະທານສະພາແຫ່ງຊາດ ປະທານຄະນະມິດຕະພາບລັດຖະສະພາລາວ-ຣັດເຊຍ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມ ແລະ ເຮັດວຽກຢ່າງເປັນທາງການ ຢູ່ນະຄອນຫຼວງມົດສະກູ ສ ຣັດເຊຍ ໃນລະຫວ່າງວັນທີ 20-25 ກໍລະກົດ 2023 ໂດຍການຕ້ອນຮັບ ຂອງທ່ານ ປາເວວ ຕຣາການົບ ປະທານຄະນະມິດຕະພາບລັດຖະສະພາ ຣັດເຊຍ-ລາວ, ສະມາຊິກກໍາມາທິການງົບປະມານ ແລະ ຕະຫຼາດການເງິນ ສະພາສູງ ຣັດເຊຍ.
ໃນການເຄື່ອນໄຫວຢ້ຽມຢາມ ຣັດເຊຍຄັ້ງນີ້ ທ່ານ ພົທ ສຸວອນ ເລືອງບຸນມີ ພ້ອມຄະນະ ໄດ້ພົບປະສອງຝ່າຍ ກັບ ທ່ານ ປາແວວ ທາຣາການົບ ພ້ອມດ້ວຍຄະນະມິດຕະພາບລັດຖະສະພາ ຣັດເຊຍ-ລາວ, ທັງສອງຝ່າຍໄດ້ຕີລາສູງຕໍ່ການພົບປະ ແລະ ຢ້ຽມຢາມໃນຄັ້ງນີ້ ຖືເປັນການສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອທີ່ມີມາແຕ່ດົນນານ ແລະ ຕໍ່ເນື່ອງ ລະຫວ່າງ ສປປ ລາວ ແລະ ສ ຣັດເຊຍ ເວົ້າລວມ, ເວົ້າສະເພາະ ລະຫວ່າງສະພາແຫ່ງຊາດລາວ ແລະ ລັດຖະສະພາຣັດເຊຍ ໃຫ້ແໜ້ນແຟ້ນ ແລະ ນັບມື້ນັບຂະຫຍາຍຕົວຍິ່ງໆຂຶ້ນ ຊຶ່ງຖືເປັນກົນໄກໜຶ່ງເພື່ອຊຸກຍູ້ ແລະ ສົ່ງເສີມການພົວພັນ ແລະ ຮ່ວມມື ຂອງສອງອົງການນິຕິບັນຍັດ ໃຫ້ນັບມື້ນັບເຂົ້າສູ່ລວງເລິກ ແລະ ເປັນຮູບປະທຳຍິ່ງໆຂຶ້ນ ໂດຍສະເພາະແມ່ນການຊຸກຍູ້ ຂະແໜງການເສດຖະກິດຂອງສອງຝ່າຍ ໃຫ້ເພີ່ມທະວີການຮ່ວມມືໃນແຕ່ລະຂົງເຂດທີ່ ທັງສອງຝ່າຍມີທ່າແຮງ ແລະ ມີຄວາມສົນໃຈນຳກັນ.
ໃນການພົບປະຄັ້ງນີ້, ສອງຝ່າຍໄດ້ແຈ້ງສະພາບການໂດຍສັງເຂບ ກ່ຽວກັບການພັດທະນາເສດຖະກິດ-ສັງຄົມ ແລະ ການເຄື່ອນໄຫວ ຂອງອົງການນິຕິບັນຍັດ ໃຫ້ກັນ ແລະ ກັນຊາບ, ພ້ອມນີ້, ສອງຝ່າຍໄດ້ຕີລາສູງການພົວພັນ ແລະ ຮ່ວມມືສອງຝ່າຍ ຂອງອົງການນິຕິບັນຍັດ ແລະ ຂອງສອງຄະນະມິດຕະພາບລັດຖະສະພາລາວ-ຣັດເຊຍ, ຣັດເຊຍ-ລາວ ໃນໄລຍຜ່ານມາ ຊຶ່ງສະແດງອອກໃນການຈັດຕັ້ງປະຕິບັດບັນດາແຜນການຮ່ວມມື, ກົນໄກການຮ່ວມມືຕ່າງໆ ລະຫວ່າງສອງຄະນະມິດຕະພາບ ແລະ ສອງສະພາລາວ-ຣັດເຊຍ ຢ່າງຕັ້ງໜ້າ ແລະ ນັບມື້ນັບເປັນຮູບປະທໍາ ເປັນຕົ້ນການແລກປ່ຽນການຢ້ຽມຢາມ, ແລກປ່ຽນຂໍ້ມູນຂ່າວສານ ແລະ ທັດສະນະຕໍ່ບັນຫາຕ່າງໆ ຂອງພາກພື້ນ ແລະ ສາກົນ, ພ້ອມກັນນີ້ ຍັງໄດ້ເອກະພາບກ່ຽວກັບທິດທາງການຮ່ວມມືໃນຕໍ່ໜ້າອີກດ້ວຍ.
ນອກຈາກນັ້ນ, ທ່ານ ພົທ ສຸວອນ ເລືອງບຸນມີ ພ້ອມດ້ວຍຄະນະ ຍັງໄດ້ພົບປະກັບ ທ່ານ ກັນສະຕານຈິນ ໂກຊາຈົບ ຮອງປະທານສະພາສູງ, ທ່ານ ໂຊບານ ວາເລລີເອວິຈ ຮອງປະທານດູມາ ແຫ່ງ ສ ຣັດເຊຍ, ພົບປະຢ້ຽມຢາມສະມາຄົມມິດຕະພາບ ຣັດເຊຍ-ລາວ ຊຶ່ງທັງສອງຝ່າຍ ໄດ້ຍົກໃຫ້ເຫັນຄວາມ ໝາຍສໍາຄັນ ຂອງສາຍພົວພັນມິດຕະພາບອັນເປັນມູນເຊື້ອ ລະຫວ່າງ ສປປ ລາວ ແລະ ສ ຣັດເຊຍ ກໍຄືຄວາມສະໜິດສະໜົມ ຂອງປະຊາຊົນສອງປະເທດ ທີ່ມີມູນເຊື້ອຊ່ວຍເຫຼືອ ສະໜັບສະໜູນຊຶ່ງກັນ ແລະ ກັນ ເປັນຕົ້ນ ດ້ານການສຶກສາ, ການສ້າງຊັບພະຍາກອນມະນຸດໃນທຸກຂົງເຂດ, ນອກນີ້, ສອງຝ່າຍຍັງໄດ້ສັງເກດຕີລາຄາວ່າ ການພົວພັນທາງດ້ານເສດຖະກິດ, ການຄ້າ ແລະ ການທ່ອງທ່ຽວຍັງບໍ່ຫຼາຍ ຊຶ່ງສອງຝ່າຍຄວນສົ່ງເສີມໃນຕໍ່ໜ້າ.
ຂ່າວ-ພາບ: ສະພາແຫ່ງຊາດ
