ກອງປະຊຸມທາບທາມຄວາມເຊື່ອໝັ້ນໄວ້ວາງໃຈ ຕໍ່ການນຳພາຂອງ ຄະນະບໍລິຫານງານສູນກາງພັກ ກາງສະໄໝທີ XI ຈຸດທາບທາມ ຂົງເຂດວັດທະນະທຳ-ສັງຄົມ ໄດ້ຈັດຂຶ້ນໃນວັນທີ 28 ກໍລະກົດ 2023 ໂດຍການເປັນປະທານຂອງ ສະຫາຍ ຄຳພັນ ພົມມະທັດ ກຳມະການກົມການເມືອງສູນກາງພັກ, ເລຂາທິການສູນກາງພັກ, ເລຂາຄະນະບໍລິຫານງານພັກ, ຄະນະກວດກາສູນກາງພັກ, ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ, ທັງເປັນ ຫົວໜ້າອົງການຕ້ານການສໍ້ລາດບັງຫລວງຂັ້ນສູນກາງ ໂດຍມີ ສະຫາຍ ສອນໄຊ ສີພັນດອນ ກຳມະການກົມການເມືອງສູນກາງພັກ, ນາຍົກລັດຖະມົນຕີ, ມີບັນດາສະຫາຍຮອງນາຍົກລັດຖະມົນຕີ, ລັດຖະມົນຕີ, ຮອງລັດຖະມົນຕີ, ພ້ອມດ້ວຍຄະນະພັກ, ຄະນະນຳ ຈາກ 8 ກະຊວງ ທີ່ກ່ຽວຂ້ອງ ເຂົ້າຮ່ວມ ເພື່ອພ້ອມກັນເບິ່ງ ແລະ ຕີລາຄາຄືນການນໍາພາລວມຂອງຄະນະບໍລິຫານງານສູນກາງພັກ ໃນການຜັນຂະຫຍາຍ ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ແຜນພັດທະນາເສດຖະກິດສັງຄົມແຫ່ງຊາດ 5 ປີ ຄັ້ງທີ IX ກາງສະໄໝຜ່ານມາ ຕໍ່ກັບແຕ່ລະຂົງເຂດວຽກງານ ເປັນຕົ້ນ ວຽກງານ ປກຊ, ປກສ, ວຽກງານພົວພັນຕ່າງປະເທດ, ວຽກງານພັດທະນາເສດຖະກິດ-ສັງຄົມ, ການປັບປຸງລະບົບການເມືອງ, ວຽກງານກໍ່ສ້າງພັກພະນັກງານ, ວຽກງານຕິດຕາມກວດກາ ແລະ ອື່ນໆ ໂດຍຍົກໃຫ້ເຫັນດ້ານຕັ້ງໜ້າ, ດ້ານຫຍໍ້ທໍ້ ຫລື ຈຸດອ່ອນຂໍ້ຄົງຄ້າງ, ສາເຫດທີ່ພາໃຫ້ມີຂໍ້ຄົງຄ້າງ ເພື່ອປັບປຸງແກ້ໄຂໃນຕໍ່ໜ້າ.
ໂອກາດດັ່ງກ່າວ, ສະຫາຍ ຄຳພັນ ພົມມະທັດ ໄດ້ມີຄຳເຫັນວ່າ: ການຈັດໃຫ້ມີການທາບທາມ ຫລື ປະກອບຄໍາເຫັນ ຕໍ່ຄະນະບໍລິຫານງານສູນກາງພັກ ໃນຄັ້ງນີ້, ເປັນການເປີດກວ້າງປະຊາທິປະໄຕພາຍໃນພັກຂອງພວກເຮົາ ເພື່ອໃຫ້ປະກອບຄວາມເຫັນ ຕໍ່ຄວາມຮັບຜິດຊອບລວມ ຂອງຄະນະບໍລິຫານງານສູນກາງພັກ ແລະ ຄວາມຮັບຜິດຊອບໜ້າທີ່ການເມືອງ ຂອງແຕ່ລະສະຫາຍຄະນະບໍລິຫານງານສູນກາງພັກ ແນໃສ່ປັບປຸງພັກ ໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ ແລະ ມີຄວາມເປັນເອກະພາບສູງ ເພື່ອສືບຕໍ່ເປັນຫລັກແຫລ່ງນຳພາປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ໃຫ້ບັນລຸຕາມຄາດໝາຍທີ່ວາງໄວ້. ພ້ອມນີ້, ສະຫາຍຍັງໄດ້ເນັ້ນໃຫ້ຜູ້ເຂົ້າຮ່ວມທັງໝົດ ພ້ອມກັນຄົ້ນຄວ້າ, ມີຄໍາເຫັນຕີລາຄາບັນຫາຕ່າງໆ ທີ່ພົວພັນເຖິງຄຸນລັກສະນະ, ມາດຖານຂອງພະນັກງານນຳພາຄຸ້ມຄອງ (ມາດຖານຂອງສູນກາງພັກ) ເປັນຕົ້ນ ຄຸນທາດການເມືອງ, ຄຸນສົມບັດສິນທຳປະຕິວັດ, ຈັນຍາບັນ, ຄວາມຮັບຜິດຊອບການເມືອງ, ແບບແຜນນຳພາວິທີເຮັດວຽກ, ຄວາມຮູ້ຄວາມສາມາດໃນການປະຕິບັດໜ້າທີ່, ແບບແຜນການດຳລົງຊີວິດ, ຄວາມສັດຊື່ບໍລິສຸດ ຫລື ການສວຍໃຊ້ໜ້າທີ່ຕໍາແໜ່ງບໍ່ຖືກຕ້ອງ, ການພົວພັນໃນສັງຄົມ, ທັດສະນະມະຫາຊົນ, ຄວາມຈິງໃຈຮັບເອົາຄຳຄິດຄຳເຫັນ, ຄຳສະເໜີສົ່ງຂ່າວຂອງໝູ່ຄະນະ, ຂອງສະມາຊິກພັກ, ພະນັກງານລັດຖະກອນ ໃນໄລຍະຜ່ານມາ ແລະ ອື່ນໆ ເຊິ່ງທັງໝົດນັ້ນ ເພື່ອເປັນຂໍ້ມູນໃຫ້ແຕ່ລະສະຫາຍໃນ ຄະນະບໍລິຫານງານສູນກາງພັກ ນຳໄປຄົ້ນຄວ້າ ອັນໃດດີແມ່ນສືບຕໍ່ເສີມຂະຫຍາຍ, ອັນໃດຍັງອ່ອນ ແລະ ຄົງຄ້າງ ກໍສືບຕໍ່ປັບປຸງແກ້ໄຂໃຫ້ໝົດໄປເທື່ອລະກ້າວ.
ສະຫາຍ ຄຳພັນ ພົມມະທັດ ຍັງໄດ້ເນັ້ນຕື່ມວ່າ: ການປະກອບຄໍາເຫັນ ຂອງແຕ່ລະສະຫາຍໃນຄະນະບໍລິຫານງານສູນກາງພັກ ໃຫ້ເບິ່ງ ແລະ ຕີລາຄາຄຸນທາດການເມືອງ, ຄຸນສົມບັດສິນທໍາປະຕິວັດ, ຄວາມຮັບຜິດຊອບ ຕໍ່ໜ້າທີ່ການເມືອງລວມ ຂອງສູນກາງພັກ ກໍຄື ຄວາມຮັບຜິດຊອບໜ້າທີ່ການເມືອງ ທີ່ແຕ່ລະສະຫາຍໄດ້ຮັບມອບໝາຍ, ເບິ່ງຄວາມຮູ້ຄວາມສາມາດ ກໍຄື ຜົນສຳເລັດ ຫລື ບໍ່ສຳເລັດໃນການປະຕິບັດໜ້າທີ່ ທີ່ໄດ້ຮັບມອບໝາຍ (ບໍ່ໄປບໍ່ມາ ຫລື ບໍ່ເຂັ້ມແຂງ, ຊັກຊ້າ, ປະສິດທິຜົນບໍ່ສູງ); ໃຫ້ເບິ່ງແບບແຜນນໍາພາ ແລະ ວິທີເຮັດວຽກ, ການເຄົາລົບ ແລະ ປະຕິບັດຫລັກການນໍາພາ ຂອງພັກ ເປັນຕົ້ນ ຫລັກການລວມສູນປະຊາທິປະໄຕ ຄົ້ນຄວ້າຕົກລົງບັນຫາສຳຄັນຫລໍ່ແຫລມຕ່າງໆເປັນໝູ່ຄະນະ, ໃຫ້ຄວາມສຳຄັນ ຕໍ່ຄຳເຫັນຂອງໝູ່ຄະນະ, ນັບຖືສຽງສ່ວນຫລາຍ ແລະ ອື່ນໆ; ໃຫ້ເບິ່ງແນວຄິດ ແລະ ທັດສະນະ ໃນການຄົ້ນຄວ້າເບິ່ງບັນຫາຕ່າງໆ ມີຄວາມຮອບຄອບ, ເລິກເຊິ່ງ, ພາວະວິໄສ, ແທດເຖິງຕົວຈິງແນວໃດ ຫລື ຜິວເພີນລວມໆ, ບໍ່ແທດກັບຕົວຈິງ, ເບິ່ງທັດສະນະມະຫາຊົນ, ແບບແຜນການດຳລົງຊີວິດ, ການຫລິ້ນກິນຟູມເຟືອຍ, ການພົວພັນໃນຄອບຄົວ ແລະ ສັງຄົມ, ການສໍ້ລາດບັງຫລວງ, ການສວຍໃຊ້ໜ້າທີ່, ສິດອຳນາດ ເພື່ອຜົນປະ ໂຫຍດສ່ວນຕົວ ດ້ວຍທາງກົງ ຫລື ທາງອ້ອມ, ຄວາມເປັນແບບຢ່າງທີ່ດີ, ການຝຶກຝົນຫລໍ່ຫລອມຕົນເອງ ເພື່ອພັດທະນາ ໃຫ້ສົມຄູ່ກັບໜ້າທີ່ການເມືອງທີ່ໄດ້ຮັບການມອບໝາຍ ແລະ ໃຫ້ເບິ່ງຄວາມເອົາໃຈໃສ່ ແລະ ຖືສໍາຄັນຕໍ່ວຽກງານກໍ່ສ້າງພັກ, ພະນັກງານ, ວຽກງານຕິດຕາມ, ກວດກາ, ສະກັດກັ້ນ ແລະ ຕ້ານການສໍ້ລາດບັງຫລວງ ໃນຂະແໜງການ ແລະ ທ້ອງຖິ່ນ ທີ່ຕົນຮັບຜິດຊອບ.
ຂ່າວ: ທະນູທອງ
ພາບ: ອ່າຍຄຳ
