ໄລຍະ 6 ເດືອນຕົ້ນປີ 2023 ນີ້, ດ່ານພາສີສາກົນລະໄລ ໄດ້ເອົາໃຈໃສ່ປະຕິບັດໜ້າທີ່ວຽກງານວິຊາສະເພາະ ເກັບລາຍຮັບເຂົ້າງົບປະມານແຫ່ງລັດຖືກຕ້ອງຄົບຖ້ວນ, ທັນຕາມກຳນົດເວລາ, ເຊິ່ງສາມາດເກັບລາຍຮັບໄດ້ 40,4 ຕື້ກວ່າກີບ ຫລື ເທົ່າກັບ 70,69% ຂອງແຜນການປີ, ຄາດວ່າໝົດປີຈະປະຕິບັດໄດ້ເກີນແຜນການທີ່ວາງໄວ້. ທ່ານ ສຸລັດ ອິນທະວົງ ຫົວໜ້າດ່ານພາສີສາກົນລະໄລ ໃຫ້ສຳພາດເມື່ອບໍ່ດົນນີ້ວ່າ: ດ່ານພາສີສາກົນລະໄລ ຂຶ້ນກັບພາສີປະຈໍາແຂວງສາລະວັນ, ກົມພາສີກະຊວງການເງິນ, ເປັນດ່ານສາກົນໜຶ່ງຕັ້ງຢູ່ເມືອງສະໝ້ວຍແຂວງສາລະວັນ, ມີຊາຍແດນທີ່ຕິດຈອດກັບດ່ານສາກົນລະໄລ ແຂວງກວາງຈິ ສສ ຫວຽດນາມ, ໂດຍລວມແລ້ວ ການນໍາເຂົ້າ-ສົ່ງອອກສິນຄ້າ ຂອງບັນດາຫົວໜ່ວຍທຸລະກິດ ຖ້າທຽບໃສ່ດ່ານສາກົນແຫ່ງອື່ນແມ່ນບໍ່ມີຫລາຍ, ມີແຕ່ບາງບໍລິສັດ ຫລື ບາງບຸກຄົນເທົ່ານັ້ນ ທີ່ມາໃຊ້ບໍລິການຜ່ານດ່ານໃນການນຳເຂົ້າ-ສົ່ງອອກສິນຄ້າ ແລະ ເຄື່ອງຂອງຕ່າງໆ. ໃນປີ 2023ດ່ານພາສີສາກົນລະໄລ ໄດ້ຮັບຕົວເລກແຜນຈັດເກັບລາຍຮັບເຂົ້າງົບປະມານແຫ່ງລັດ ທັງໝົດ 57 ຕື້ກີບ (ລາຍຮັບຕາມຖານຂໍ້ມູນໄດ້ຈາກນ້ຳມັນເຊື້ອໄຟ, ຄ່າທຳນຽມຄົນເຂົ້າ-ອອກ, ຄ່າທໍານຽມພາຫະນະ ແລະ ສິນຄ້າອື່ນໆ), ແຕ່ຜ່ານການຈັດຕັ້ງປະຕິບັດຕົວຈິງໃນ 6 ເດືອນຕົ້ນປີ 2023 ສາມາດຈັດຕັ້ງປະຕິບັດໄດ້ທັງໝົດ 40,4 ຕື້ກວ່າກີບ, ທຽບໃສ່ແຜນການ 6 ເດືອນຕົ້ນປີ ເທົ່າກັບ 114,45%, ຖ້າທຽບໃສ່ແຜນການປີເທົ່າກັບ 70,69% ຖ້າສົມທຽບໃສ່ປີຜ່ານມາເພີ່ມຂຶ້ນ61,60%.
ໃນນັ້ນ, ລາຍຮັບສ່ວນໃຫຍ່ແມ່ນໄດ້ຈາກສິນຄ້າປະເພດນໍ້າມັນເຊື້ອໄຟ, ຄ່າທຳນຽມ-ຄ່າບໍລິການ ແລະ ອື່ນໆ. ທັງນີ້, ກໍຍ້ອນຄະນະດ່ານ ແລະ ເຈົ້າໜ້າທີ່ພາສີທຸກຄົນ ໄດ້ພ້ອມກັນຈັດຕັ້ງປະຕິບັດວຽກງານວິຊາສະເພາະ ດ້ວຍຄວາມຮັບຜິດຊອບສູງ, ປະຕິບັດຕາມລະບຽບກົດໝາຍ, ນິຕິກໍາຂອງຂະແໜງການເງິນ ກໍຄື ກົດໝາຍພາສີຢ່າງເຂັ້ມງວດ, ມີແບບແຜນການນໍາພາ, ວິທີເຮັດວຽກຢ່າງຮັດກຸມ, ສອດຄ່ອງກັບສະພາບຄວາມເປັນຈິງຂອງທ້ອງຖິ່ນ ດ້ວຍການເຮັດໜ້າທີ່ໂຄສະນາເຜີຍແຜ່ລະບຽບຫລັກການປະຕິບັດກົດໝາຍ ແລະ ນິຕິກໍາອື່ນໆຢ່າງເຂັ້ມງວດ, ສ້າງກົນໄກການບໍລິການ, ອຳນວຍຄວາມສະດວກດ້ານພາສີ, ການຄ້າໃຫ້ແກ່ຜູ້ປະກອບການ, ຜູ້ໃຊ້ບໍລິການໄດ້ຢ່າງສະດວກ, ວ່ອງໄວ, ຖືກຕ້ອງເຮັດໃຫ້ການຈັດເກັບລາຍຮັບຂອງດ່ານສາກົນລະໄລ ມີລັກສະນະດີຂຶ້ນເປັນກ້າວໆ.
ນອກນີ້, ຍັງໄດ້ໂຄສະນາເຜີຍແຜ່ກົດໝາຍ, ນິຕິກໍາຕ່າງໆທີ່ກ່ຽວຂ້ອງ ເພື່ອໃຫ້ສັງຄົມ ກໍຄືນັກທຸລະກິດທີ່ມາໃຊ້ບໍລິການໃນການນຳເຂົ້າ-ສົ່ງອອກສິນຄ້າ, ເຄື່ອງຂອງໃຫ້ມີຄວາມເຂົ້າໃຈຢ່າງເລິກເຊິ່ງ ແນໃສ່ຮັບປະກັນໃຫ້ຜູ້ປະກອບການປະຕິບັດລະບຽບຫລັກການ ໃຫ້ຖືກຕ້ອງສອດຄ່ອງ, ສາມາດປະກອບສ່ວນເສຍພັນທະເຂົ້າງົບປະມານຂອງລັດ ໃຫ້ຄົບຖ້ວນທັນຕາມກຳນົດເວລາ.
ທ່ານ ສຸລັດ ອິນທະວົງ ຍັງໃຫ້ຮູ້ອີກວ່າ: ໃນ 6 ເດືອນທ້າຍປີ 2023 ຄາດຄະເນລາຍຮັບບັນລຸໄດ້ຕາມແຜນການ ຫລື ລື່ນແຜນການປີ. ທັງນີ້, ກໍຍ້ອນວ່າເຮົາມີຖາຍລາຍຮັບຈາກການນໍ້າເຂົ້າ ນໍ້າມັນເຊື້ອໄຟ, ຄ່າທຳນຽມຄົນເຂົ້າ-ອອກ, ຄ່າທຳນຽມພາຫະນະ, ເຄື່ອງອຸປະໂພກ ແລະ ບໍລິໂພກ,ສິນຄ້າອື່ນໆ. ພ້ອມດນີ້, ຍັງໄດ້ວາງຫລາຍມາຕະການໃນການຈັດຕັ້ງປະຕິບັດ, ພ້ອມທັງເນັ້ນການບໍລິການ ອຳນວຍຄວາມສະດວກແກ່ຜູ້ປະກອບການ, ປັບປຸງກົນໄກເຮັດວຽກໃຫ້ຖືກຕ້ອງສອດ ຄ່ອງກັບສະພາບແທດເໝາະກັບຄວາມອາດສາມາດ ແລະ ທ່າແຮງທີ່ບົ່ມຊ້ອນໃນແຕ່ລະໄລຍະ,ຮັບປະກັນໃຫ້ແກ່ການຈັດຕັ້ງປະຕິບັດຕໍ່ໜ້າທີ່ວຽກງານຂອງດ່ານ, ເຂັ້ມງວດໃນການກວດກາສິນ ຄ້າ-ເຄື່ອງຂອງພາຍໃນດ່ານ, ຊອກຄົ້ນທ່າແຮງລາຍຮັບບົ່ມຊ້ອນ ແລະ ປະສານສົມທົບກັບເຈົ້າໜ້າທີ່ພາສີ, ເຈົ້າໜ້າທີ່ອາກອນຢູ່ປາຍທາງບ່ອນສິນຄ້ານໍ້າມັນເຊື້ອໄຟລົງສາງ ເພື່ອເຮັດໃຫ້ການຈັດເກັບລາຍຮັບເຂົ້າງົບປະມານສາມາດບັນລຸໄດ້ຕາມລະດັບຄາດໝາຍ.
ຂ່າວ-ພາບ: ກະຊວງການເງິນ
