ກະຊວງກະສິກຳ ແລະ ປ່າໄມ້ ໄດ້ຈັດກອງປະຊຸມທົບທວນຄັ້ງສຸດທ້າຍ ສຳລັບການຈັດຕັ້ງປະຕິບັດໂຄງການພັດທະນາພື້ນຖານໂຄງລ່າງ ດ້ານກະສິກໍາ (ໂຄງການຮ່ວມມື ລາວ-ຮົງກາຣີ ໄລຍະ 3) ຂຶ້ນໃນລະຫວ່າງ ວັນທີ 27-28 ກໍລະກົດ ນີ້ ທີ່ໂຮງແຮມຄຣາວພຣາຊາ ພາຍໃຕ້ການເປັນປະທານຂອງທ່ານ ເພັດ ພົມພິພັກ ລັດຖະມົນຕີກະຊວງກະສິກຳ ແລະ ປ່າໄມ້, ມີພາກສ່ວນທີ່ກ່ຽວຂ້ອງເຂົ້າຮ່ວມ. ກອງປະຊຸມຄັ້ງນີ້ ເພື່ອທົບທວນຄັ້ງສຸດທ້າຍໃນການຈັດຕັ້ງປະຕິບັດໂຄງການພັດທະນາພື້ນຖານໂຄງລ່າງດ້ານກະສິກໍາ (ໂຄງການຮ່ວມມື ລາວ-ຮົງກາຣີ) ພາຍໃຕ້ຂອບສັນຍາເງິນກູ້ຢືມແບບມີເງື່ອນໄຂ, ໄລຍະ 3 ຊຶ່ງຮ່ວມກັນຈັດຕັ້ງປະຕິບັດໂຄງການໂດຍ ກະຊວງກະສິກຳ ແລະ ປ່າໄມ້ ສປປ ລາວ ແລະ ບໍລິສັດ ວິຕາຟອດ ອາໂກຣເອເຊຍຂອງຮົງກາຣີ.
ທ່ານ ເພັດ ພົມພິພັກ ກ່າວວ່າ: ສ ຮົງກາຣີ ໄດ້ຊ່ວຍເຫຼືອ ສປປ ລາວ 3 ໄລຍະຄື: ໂຄງການພັດທະນາການລ້ຽງສັດ ແລະ ປາ ລາວ-ຮົງກາຣີ ໄລຍະ 1 ທີ່ມີມູນຄ່າ 8,6 ລ້ານໂດລາ ແລະ ໂຄງການລ້ຽງສັດ ແລະ ປາ ລາວ-ຮົງກາຣີ ໄລຍະ 2 ທີ່ມີມູນຄ່າ 30 ລ້ານໂດລາ ທີ່ໄດ້ຈັດຕັ້ງປະຕິບັດໄປແລ້ວນັ້ນແມ່ນໄດ້ປະກອບສ່ວນຢ່າງໃຫຍ່ຫຼວງ ໃຫ້ແກ່ການພັດທະນາລະບົບການຜະລິດ, ການປຸງແຕ່ງ ແລະ ການຄຸ້ມຄອງຄວາມປອດໄພທາງດ້ານອາຫານ ລວມທັງການຍົກລະດັບຄຸນນະພາບ ແລະ ມາດຕະຖານສິນຄ້າ ພືດ, ສັດ ແລະ ສັດນໍ້າຂອງ ສປປ ລາວ ໄດ້ໃນລະດັບໜຶ່ງ.
ສ່ວນໂຄງການໄລຍະທີ 3 ຊຶ່ງມີມູນຄ່າ 35 ລ້ານໂດລາ, ໂຄງການທີ່ໄດ້ຂະຫຍາຍໄປສູ່ 7 ແຂວງ ໃນພາກກາງ ແລະ ພາກເໜືອຂອງ ສປປ ລາວ ແລະ ເປັນໂຄງການ ທີ່ມີກິດຈະກຳຢ່າງຮອບດ້ານທີ່ມີເຖິງ 8 ອົງປະກອບ ເຊັ່ນ: (1). ການປັບປຸງລະບົບການຄຸ້ມຄອງດິນເພື່ອຮັກສາລະບົບນິເວດຂອງດິນ; (2). ການພັດທະນາລະບົບຟາມປູກພືດ; (3). ການປັບປຸງການຄຸ້ມຄອງ ແລະ ນໍາໃຊ້ນໍ້າ; (4). ການພັດທະນາການລ້ຽງງົວ; (5). ການພັດທະນາການລ້ຽງສັດນໍ້າ, (6). ການນໍາໃຊ້ເຕັກໂນໂລຊີ ຫຼັງເກັບກ່ຽວ; (7). ສືບຕໍ່ປັບປຸງລະບົບການຄຸ້ມຄອງຄວາມປອດໄພຂອງອາຫານ ແລະ (ການພັດທະນາຊັບພະຍາກອນມະນຸດຊຶ່ງໃນແຕ່ລະອົງປະກອບ ລ້ວນແຕ່ມີຄວາມສຳຄັນຫຼາຍຕໍ່ການພັດທະນາກະສິກຳ ໂດຍສະເພາະແມ່ນໃນໄລຍະໃໝ່ ກໍຄືການຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໂດຍສະເພາະແມ່ນການຊຸກຍູ້ສົົ່ງເສີມການຜະລິດກະສິກໍາເປັນສິນຄ້າທົດແທນການນໍາເຂົ້າເພື່ອຫຼຸດຜ່ອນການໄຫຼອອກເງິນຕາໄປຕ່າງປະເທດ ແລະ ຊຸກຍູ້ການຜະລິດກະສິກໍາຕິດພັນກັບການປຸງແຕ່ງເປັນສິນຄ້າສົ່ງອອກ ເພື່ອສ້າງລາຍຮັບທີ່ແຂງແຮງ.
ເພື່ອຈັດຕັ້ງປະຕິບັດໂຄງການໃຫ້ສອດຄ່ອງກັບແນວທາງການພັດທະນາໃນໄລຍະໃໝ່, ທ່ານລັດຖະມົນຕີກະຊວງກະສິກໍາ ແລະ ປ່າໄມ້ ກ່າວເນັ້ນວ່າ: ໃຫ້ຄະນະຈັດຕັ້ງປະຕິບັດໂຄງການທັງຝ່າຍລາວ ແລະ ຮົງກາຣີກວດກາ ແລະ ປະເມີນຜົນບັນດາກິດຈະກຳຕ່າງໆທີ່ໄດ້ວາງໄວ້, ອັນໃດທີ່ສຳເລັດແລ້ວໃຫ້ສືບຕໍ່ປົກປັກຮັກສາ ຄຸ້ມຄອງໃຫ້ດີ ເພື່ອໃຫ້ມີຄວາມຍືນຍົງ, ສາມາດດໍາເນີນວຽກງານດັ່ງກ່າວໄດ້ຢ່າງຕໍ່ເນື່ອງ; ໃຫ້ທົບທວນຄືນບັນດາກິດຈະກຳຕ່າງໆທີ່ໄດ້ວາງແຜນໄວ້ເບື້ອງຕົ້ນ ອັນໃດທີ່ຍັງບໍ່ທັນໄດ້ສຳເລັດກໍໃຫ້ຮີບຮ້ອນສຸມໃສ່ໜ້າວຽກດັ່ງກ່າວໃຫ້ສຳເລັດ ແລະ ທ່ວງທັນກັບເວລາທີ່ກຳນົດໄວ້; ໃຫ້ສຸມໃສ່ການສ້າງຕົວແບບການຖ່າຍທອດເຕັກໂນໂລຊີທີ່ທັນສະໄໝເຂົ້າສູ່ຂະບວນການຜະລິດ, ປຸງແຕ່ງ, ຈໍລະຈອນແຈກຢາຍ ແລະ ຈຳໜ່າຍທີ່ມີຄຸນນະພາບ, ມີຈຸດສຸມ ແລະ ຍືນຍົງກວ່າເກົ່າ, ຫັນເອົາການຜະລິດ ແລະ ປຸງແຕ່ງ ຕ້ອງຕິດພັນກັບການພັດທະນາຕະຫຼາດ, ການຍົກສູງລາຍຮັບ ແລະ ຊີວິດການເປັນຢູ່ຂອງຊາວກະສິກອນໃຫ້ສູງຂຶ້ນ.
