ກອງປະຊຸມຄົບຄະນະກາງສະໄໝ ຄັ້ງທີ II ຂອງຄະນະບໍລິຫານງານພັກ ອົງການກວດສອບແຫ່ງລັດ ໄດ້ຈັດຂຶ້ນ ໃນລະຫວ່າງວັນທີ 19-21 ກໍລະກົດ ນີ້ ທີ່ ອົງການກວດສອບແຫ່ງລັດ, ໂດຍພາຍໃຕ້ການເປັນປະທານຂອງ ສະຫາຍ ນາງ ສູນທອນ ໄຊຍະຈັກ ຄະນະເລຂາທິການສູນກາງພັກ ຮອງປະທານສະພາແຫ່ງຊາດ, ມີສະຫາຍ ວຽງທະວິສອນ ເທບພະຈັນ ກຳມະການສຳຮອງສູນກາງພັກເລຂາຄະນະບໍລິຫານງານພັກ ປະທານອົງການກວດສອບແຫ່ງລັດ, ມີຮອງເລຂາຄະນະພັກ, ຮອງປະທານອົງການກວດສອບແຫ່ງລັດ, ຄະນະບໍລິຫານງານພັກ, ເລຂາໜ່ວຍພັກ ແລະ ພາກສ່ວນກ່ຽວຂ້ອງເຂົ້າຮ່ວມ.
ສະຫາຍ ວຽງທະວິສອນ ເທບພະຈັນ ກ່າວວ່າ: ກອງປະຊຸມຄັ້ງນີ້ ເປັນເຫດການທາງດ້ານການເມືອງທີ່ສໍາຄັນ ແລະ ທັງເປັນຂີດໝາຍແຫ່ງການເຕີບໃຫຍ່ຂະຫຍາຍຕົວຂອງຄະນະພັກ, ສະມາຊິກພັກຂອງອົງການກວດສອບແຫ່ງລັດໃນການປະເມີນການປະຕິບັດໜ້າທີ່ການເມືອງຂອງພັກໃນໄລຍະຜ່ານມາ ກໍຄືທິດທາງແຜນການໃນການຈັດຕັ້ງປະຕິບັດໃນຕໍ່ໜ້າ.
ຕະຫຼອດໄລຍະ 2 ປີເຄິ່ງຜ່ານມາ (2021 2023) ພາຍໃຕ້ການນຳພາ-ຊີ້ນຳຂອງຄະນະບໍລິຫານງານພັກ ອົງການກວດສອບແຫ່ງລັດ, ບັນດາສະຫາຍໃນຄະນະປະຈຳພັກ, ກຳມະການຄະນະພັກ, ຄະນະໜ່ວຍພັກ, ບັນດາກົມ, ຫ້ອງການ, ສະຖາບັນຄົ້ນຄວ້າ ແລະ ຝຶກອົບຮົມວຽກງານກວດ ສອບ, ບັນດາ 3 ອົງການຈັດຕັ້ງມະຫາຊົນ ອົງການກວດສອບແຫ່ງລັດ ຕະຫຼອດຮອດສະມາຊິກພັກ, ພະນັກງານຂອງອົງການກວດສອບແຕ່ລະຂັ້ນ ໄດ້ເອົາໃຈໃສ່ຈັດຕັ້ງຜັນຂະຫຍາຍເນື້ອໃນມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ຄັ້ງທີ II ຂອງຄະນະບໍລິຫານງານພັກອົງການກວດສອບແຫ່ງລັດ ກໍຄືແຜນພັດທະນາວຽກງານກວດສອບ 5 ປີ ຄັ້ງທີ II. ການຈັດຕັ້ງອົງການກວດສອບແຫ່ງລັດ ໄດ້ຮັບການປັບປຸງ ແລະ ເຕີບໃຫຍ່ເຂັ້ມແຂງຂຶ້ນ, ບຸກຄະລາກອນມີຄວາມໜັກແໜ້ນ, ການເຄື່ອນໄຫວວຽກງານກວດສອບໃນໄລຍະຜ່ານມາ ເຫັນວ່າສະມາຊິກພັກ-ພະນັກງານແມ່ນປະຕິບັດຕາມຈັນຍາບັນນັກກວດສອບ ມີຄວາມໂປ່ງໄສ, ຖືກຕ້ອງ ແລະ ຮັບປະກັນ ຊຶ່ງຜ່ານການຈັດຕັ້ງປະຕິບັດໜ້າທີ່ວຽກງານການເມືອງທີ່ພັກ-ລັດ ມອບໝາຍໃຫ້ນັ້ນ ຈຶ່ງເຮັດໃຫ້ອົງການກວດສອບແຫ່ງລັດ ກໍຄືຄວາມເຊື່ອໝັ້ນໄວ້ວາງໃຈຈາກການນຳພັກ-ລັດ, ປະຊາຊົນບັນດາເຜົ່າ ແລະ ໄດ້ຮັບຄວາມເຄົາລົບ, ເຊື່ອຖືຈາກສັງຄົມ ນັບມື້ນັບສູງຂຶ້ນເລື້ອຍໆ.
ສະຫາຍເລຂາຄະນະພັກອົງການກວດສອບແຫ່ງລັດ ຍັງໄດ້ຮຽກຮ້ອງໃຫ້ບັນດາສະຫາຍສະມາຊິກ ຈົ່ງພ້ອມພາກັນຄົ້ນຄວ້າ, ຕີລາຄາຢ່າງພາວະວິໃສຕໍ່ຜົນງານ, ຜົນສໍາເລັດໃນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ II ຂອງຄະນະບໍລິຫານງານພັກອົງການກວດສອບແຫ່ງລັດໃນໄລຍະ 2 ປີເຄິ່ງຜ່ານມາ, ຕີລາຄາ ແລະ ຮັບຮູ້ເປັນເອກະພາບຕໍ່ດ້ານອ່ອນ, ຂໍ້ຄົງຄ້າງ, ສະພາບການນຳພາຊີ້ນຳລວມຂອງຄະນະບໍລິຫານງານພັກຜ່ານມາ ແລະ ຄົ້ນຄວ້າແລກປ່ຽນປະກອບຄຳຄິດຄຳເຫັນໃສ່ຮ່າງບົດສະຫຼຸບການນຳພາ-ຊີ້ນຳລວມການປະຕິບັດມະຕິກອງປະຊຸມໃຫຍ່ຂອງຄະນະບໍລິຫານງານພັກອົງການກວດສອບແຫ່ງລັດ ຄັ້ງທີ II ໃນໄລຍະ 2 ປີເຄິ່ງຜ່ານມາ ແລະ ການວາງທິດທາງແຜນການເຄື່ອນໄຫວຄາດໝາຍສູ້ຊົນໃນໄລຍະທ້າຍສະໄໝ (2023-2025) ຂອງຄະນະບໍລິຫານງານພັກໃນຕໍ່ໜ້າ, ພ້ອມທັງກຳນົດມາດຕະການ, ວິທີປັບປຸງ, ແກ້ໄຂທີ່ເປັນຍຸດທະສາດການພັດທະນາວຽກງານອົງການກວດສອບແຫ່ງລັດ, ພ້ອມນັ້ນ ກອງປະຊຸມຍັງມີການປ່ອນບັດທາບທາມຄວາມເຊື່ອໝັ້ນໄວ້ວາງໃຈຕໍ່ການນຳພາ ຊີ້ນຳໃນການປະຕິບັດໜ້າທີ່ວຽກງານຂອງຄະນະບໍລິຫານງານພັກ ເພື່ອເສີມຂະຫຍາຍດ້ານດີ, ປັບປຸງ, ແກ້ໄຂດ້ານອ່ອນ, ຂໍ້ຄົງຄ້າງ ໃນການສືບຕໍ່ນຳພາ-ຊີ້ນຳການປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ ກໍຄືມະຕິກອງປະຊຸມໃຫຍ່ຄັ້ງທີ II ຂອງຄະນະບໍລິຫານງານພັກອົງການກວດສອບແຫ່ງລັດ ໃນທ້າຍສະໄໝ ແລະ ແຜນພັດທະນາວຽກງານກວດສອບ 6 ປີ ຄັ້ງທີ II ໃຫ້ປະກົດຜົນເປັນຈິງ ແລະ ມີຜົນສຳເລັດຢ່າງຮອບດ້ານ.
ສະຫາຍ ນາງ ສູນທອນ ໄຊຍະຈັກ ໄດ້ໂອ້ລົມ ໂດຍໄດ້ນັ້ນໃຫ້ອົງຄະນະພັກອົງການກວດສອບແຫ່ງລັດ ເອົາໃຈໃສ່ບາງບັນຫາດັ່ງນີ້: 1. ໃຫ້ບັນດາສະຫາຍສືບຕໍ່ຍູ້ແຮງການຈັດຕັ້ງຜັນຂະຫຍາຍຜົນສຳເລັດວຽກງານການເມືອງ ແນວຄິດທົ່ວປະເທດຄັ້ງທີ V, ຖືເອົາວຽກງານການເມືອງແນວຄິດປຽບ ເໝືອນສະໜາມຮົບໜຶ່ງໂດຍເລີ່ມຈາກຫັນປ່ຽນດ້ານທັດສະນະແນວຄິດ, ຈິນຕະນາການ ລະຫວ່າງ ອັນຖືກອັນຜິດ, ຫັນວິທີຄິດແບບເກົ່າ ໄປສູ່ການຄົ້ນຄິດ, ການປະດິດສ້າງໃໝ່, ແຂ່ງຂັນກັນພັດທະນາໃຫ້ເປັນການກະທຳຕົວຈິງ ຢູ່ໃນຕົວບຸກຄົນ ຫຼື ໝູ່ຄະນະ, ສະມາຊິກພັກ ພະນັກງານທຸກສະຫາຍ ຕ້ອງ ເອົາໃຈໃສ່ຝຶກຝົນຫຼໍ່ຫຼອມຕົນເອງທາງດ້ານຄຸນທາດການເມືອງ, ຄຸນສົມບັດສິນທຳປະຕິວັດ, ມີຄວາມເສຍສະຫຼະ, ຄວາມຈົ່ງຮັກພັກດີຕໍ່ພັກ, ຕໍ່ປະເທດຊາດໃຫ້ສູງຂຶ້ນ; 2. ບົນພື້ນຖານຂອງຜົນສໍາເລັດໃນກອງປະຊຸມທາບທາມຄວາມໄວ້ວາງໃຈ ແລະ ຜົນການດໍາເນີນຊີວິດການເມືອງພາຍໃນ, ໃຫ້ຄະນະບໍລິຫານງານພັກອົງການກວດສອບແຫ່ງລັດ ເພີ່ມທະວີການນຳພາຂອງຄະນະພັກ ສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງ; 3. ເພີ່ມທະວີວຽກງານປັບປຸງ, ກໍ່ສ້າງໜ່ວຍພັກ ປອດໃສ, ເຂັ້ມແຂງ ແລະ ໜັກແໜ້ນ ໃຫ້ບັນລຸຕາມຄາດໝາຍ ທີ່ໄດ້ວາງໄວ້; 4. ສືບຕໍ່ເອົາໃຈໃສ່ສ້າງ ແລະ ປັບປຸງກົດ ໝາຍ ແລະ ນິຕິກໍາລຸ່ມກົດໝາຍ ໃຫ້ເປັນລະບົບຄົບຖ້ວນ ເພື່ອເປັນບ່ອນອີງ ແລະ ເປັນເຄື່ອງມືໃນການເຄື່ອນໄຫວປະຕິບັດພາລະບົດບາດ ແລະ ໜ້າທີ່ ຂອງອົງການກວດສອບແຫ່ງລັດ ຕາມກົດໝາຍກໍານົດ; ພ້ອມກັນນັ້ນ, ກໍໃຫ້ເອົາໃຈໃສ່ໂຄສະນາ, ເຜີຍແຜ່ກົດໝາຍ ແລະ ນິຕິກຳກ່ຽວກັບ ວຽກງານກວດ ສອບແຫ່ງລັດ ເພື່ອສ້າງຄວາມຮັບຮູ້ເຂົ້າໃຈ, ສະຕິເຄົາລົບ ແລະ ການເຂົ້າຮ່ວມປະຕິບັດຢ່າງເຂັ້ມງວດ ໃນທົ່ວອົງການ ພັກ-ລັດ ແລະ ທົ່ວສັງຄົມ; 5. ເອົາໃຈໃສ່ ປັບປຸງກົງຈັກການຈັດຕັ້ງຕາມທິດກະທັດຮັດ, ສົມເຫດສົມຜົນ, ໂປ່ງໃສ, ເຂັ້ມແຂງ ຕິດພັນກັບ ການນຳພາ-ຊີ້ນຳປັບປຸງ ແລະ ຍົກລະດັບການເຄື່ອນໄຫວວຽກງານກວດສອບໃຫ້ມີຄຸນນະພາບສູງກວ່າເກົ່າ; 6. ເອົາໃຈໃສ່ນຳພາເຄື່ອນໄຫວວຽກງານກວດສອບການຈັດຕັ້ງຜັນຂະຫຍາຍແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ໃນໄລຍະທ້າຍສະໄໝ ຕໍ່ບັນດາກະຊວງ, ອົງການຂັ້ນສູນກາງ ແລະ ທ້ອງຖິ່ນ; 7. ເອົາໃຈໃສ່ປະສານສົມທົບກັບພາກສ່ວນກ່ຽວຂ້ອງ ໂດຍສະເພາະຄະນະກວດກາສູນກາງພັກ ກໍຄືອົງການກວດກາແຫ່ງລັດ ແລະ ພາກສ່ວນຕ່າງໆໃຫ້ເປັນປົກກະຕິ; 8. ຍົກສູງບົດບາດ ອົງການຈັດຕັ້ງມະຫາຊົນ ໃຫ້ເປັນກຳລັງແຮງໃຫ້ແກ່ຄະນະພັກແຕ່ລະຂັ້ນ; 3 ອົງການຈັດຕັ້ງມະຫາຊົນຕ້ອງຫັນປ່ຽນການເຄື່ອນໄຫວຂອງຕົນ ຈາກຮູບການໄປສູ່ເນື້ອໃນ ແລະ ໝາກຜົນທີ່ເປັນຮູບປະທຳ; ແລະ 9. ປັບປຸງຍົກລະດັບ ແລະ ຫັນເປັນທັນສະໄໝ ການບໍລິຫານຄຸ້ມຄອງ ແລະ ເຄື່ອນໄຫວວຽກງານກວດສອບ ເພື່ອໃຫ້ທັນກັບທ່າອຽງຂອງຍຸກສະໄໝ ແລະ ສືບຕໍ່ເສີມຂະຫຍາຍຍາດການຮ່ວມມືສາກົນ ບົນພື້ນຖານແນວທາງນະໂຍບາຍຂອງພັກ.
(ຂ່າວ: ອົງການກວດສອບແຫ່ງລັດ, ພາບ: ສຳນານ)
