ທ່ານ ຈັນທະວີ ພັນນາມວົງ ຜູ້ອຳນວຍການ ບໍລິສັດ ທ່ອງທ່ອງທ່ຽວມັງການລາວ ໄດ້ໃຫ້ສຳພາດໃນໂອກາດສື່ມວນຊົນລາວ-ຈີນ ຈັດກິດຈະກຳ ສຳພາດຕາມເສັ້ນທາງລົດໄຟລາວ-ຈີນ ພາຍໃຕ້ຫົວຂໍ້” ໝູ່ເພື່ອນ ໜຶ່ງແລວໜຶ່ງເສັ້ນທາງ” ເມື່ອບໍ່ດົນຜ່ານມາວ່າ: ບໍລິສັດທ່ອງທ່ຽວມັງກອນລາວ ໄດ້ສ້າງຕັ້ງຂຶ້ນໃນປີ 2009, ໂດຍມີຫ້ອງການຕັ້ງຢູ່ບ້ານໜອງດ້ວງໃຕ້ (ໃກ້ຕະຫຼາດໜອງດ້ວງ) ເມືອງສີໂຄດຕະບອງ ນະຄອນຫຼວງວຽງຈັນ, ເຮັດໜ້າທີ່ ເນັ້ນບໍລິການນໍາສົ່ງນັກທ່ອງທ່ຽວຈີນເຂົ້າມາທ່ຽວລາວ ແລະ ນໍາສົ່ງນັກທ່ອງທ່ຽວລາວອອກທ່ຽວຕ່າງປະເທດ, ປັດຈຸບັນ ມີພະນັກງານທັງໝົດ 9 ຄົນ, ພະນັກງານຫ້ອງການມີ 6 ຄົນ, ມີພະນັກງານນໍາທ່ຽວຢູ່ນະຄອນຫຼວງວຽງຈັນ 1 ຄົນ, ປະຈໍາຢູ່ແຂວງຫຼວງພະບາງ 2 ຄົນ, ໃນໄລຍະປີ 2016-2018 ມີນັກທ່ອງທ່ຽວຈີນເຂົ້າມາທ່ຽວລາວເປັນຈໍານວນຫຼາຍ ໂດຍສະເພາະໃນປີ 2018 ມີນັກທ່ອງທ່ຽວຈີນ ເຂົ້າມາທ່ຽວລາວເຖິງ 700-800 ຄົນ, ມາຮອດທ້າຍປີ 2019 ຍ້ອນມີການລະບາດພະຍາດໂຄວິດ-19 ທາງບໍລິສັດໄດ້ປິດຮັບນັກທ່ອງທ່ຽວຊົ່ວຄາວ ແລະ ນັບແຕ່ເປີດນຳໃຊ້ເສັ້ນທາງລົດໄຟລາວ-ຈີນ ບໍລິສັດຈຶ່ງໄດ້ເປີດທະບຽນຄືນໃໝ່ ເພື່ອເປີດບໍລິການຮັບນັກທ່ອງທ່ຽວຈີນຄືນ, ໃນມັງກອນ 2023 ບໍລິສັດມັງກອນລາວ ຍັງໄດ້ຮັບບໍລິສັດທ່ອງທ່ຽວຈີນມາສຳຫຼວດພື້ນທີ່ຢູ່ລາວ, ໄທ ຊຶ່ງເດີນທາງໄປ-ກັບດ້ວຍລົດໄຟລາວ-ຈີນ ຊຶ່ງມີ 60 ບໍລິສັດ ແລະ ມາຮອດ 6 ເດີືອນຕົ້ນປີ 2023 ມີນັກທ່ອງທ່ຽວຈີນເຂົ້າມາທ່ຽວ ປະມານ 200 ຄົນ ຊຶ່ງເຫັນໄດ້ວ່າ ນັບແຕ່ເປີດເສັ້ນທາງລົດໄຟລາວ-ຈີນ ເຮັດໃຫ້ນັກທ່ອງທ່ຽວຈີນເຂົ້າມາທ່ອງທ່ຽວລາວເປັນຈຳນວນຫຼາຍນັບມື້ເພີ່ມຂຶ້ນ.
ສະນັ້ນ, ຍ້ອນພະນັກງານນໍາທ່ຽວຂອງບໍລິສັດມີໜ້ອຍເຮັດໃຫ້ຮັບນັກທ່ຽວທ່ຽວບໍ່ທັນ ຈຶ່ງໄດ້ຫາວິທີແກ້ໄຂຄື: ຖ້າເປັນຄະນະມີນັກທ່ອງທ່ຽວໜ້ອຍຈະບໍ່ມີພະນັກງານນຳທ່ຽວ ແຕ່ຈະໃຊ້ພະນັກງານທີ່ໄດ້ພາສາຈີນຕິດຕາມໃນການເດີນທາງໄປ-ມານຳ. ພ້ອມນັ້ນ, ເມື່ອຮອດໄລຍະເດືອນ 9 ຫາ ເດືອນ 10 ຂອງທຸກໆປີ, ຈະມີນັກທ່ອງທ່ຽວເລີ່ມເຂົ້າມາທ່ອງທ່ຽວເພີ່ມຂຶ້ນ. ສ່ວນໄລຍະລະດູຝົນນັກທ່ອງທ່ຽວຈະຫຼຸດລົງ ຊຶ່ງທາງບໍລິສັດທ່ອງທ່ຽວມັງກອນລາວ ຈະພະຍາຍາມຈັດກິດຈະກໍາໃຫ້ນັກຮຽນຈີນລະດັບອາຍຸ 6 ປີ ຫາ 12 ປີ ເຂົ້າມາທັດສະນະສຶກສາຢູ່ລາວໃນທ້າຍເດືອນກໍລະກົດ ປີ 2023 ນີ້, ໂດຍເນັ້ນທັດສະນະສຶກສາຕາມແຫຼ່ງທ່ອງທ່ຽວວັດທະນະທຳ, ທ່ອງທ່ຽວເບິ່ງວິຖີຊີວິດ ການເຮັດອາຫານລາວ, ແຈກຂອງຫຼິ້ນໃຫ້ເດັກນ້ອຍຫ່າງໄກສອກຫຼີກ ແລະ ອື່ນໆ ໂດຍສະເພາະຢູ່ເຂດວັງວຽງ, ແຂວງຫຼວງພະບາງ.
ທ່ານ ຈັນທະວີ ພັນນາມວົງ ກ່າວຕື່ມວ່າ: ປັດຈຸບັນວຽກງານທ່ອງທ່ຽວຂອງບໍລິສັດທ່ອງທ່ຽວມັງກອນລາວ ຍັງເປັນສິ່ງທ້າທາຍຫຼາຍເຊັ່ນ: ພະນັກງານນຳທ່ຽວຍັງມີຈຳກັດ, ມີໜ້ອຍ, ບໍລິສັດທ່ອງທ່ຽວນັບມື້ນັບຫຼາຍ. ສະນັ້ນ, ເພື່ອຮັບປະກັນທັງປະລິມານ ແລະ ຄຸນນະພາບໃນແຕ່ລະປີ ທາງບໍລິສັດຈະສົ່ງພະນັກງານນຳທ່ຽວ ເຂົ້າຝຶກອົບຮົມພະນັກງານນຳທ່ຽວ ກັບ ຫ້ອງການທ່ອງທ່ຽວທີ່ກ່ຽວຂ້ອງ, ຖ້າພະນັກງານນຳທ່ຽວບໍລິສັດບໍ່ມີເວລາເຂົ້າຮ່ວມກໍຈະຝຶກຢູ່ພາຍໃນໃຫ້ກັນເອງ, ໃນນັ້ນ, ຖ້ານັກທ່ອງທ່ຽວເຂົ້າມາທ່ອງທ່ຽວຫຼາຍກໍຈະໄດ້ຂໍໃບອານຸຍາດຈາກພາກສ່ວນກ່ຽວຂ້ອງເພື່ອຮັບແຕ່ລະຄະນະ ແລະ ເພື່ອຮອງຮັບນັກທ່ອງທ່ຽວຈະຕ້ອງມີພະນັກງານນຳທ່ຽວປະຈຳຢູ່ນະຄອນຫຼວງວຽງຈັນ 2 ຄົນ, ແຂວງຫຼວງພະບາງ 2 ຄົນ ແລະ ພະນັກງານນຳທ່ຽວຈາກບໍລິສັດອື່ນ ເພື່ອຮອງຮັບນັກທ່ອງທ່ຽວທີ່ເຂົ້າມາທ່ຽວລາວໃຫ້ໄດ້ເປັນຢ່າງດີ.
ໂດຍ: ວັນເພັງ
