ໃນວັນທີ 17-18 ກໍລະກົດ ຜ່ານມາ, ນັກຄົ້ນຄວ້າ (ນັກສຶກສາ) ປະລິນຍາໂທ ຮຸ່ນທີ 18 ສາຂາ ການປົກຄອງ ຂອງສະຖາບັນການເມືອງ ແລະ ການປົກຄອງແຫ່ງຊາດ ຈໍານວນ 25 ທ່ານ ຍິງ 7 ທ່ານ ໄດ້ທັດສະນະສຶກສາຢູ່ຫໍສະພາແຫ່ງຊາດ ນໍາພາໂດຍ ອາຈານ ສັນຍາລັກ ແກ້ວຄໍາຮຸ່ງ ຜູ້ຊ່ວຍຄູປະຈໍາຫ້ອງ.
ທ່ານ ທອງແກ້ວ ສິດທິພົງ ຫົວໜ້າຫ້ອງຮຽນ ສາຂາການປົກຄອງ ໄດ້ໃຫ້ຮູ້ວ່າ: ການທັດສະນະສຶກສາຢູ່ຫໍສະພາແຫ່ງຊາດ ແມ່ນປະຕິບັດຕາມແຜນການຮຽນ-ການສອນ ຂອງສະຖາບັນການເມືອງ ແລະ ການປົກຄອງແຫ່ງຊາດ ກໍຄື ຄະນະບໍລິຫານສາດ ວາງອອກ ຫຼັງຈາກທີ່ນັກຄົ້ນຄວ້າ ໄດ້ຮຽນຮູ້ດ້ານທິດສະດີ ຈະຕ້ອງໄດ້ລົງທັດສະນະສຶກສາໃນພາກຕົວຈິງນໍາອີກ.
ການເຄື່ອນໄຫວທັດສະນະສຶກສາ ຢູ່ຫໍສະພາແຫ່ງຊາດ ນັກຄົ້ນຄວ້າໄດ້ເຂົ້າຮ່ວມຮັບຊົມ, ຮັບຟັງ ການດໍາເນີນກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ໃນວາລະພິຈາລະນາຮັບຮອງເອົາກົດໝາຍ ຈໍານວນ 10 ສະບັບ, ໃນນີ້ ກົດໝາຍສ້າງໃໝ່ 4 ສະບັບ ແລະ ກົດໝາຍ ປັບປຸງ 6 ສະບັບ. ພ້ອມກັນນັ້ນ, ກໍຍັງໄດ້ຢ້ຽມຊົມຫໍປະຊຸມສະພາ, ຫໍວາງສະແດງມູນເຊື້ອ, ຫໍສະໝຸດ ຂອງສະພາແຫ່ງຊາດ ເພື່ອສຶກສາຮຽນຮູ້ ປະຫວັດສາດການກຳເນີດ, ການເຕີບໃຫຍ່ຂະຫຍາຍຕົວ ແລະ ຜົນງານການເຄື່ອນໄຫວຂອງສະພາແຫ່ງຊາດ ໃນແຕ່ລະໄລຍະ ໃນການປະຕິບັດພາລະບົດບາດ ສະພາແຫ່ງຊາດ ແມ່ນອົງການຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ.
ໃນໂອກາດດັ່ງກ່າວ, ທ່ານ ໝໍສະຫວັດ ເພັດມະນີ ນັກຄົ້ນຄວ້າປະລິນຍາໂທ ຮຸ່ນທີ 18 ສາຂາການປົກຄອງ ໄດ້ສະແດງຄວາມຮູ້ສຶກຂອງຕົນເອງວ່າ: ຂ້າພະເຈົ້າມີຄວາມຮູ້ສຶກພາກພູມໃຈຫຼາຍ ທີ່ໄດ້ມາທັດສະນະສຶກສາ ແລະ ໄດ້ເຂົ້າຮ່ວມຮັບຊົມ, ຮັບຟັງການດໍາເນີນກອງປະຊຸມສະພາແຫ່ງຊາດ ທີ່ມີຄວາມໝາຍ, ຄວາມສໍາຄັນ ໂດຍສະເພາະແມ່ນ ການພິຈາລະນາ ຮັບຮອງເອົາກົດໝາຍ ຊຶ່ງໄດ້ສະແດງເຖິງຄວາມເປັນຫ່ວງເປັນໃຍຂອງພັກ-ລັດ ກໍຄື ສະພາແຫ່ງຊາດ ຕໍ່ປະຊາຊົນລາວບັນດາເຜົ່າ ໃນການນໍາເອົາກົດໝາຍໄປຈັດຕັ້ງປະຕິບັດຢ່າງເຂັ້ມງວດ ຮັບປະກັນການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ແນໃສ່ປົກປັກຮັກສາ ແລະ ພັດທະນາປະເທດຊາດ ກ້າວຂຶ້ນສູ່ຈຸດໝາຍສັງຄົມນິຍົມ.
ການທັດສະນະສຶກສາຢູ່ຫໍສະພາແຫ່ງຊາດ ຂອງນັກຄົ້ນຄວ້າປະລິນຍາໂທ ຮຸ່ນທີ 18 ສາຂາການປົກຄອງ ໃນຄັ້ງນີ້ ໄດ້ສ້າງຄວາມຮັບຮູ້, ເຂົ້າໃຈ ຢ່າງເລິກເຊິ່ງຕື່ມ ກ່ຽວກັບການປະຕິບັດພາລະບົດບາດ, ສິດ ແລະ ໜ້າທີ່ ຂອງສະພາແຫ່ງຊາດ, ກົງຈັກການຈັດຕັ້ງຂອງສະພາແຫ່ງຊາດ, ຂັ້ນຕອນການຮັບຮອງເອົາກົດໝາຍ, ການຕົກລົງບັນຫາສໍາຄັນຂອງປະເທດຊາດ ແລະ ການຕິດຕາມກວດກາ, ຂັ້ນຕອນການລາຍງານ, ການຊີ້ແຈງ ແລະ ການຕອບຄໍາຊັກຖາມຂອງອົງການບໍລິຫານ ແລະ ອົງການຕຸລາການ, ການເຈາະຈີ້ມຂອງສະມາຊິກສະພາແຫ່ງຊາດ, ການຕົກລົງ, ການຮັບຮອງເອົາບັນດາເນື້ອໃນຂອງກອງປະຊຸມ ດ້ວຍການລົງຄະແນນສຽງ ທີ່ມີຄວາມເປັນເອກະພາບສູງ. ຂ່າວ: ສອນໄພ ບົວຄໍາໄຊ – ພາບ: ໄກດາວັນ ແກ້ວອຸໄທ
