ຂ່າວສານຫວຽດນາມລາຍງານວ່າ: ຕາມຂໍ້ມູນຂອງກະຊວງການເງິນຍີ່ປຸ່ນ ທີ່ປະກາດໃນວັນທີ 20 ກໍລະກົດ ຜ່ານມາ ໃຫ້ຮູ້ວ່າ: ຍອດວົງເງິນການຄ້າຂອງ ຍີ່ປຸ່ນ ໃນເດືອນມິຖຸນາ ປີ 2023 ບັນລຸ 43 ຕື້ເຢນ (300 ລ້ານໂດລາ).
ຂ່າວລະບຸວ່າ: ນີ້ແມ່ນຄັ້ງທຳອິດໃນຮອບ 2 ປີ ທີ່ຍີ່ປຸ່ນ ໄດ້ບັນທຶກການເກີນດຸນການຄ້າ, ຍ້ອນວ່າການສົ່ງອອກໄປສູ່ ອາເມຣິກາ ເພີ່ມຂຶ້ນ ແລະ ຕົ້ນທຶນນຳເຂົ້າພະລັງງານຫຼຸດລົງ.
ໂດຍສະເພາະໃນເດືອນມິຖຸນາປີ 2023, ຄວາມຕ້ອງການລົດຍົນ ແລະ ເຄື່ອງຈັກກໍ່ສ້າງ ທີ່ເພີ່ມຂຶ້ນຢ່າງແຂງແຮງຢູ່ ອາເມຣິກາ ໄດ້ຊ່ວຍໃຫ້ຍອດມູນຄ່າການສົ່ງອອກຂອງ ຍີ່ປຸ່ນ ເພີ່ມຂຶ້ນ 1,5% ຂຶ້ນເປັນ 8,744 ຕື້ເຢນ.
ຍອດມູນຄ່າການຄ້າຂອງຍີ່ປຸ່ນ ກັບ ອາເມຣິກາ ເພີ່ມຂຶ້ນ 37,4% ເປັນ 817,50 ຕື້ເຢນ, ໃນຂະນະທີ່ການຂາດດຸນການຄ້າກັບ ຈີນ ຫຼຸດລົງ 7,6% ເປັນ 442,83 ຕື້ເຢນ.
ໃນ 6 ເດືອນຕົ້ນປີ, ການຂາດດຸນການຄ້າຂອງຍີ່ປຸ່ນໄດ້ຫຼຸດລົງ 13% ເມື່ອທຽບໃສ່ກັບປີກາຍ ຫຼຸດລົງເປັນ 6,960 ຕື້ເຢນ. ການສົ່ງອອກເພີ່ມຂຶ້ນ 3,1% ເພີ່ມຂຶ້ນເປັນ 47,350 ຕື້ເຢນ, ໃນຂະນະທີ່ການນຳເຂົ້າເພີ່ມຂຶ້ນ 0,7% ຂຶ້ນເປັນ 54,310 ຕື້ເຢນ.
