ພິທີເປີດຊຸດຝຶກອົບຮົມວຽກງານແນວໂຮມ ໃຫ້ພະນັກງານຫຼັກແຫຼ່ງມາຈາກສູນກາງແນວລາວສ້າງຊາດ ແລະ ແນວລາວສ້າງຊາດຂັ້ນທ້ອງຖິ່ນ (ພາກເໜືອ, ພາກກາງ ແລະ ພາກໃຕ້) ໂດຍການເປັນປະທານຂອງທ່ານ ເສິນລູ້ນຢວນ ຮອງຫົວໜ້າສະຖາບັນຝຶກອົບຮົມພະນັກງານສາກົນກະຊວງການຄ້າ ສປ ຈີນ, ເປັນກຽດເຂົ້າຮ່ວມຂອງ ທ່ານ ດາວຽງສັກ ຫວ່າງວິຈິດ ຫົວໜ້າຫ້ອງສູນກາງແນວລາວສ້າງຊາດ ຫົວໜ້າຄະນະຝ່າຍລາວ ພ້ອມດ້ວຍນັກສຳມະນາກອນ ຈຳນວນ 20 ທ່ານ ເຂົ້າຮ່ວມທີ່ສະຖາບັນຝຶກອົບຮົມພະນັກງານສາກົນກະຊວງການຄ້າ ສປ ຈີນ ນະຄອນຫຼວງປັກກິ່ງ ໃນວັນທີ 19 ກໍລະກົດ ຜ່ານມາ.
ໃນພິທີ, ທ່ານ ເສິນລູ້ນຢວນ ໄດ້ມີຄຳເຫັນກ່າວເປີດຊຸດຝຶກອົບຮົມວຽກງານແນວໂຮມ ຊຶ່ງທ່ານໄດ້ກ່າວວ່າ: ຊຸດຝຶກອົບຮົມໃນຄັ້ງນີ້ ແມ່ນການຈັດຕັ້ງປະຕິບັດຄວາມເຫັນດີເຫັນພ້ອມຂອງການຮ່ວມມືກັນ ລະຫວ່າງ ຄະນະທີ່ປຶກສາການເມືອງທົ່ວປະເທດຈີນ ແລະ ສູນກາງແນວລາວສ້າງຊາດ ທີ່ສອງຝ່າຍໄດ້ລົງນາມເຊັນສັນຍາຮ່ວມມືກັນ ໃນວັນທີ 19 ມີນາ 2019 ທີ່ນະຄອນຫຼວງປັກກິ່ງ ສປ ຈີນ ຊຶ່ງເປັນການຊຸກຍູ້ຜັນຂະຫຍາຍການຮ່ວມມືຂອງສອງຝ່າຍໃຫ້ປະກົດຜົນເປັນຈິງ, ພ້ອມທັງເປັນການຊຸກຍູ້ການພົວພັນ ລະຫວ່າງ ຈີນ-ລາວ, ລາວ-ຈີນ ໃຫ້ຄວາມສຳຄັນໃນການຊຸຸກຍູ້ການໂຄສະນາຂົນຂວາຍປະຊາຊົນບັນດາເຜົ່າ, ຊັ້ນຄົນທັງສອງປະເທດ ກ່ຽວກັບມູນເຊື້ອຄວາມສາມັກຄີມິດຕະພາບ ແລະ ສາຍພົວພັນແບບຄູ່ຮ່ວມຍຸດທະສາດຮອບດ້ານ ໝັ້ນຄົງຍາວນານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ຈີນ-ລາວ ໂດຍສະເພາະແມ່ນສະພາທີ່ປຶກສາການເມືອງທົ່ວປະເທດຈີນ ແລະສູນກາງແນວລາວສ້າງຊາດ, ທັງແມ່ນການຈັດຕັ້ງປະຕິບັດ ຄວາມເຫັນດີເຫັນພ້ອມຂອງສອງປະມຸກລັດສອງປະເທດກ່ຽວກັບການສຸມໃສ່ການກໍ່ສ້າງປະຊາຄົມຮ່ວມຊາຕາກຳ, ເຊື່ອມໂຍງທັດສະນະຍຸດທະສາດພັດທະນາ ແລະ ສົມທົບຂໍ້ລິເລີ່ມ “ໜຶ່ງແລວທາງ ໜຶ່ງເສັ້ນທາງ” ກັບແຜນການຍຸດທະສາດ “ຫັນປ່ຽນສະຖານະການທີ່ປະເທດບໍ່ມີຊາຍແດນຕິດຈອດກັບທະເລ ເປັນປະເທດເຊື່ອມໂຍງ ເຊື່ອມຈອດ” ຢ່າງມີປະສິດທິຜົນ ແລະ ຊຸກຍູ້ບັນດາມາດຕະການ ການຮ່ວມມືຢ່າງເປັນຮູບປະທຳ ລະຫວ່າງ ສອງປະເທດ ໃຫ້ແຕກດອກອອກຜົນຂຶ້ນເລື້ອຍໆ;
ໂອກາດນີ້, ທ່ານ ດາວຽງສັກ ຫວ່າງວິຈິດ ໄດ້ສະແດງຄວາມຍ້ອງຍໍຊົມເຊີຍມາຍັງຄະນະກະກຽມ ກໍຄືສະຖາບັນຝຶກອົບຮົມພະນັກງານສາກົນກະຊວງການຄ້າ ສປ ຈີນ ແລະ ຫ້ອງການທີ່ປຶກສາເສດຖະກິດ-ການຄ້າ ສະຖານທູດຈີນ ປະຈຳລາວ, ພ້ອມທັງກ່າວຂອບໃຈເປັນຢ່າງສູງ ຕໍ່ທ່ານ ເສິນລູ້ນຢວນ ທີ່ໄດ້ໃຫ້ການຕ້ອນຮັບອັນອົບອຸ່ນ ແລະ ອຳນວຍຄວາມສະດວກໃນການມາຝຶກອົບຮົມຂອງຄະນະໃນຄັ້ງນີ້ ໂດຍສະເພາະໄດ້ໃຫ້ວິທະຍາກອນຜູ້ທີ່ມີຄວາມຮູ້ ຄວາມສາມາດ ແລະ ມີປະສົບການສູງ ທີ່ຈະມາບັນຍາຍ 7 ຫົວຂໍ້ທີ່ສຳຄັນ ຄື: ສະພາບການໂດຍຫຍໍ້ຂອງປະເທດຈີນ, ສະເໜ່ດ້ານແນວຄິດຂອງການປົກຄອງປະເທດໃນຍຸກໃໝ່, ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ ແລະ ສ້າງໂລກທີ່ດີກວ່າຮ່ວມກັນ, ສະພາບໂດຍຫຍໍ້ຂອງສະພາປຶກສາການເມືອງປະຊາຊົນ, ວຽກປຶກສາຂອງສະພາປຶກສາການເມືອງປະຊາຊົນ, ວຽກງານສືບສວນ ແລະ ການຄົ້ນຄວ້າ ຂອງສະພາປຶກສາການເມືອງປະຊາຊົນ ແລະ ວຽກງານສະ ໜີຂອງສະພາປຶກສາການເມືອງປະຊາຊົນ.
ຂ່າວ-ພາບ: ໄພຈິດ
