ກະຊວງສຶກສາທິການ ແລະ ກິລາ (ສສກ) ໄດ້ຮັບການຊ່ວຍເຫຼືອທາງດ້ານອຸປະກອນໄອຊີທີ ເພື່ອສ້າງຄວາມເຂັ້ມແຂງໃຫ້ແກ່ວຽກງານຕິດຕາມ ແລະ ປະເມີນຜົນຂັ້ນກະຊວງ, ແຂວງ ແລະ ຂັ້ນເມືອງ ຈາກສະຫະພາບເອີຣົບ ແລະ ອົງການອຸຍນີເຊັບ ເພື່ອປະກອບສ່ວນຊຸກຍູ້ສົ່ງເສີມວຽກງານໃນຂະແໜງການສຶກສາ ແລະ ກິລາ.
ການມອບ-ຮັບອຸປະກອນດັ່ງກ່າວ, ໄດ້ມີຂຶ້ນເມື່ອວັນທີ 21 ກໍລະກົດ 2023 ທີ່ສໍານັກກະຊວງສຶກສາທິການ ແລະ ກິລາ ໂດຍໃຫ້ກຽດມອບຂອງທ່ານ ນາງ ອີນາມ ມາຈູລໍນີແຕ ເອກອັກຄະລັດຖະທູດ ສະຫະພາບເອີຣົບ ປະຈຳ ສປປ ລາວ ແລະ ຮັບໂດຍ ທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີກະຊວງສຶກສາທິການ ແລະ ກິລາ, ມີທ່ານ ນາງ ດຣ ເພຍ ເຣເບວໂລ ຜູ້ຕາງໜ້າຈາກອົງການອຸຍນິເຊັບ ປະຈຳ ສປປ ລາວ, ພ້ອມດ້ວຍບັນດາຫົວໜ້າ-ຮອງຫົວໜ້າກົມ, ສະຖາບັນ, ສູນ ຕະຫຼອດຮອດພະນັກງານ ແລະ ພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມເປັນສັກຂີພິຍານ.
ສຳລັບເຄື່ອງທີ່ນຳມາມອບໃນຄັ້ງນີ້, ປະກອບມີລະບົບປະຊຸມທາງໄກຜ່ານວີດີໂອ 1 ຊຸດ, ໂປເຈັກເຕີ 22 ເຄື່ອງ, ຄອມພິວເຕີແລັບທັອບ 191 ເຄື່ອງ, ເຄື່ອງພິມ 40 ເຄື່ອງ ແລະ ເຄື່ອງຖ່າຍເອກະສານ 1 ເຄື່ອງ ລວມມູນຄ່າ 100.000 ໂດລາສະຫະລັດ ຊຶ່ງເປັນໜຶ່ງກິດຈະກໍາສະໜັບສະໜູນພາຍໃຕ້ແຜນງານການຮ່ວມມືເພື່ອສ້າງຄວາມເຂັ້ມແຂງໃຫ້ລະບົບການສຶກສາໃນ ສປປ ລາວ ເວົ້າລວມ, ເວົ້າສະເພາະ ແມ່ນອຸປະກອນດັ່ງກ່າວຈະຖືກແຈກຢາຍໃຫ້ຜູ້ຮັບຜິດຊອບວຽກງານຕິດຕາມ ແລະ ປະເມີນຜົນ ໃນບັນດາຫ້ອງການ, ກົມ, ສະຖາບັນທີ່ກ່ຽວຂ້ອງອ້ອມຂ້າງກະຊວງສຶກສາທິການ ແລະ ກິລາ, ພະແນກສຶກສາທິການ ແລະ ກິລາແຂວງ, ນະຄອນຫຼວງ ທົ່ວປະເທດ, ຫ້ອງການສຶກສາທິການ ແລະ ກິລາ 148 ເມືອງ ເພື່ອສ້າງຄວາມເຂັ້ມແຂງໃຫ້ແກ່ວຽກງານຕິດຕາມ ແລະ ປະເມີນຜົນຂັ້ນກະຊວງ, ແຂວງ ແລະ ຂັ້ນເມືອງໃຫ້ນັບມື້ພັດທະນາຂຶ້ນເປັນກ້າວໆ.
ໂອກາດດັ່ງກ່າວ, ທ່ານ ນາງ ຂັນທະລີ ສີຣິພົງພັນ ໄດ້ກ່າວສະແດງຄວາມຂອບໃຈເປັນຢ່າງສູງມາຍັງສະຫະພາບເອີຣົບ ແລະ ອົງການອຸຍນິເຊັບ ປະຈໍາ ສປປ ລາວ ທີ່ໃຫ້ການຊ່ວຍເຫຼືອດ້ານອຸປະກອນໄອທີ ເພື່ອຮັບໃຊ້ວຽກງານການຕິດຕາມກວດກາ ແລະ ປະເມີນຜົນ ຂະແໜງການສຶກສາ ແລະ ກິລາ. ການສະໜອງອຸປະກອນໃນຄັ້ງນີ້ ມີຄວາມສໍາຄັນສໍາລັບການຂັບເຄື່ອນວຽກງານຕິດຕາມ ແລະ ປະເມີນຜົນ, ຈະຊ່ວຍຍົກສູງຄວາມສາມາດຂອງຜູ້ຮັບຜິດຊອບວຽກງານຕິດຕາມກວດກາ ແລະ ປະເມີນຜົນ ແຕ່ສູນກາງຈົນຮອດທ້ອງຖິ່ນ ໃນການປັບປຸງທັກສະ ສຸມໃສ່ການວິເຄາະຂໍ້ມູນຜົນໄດ້ຮັບ ເພື່ອປັບປຸງປະສິດທິພາບການບໍລິຫານ ແລະ ຄຸ້ມຄອງການສຶກສາ ແລະ ກິລາ ໂດຍສະເພາະການວາງແຜນວຽກ, ແຜນງົບປະມານ, ການຕິດຕາມ ແລະ ປະເມີນຜົນ ການຈັດຕັ້ງປະຕິບັດແຜນພັດທະນາປະຈໍາປີ ໃຫ້ມີຄວາມເຂັ້ມແຂງ ແລະ ມີປະສິດທິພາບ.
ຂະນະດຽວກັນນີ້, ທາງ ກະຊວງສຶກສາທິການ ແລະ ກິລາ ຍັງໄດ້ມອບໃບກຽດຕິຄຸນໃຫ້ແກ່ ສະຫະພາບເອີຣົບ ແລະ ອົງການອຸຍນີເຊັບ ທີ່ໄດ້ປະກອບສ່ວນຊຸກຍູ້ສົ່ງເສີມວຽກງານໃນຂະແໜງການສຶກສາ ແລະ ກິລາ ອີກດ້ວຍ.
