ພິທີເປີດຊຸດເຝິກອົບຮົມວຽກງານແນວໂຮມ ໃຫ້ພະນັກງານຫຼັກແຫຼ່ງມາຈາກສູນກາງແນວລາວສ້າງຊາດ (ສນຊ) ແລະ ແນວລາວສ້າງຊາດຂັ້ນທ້ອງຖິ່ນ (ພາກເໜືອ ພາກກາງ ແລະພາກໃຕ້) ໂດຍການເປັນປະທານຂອງທ່ານ ເສິນລູ້ນຢວນ ຮອງຫົວໜ້າສະຖາບັນຝຶກອົບຮົມພະນັກງານສາກົນກະຊວງການຄ້າ ສປ ຈີນ ເປັນກຽດເຂົ້າຮ່ວມຂອງ ທ່ານ ດາວຽງສັກ ຫວ່າງວິຈິດ ຫົວໜ້າຫ້ອງ ນສຊ ຫົວໜ້າຄະນະຝ່າຍລາວ ພ້ອມດ້ວຍນັກສຳມະນາກອນ ຈຳ ນວນ 20 ທ່ານ ເຂົ້າຮ່ວມທີ່ສະຖາບັນຝຶກອົບຮົມພະນັກງານສາກົນກະຊວງການຄ້າ ສປ ຈີນ ນະຄອນຫລວງປັກກິ່ງ ໃນວັນທີ 19 ກໍລະກົດ 2023;
ໃນພິທີ ທ່ານ ເສິນລູ້ນຢວນ ໄດ້ມີຄຳເຫັນກ່າວເປີດຊຸດຝຶກອົບຮົມວຽກງານແນວໂຮມ ເຊິ່ງທ່ານໄດ້ກ່າວວ່າ: ຊຸດເຝິກອົບຮົມໃນຄັ້ງນີ້ ແມ່ນການຈັດຕັ້ງປະຕິບັດຄວາມເຫັນດີເຫັນພ້ອມຂອງການຮ່ວມມືກັນ ລະຫວ່າງ ຄະນະທີ່ປຶກສາການເມືອງທົ່ວປະເທດຈີນ ແລະ ສູນກາງແນວລາວສ້າງຊາດ ທີ່ສອງຝ່າຍໄດ້ລົງນາມເຊັນສັນຍາຮ່ວມມືກັນ ໃນວັນທີ 19 ມີນາ 2019 ທີ່ນະຄອນຫລວງປັກກິ່ງ ສປ ຈີນ ເຊິ່ງເປັນການຊຸກຍູ້ຜັນຂະຫຍາຍການຮ່ວມມືຂອງສອງຝ່າຍໃຫ້ປະກົດຜົນເປັນຈິງ ພ້ອມທັງເປັນການຊຸກຍູ້ການພົວພັນ ລະຫວ່າງ ຈີນ-ລາວ ລາວ-ຈີນ ໃຫ້ຄວາມສຳຄັນໃນການຊຸຸກຍູ້ການໂຄສະນາຂົນຂວາຍປະຊາຊົນບັນດາເຜົ່າ ຊັ້ນຄົນທັງສອງປະເທດ ກ່ຽວກັບມູນເຊື້ອຄວາມສາມັກຄີມິດຕະພາບ ແລະ ສາຍພົວພັນແບບຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ລະຫວ່າງ ສອງພັກ ສອງລັດ ແລະ ປະຊາຊົນສອງຊາດ ຈີນ-ລາວ ໂດຍສະເພາະແມ່ນສະພາທີ່ປຶກສາການເມືອງທົ່ວປະເທດຈີນ ແລະສູນກາງແນວລາວສ້າງຊາດທັງແມ່ນການຈັດຕັ້ງປະຕິບັດ ຄວາມເຫັນດີເຫັນພ້ອມຂອງສອງປະມຸກລັດສອງປະເທດກ່ຽວກັບການສຸມໃສ່ການກໍ່ສ້າງປະຊາຄົມຮ່ວມສະຕາກຳ, ເຊື່ອມໂຍງທັດສະນະຍຸດທະສາດພັດທະນາ ແລະ ສົມທົບຂໍ້ລິເລີ່ມ “ໜື່ງແລວທາງ ໜື່ງເສັ້ນທາງ” ກັບແຜນການຍຸດທະສາດ “ຫັນປ່ຽນສະຖານະການທີ່ປະເທດບໍ່ມີຊາຍແດນຕິດຈອດກັບທະເລ ເປັນປະເທດເຊື່ອມໂຍງ ເຊື່ອມຈອດ” ຢ່າງມີປະສິດທິຜົນ ແລະ ຊຸກຍູ້ບັນດາມາດຕະການ ການຮ່ວມມືຢ່າງເປັນຮູບປະທຳ ລະຫວ່າງສອງປະເທດໃຫ້ແຕກດອກອອກຜົນຂຶ້ນເລື້ອຍໆ;
ໂອກາດນີ້ ທ່ານ ດາວຽງສັກ ຫວ່າງວິຈິດ ໄດ້ສະແດງຄວາມຍ້ອງຍໍຊົມເຊີຍມາຍັງຄະນະກະກຽມ ກໍຄືສະຖາບັນເຝິກອົບຮົມພະນັກງານສາກົນກະຊວງການຄ້າ ສປ ຈີນ ແລະຫ້ອງການທີ່ປຶກສາເສດຖະກິດ-ການຄ້າ ສະຖານທູດຈີນ ປະຈຳລາວ ຫ້ອງການຮ່ວມມື ລາວ-ຈີນ ພ້ອມທັງກ່າວຂອບໃຈເປັນຢ່າງສູງ ຕໍ່ທ່ານ ເສິນລູ້ນຢວນ ທີ່ໄດ້ໃຫ້ການຕ້ອນຮັບອັນອົບອຸ່ນ ແລະອຳນວຍຄວາມສະດວກໃນການມາເຝິກອົບຮົມຂອງຄະນະໃນຄັ້ງນີ້ ໂດຍສະເພາະໄດ້ໃຫ້ວິທະຍາກອນຜູ້ທີ່ມີຄວາມຮູ້ ຄວາມສາມາດ ແລະມີປະສົບການສູງ ທີ່ຈະມາບັນຍາຍ 7 ຫົວຂໍ້ທີ່ສຳຄັນ ຄື: ສະພາບການໂດຍຫຍໍ້ຂອງປະເທດຈີນ ສະເໜ່ດ້ານແນວຄິດຂອງການປົກຄອງປະເທດໃນຍຸກໃໝ່ ຊຸກຍູ້ການສ້າງປະຊາຄົມຮ່ວມສະຕາກຳຂອງມວນມະນຸດ ແລະ ສ້າງໂລກທີ່ດີກວ່າຮ່ວມກັນ ສະພາບໂດຍຫຍໍ້ຂອງສະພາປຶກສາການເມືອງປະຊາຊົນ ວຽກປຶກສາຂອງສະພາປຶກສາການເມືອງປະຊາຊົນ ວຽກງານສືບສວນ ແລະການຄົ້ນຄວ້າ ຂອງສະພາປຶກສາການເມືອງປະຊາຊົນ ແລະວຽກງານສະເໜີຂອງສະພາປຶກສາການເມືອງປະຊາຊົນ.
