ໂຄງການພັດທະນາທ່າບົກທ່ານາແລ້ງເຮັດໜ້າທີ່ເປັນສູນກາງຂອງການຂະຫຍາຍການຄ້າລະຫວ່າງອາຊຽນ ໄປ ສປ ຈີນ ແລະ ສປ ຈີນ ໄປສູ່ ເອີຣົບ ໂດຍນໍາໃຊ້ໂຄງການເສັ້ນທາງລົດໄຟ ລາວ-ຈີນ ຖືເປັນການເຊື່ອມຕໍ່ການຂົນສົ່ງສິນຄ້າໄປປະເທດຕ່າງໆ.
ໃນວັນທີ 17 ກໍລະກົດ 2023 ສື່ມວນຊົນລາວ-ຈີນ ປະກອບມີ ສື່ມວນຊົນຈາກໜັງສືພິມລາຍວັນຢຸນນານ ( ສູນການສື່ສານພາກພື້ນອາຊີໃຕ້-ອາຊີຕາເວັນອອກ ສ່ຽງໃຕ້ ແຂວງຢຸນນານ ສປຈີນ) ແລະ ສື່ມວນຊົນລາວ ຈາກ ໜັງສືພິມວຽງຈັນໃໝ່ ໜັງສືພິມປະຊາຊົນ ໜັງສືພາສາຕ່າງປະເທດ ແລະ ວິທະຍຸກະຈ່າຍສຽງແຫ່ງຊາດ ໄດ້ໄປຢ້ຽມຢາມ ສໍາພາດ ທີ່ດ່ານສາກົນສິນຄ້າ ທ່າບົກທ່ານາແລ້ງ ແລະ ເຂດໂລຊິດສະຕິກນະຄອນຫຼວງວຽງຈັນ ທີ່ຕັ້ງຢູ່ບ້ານດົງໂພສີ ເມືອງຫາດຊາຍຟອງ ນະຄອນຫຼວງວຽງຈັນ ໃນໂອກາດ ຮ່ວມກິດຈະກຳ ສຳພາດຕາມເສັ້ນທາງລາວ-ຈີນ ພາຍໃຕ້ຫົວຂໍ້ “ ໝູ່ເພື່ອນ ໜຶ່ງແລວ ໜຶ່ງເສັ້ນທາງ” ໂດຍການຕ້ອນຮັບຂອງ ທ່ານ ຊ່າງດາຊົວ (Chang Da Shuah) ຜູ້ຈັດການໂຄງການ ບໍລິສັດພາວເວີຊາຍນາ ແລະ ທ່ານ ແສງດາລັດ ອິນທະວັນ ວິຊາການສົ່ງເສີມນັກລົງທືນ ດ່ານສາກົນສິນຄ້າທ່າບົກທ່ານາແລ້ງ ແລະ ເຂດໂລຊິດສະຕິກນະຄອນຫຼວງວຽງຈັນ ພ້ອມດ້ວຍພະນັກງານ.
ທ່ານ ແສງດາລັດ ອິນທະວັນ ວິຊາການສົ່ງເສີມນັກລົງທຶນ ດ່ານສາກົນສິນຄ້າ ທ່າບົກທ່ານາແລ້ງ ແລະ ເຂດໂລຊິດສະຕິກນະຄອນຫຼວງວຽງຈັນ ໃຫ້ຮູ້ວ່າ: ໃນການກໍ່ສ້າງໂຄງການພັດທະນາທ່າບົກທ່ານາແລ້ງ ແລະ ເຂດໂລຊິດສະຕິກນະຄອນຫຼວງວຽງຈັນໃນໄລຍະທີ 1 ມີເນື້ອທີພັດທະນາ 55 ເຮັກຕາເຊິ່ງ ບໍລິສັດພາວເວີໄຊນາ ເປັນຜູ້ຮັບເໝົາກໍ່ສ້າງໃນເຂດດັັ່ງກ່າວ ສຳເລັດການກໍ່ສ້າງໃນໄລຍະ 11 ເດືອນຖືວ່າກໍ່ສ້າງສຳເລັດກ່ອນແຜນການທີ່ກຳນົດ ຍັງເຫຼືອພຽງບາງວຽກທີ່ຍັງຕົກຄ້າງທີ່ທາງບໍລິສັດດັ່ງກ່າວຕ້ອງສືບຕໍ່ດຳເນີນການແກ້ໄຂ.
ໂຄງການພັດທະນາທ່າບົກທ່ານາແລ້ງສ້າງຂຶ້ນ ເພື່ອຜັນຂະຫຍາຍນະໂຍບາຍຂອງລັດຖະບານ ແຫ່ງ ສປປ ລາວ ໃຫ້ເປັນສູນກາງແຫ່ງການເຊື່ອມໂຍງເຊື່ອມຈອດອານຸພາກພື້ນ ແລະ ສາກົນ ເຊິ່ງຈຸດທີ່ຕັ້ງຂອງໂຄງການຈະເຮັດໜ້າທີ່ເປັນສູນກາງຂອງການຂະຫຍາຍການຄ້າລະຫວ່າງອາຊຽນໄປ ສປ ຈີນ ແລະ ສປ ຈີນ ໄປສູ່ເອີຣົບ ໂດຍນໍາໃຊ້ໂຄງການເສັ້ນທາງລົດໄຟລາວ-ຈີນ ພ້ອມນັ້ນການພັດທະນາໂຄງການດ່ານສາກົນສິນຄ້າທ່າບົກທ່ານາແລ້ງມີຄວາມສໍາຄັນຫຼາຍ ຍ້ອນໂຄງການດັ່ງກ່າວເປັນຍຸດທະສາດໜຶ່ງຂອງໂຄງການພັດທະນາ Laos Logistics Link ເປັນຈຸດເຊື່ອມຕໍ່ຫຼັກຂອງບັນດາການຂົນສົ່ງສິນຄ້າຫຼາຍຮູບແບບທາງລົດ ທາງລາງ ທາງເຮືອ ແລະ ເຊື່ອມໂຍງບັນດາຈຸດພັດທະນາຕ່າງໆ ໃນພາກພື້ນສູ່ສາກົນມີເປົ້າໝາຍຫຼັກເພື່ອຫຼຸດຕົ້ນທຶນໂລຊິດສະຕິກຂອງປະເທດລາວໂດຍໄດ້ເປີດນໍາໃຊ້ຢ່າງເປັນທາງການ ວັນທີ 4 ທັນວາ 2021 ເປັນຕົ້ນມາ ທ່າບົກທ່ານາແລ້ງ ເປັນ 1 ໃນ 5 ອົງປະກອບຂອງໂຄງການວຽງຈັນໂລຊິດສະຕິກພາກມີສະຖານະບັນສະຖານີຂົນສົ່ງລະຫວ່າງປະເທດຕັ້ງຢູ່ຊາຍແດນຫ່າງຈາກຂົວມິດຕະພາບລາວ-ໄທ 800 ແມັດ ມີເນື້ອທີ່ 55 ເຮັກຕາ ເນື້ອທີ່ສະຫງວນ 33 ເຮັກຕາ ແລະ ເຂດໂລຊິດສະຕິກພາກ ເນື້ອທີ 327 ເຮັກຕາ ຊຶ່ງປະກອບມີສູນໂລຊິດສະຕິກ ສູນການຜະລິດເພື່ອສົ່ງອອກສູນປະຕິບັດຮັກສາທາດແຫຼວ ເຂດການຄ້າເຂດປອດພາສີ ແລະ ສູນກາງການເງິນ ຈຸດພິເສດຂອງເຂດດັ່ງກ່າວຕັ້ງຢູ່ເສັ້ນທາງເຊື່ອມຕໍ່ທີ່ຄວາມສາມາດຂົນສົ່ງສູງ ເນື່ອງຈາກຕັ້ງຢູ່ເສັ້ນທາງລົດໄຟລາວ-ໄທ ແລະ ເສັ້ນທາງລົດໄຟລາວ-ຈີນ ນອກນັ້ນ ຍັງເປັນຈຸດເຊື່ອມການຂົນສົ່ງທາງລົດໄຟໄປຍັງປະເທດອ້ອມຂ້າງຕື່ມອີກ.
