ສະຫະພັນແມ່ຍິງກະຊວງພາຍໃນ ຈັດພິທີສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວຄົບຮອບ 68 ປີ (20/7/1955-20/7/2023) ໃນວັນທີ 19 ກໍລະກົດ 2023 ທີ່ກະຊວງພາຍໃນ ເປັນກຽດປະຖະກະຖາໂດຍທ່ານນາງ ອີ ກຸນລະວົງ ພັນລະຍາຂອງທ່ານພົນຕີ ຊຽງສົມ ກຸນລະວົງ ວິລະຊົນແຫ່ງຊາດ ອະດີດຮອງລັດຖະມົນຕີກະຊວງປ້ອງກັນຄວາມສະຫງົບ ມີທ່ານນາງ ລີວົງ ລາວລີ ຮອງລັດຖະມົນຕີກະຊວງພາຍໃນ ທ່ານນາງ ຄຳພູນ ແກ້ວສະຫັນ ປະທານສະຫະພັນແມ່ຍິງກະຊວງພາຍໃນພ້ອມດວ້ຍຕາງໜ້າອົງການຈັດຕັ້ງມະຫາຊົນ ແລະ ສະມາຊິກແມ່ຍິງເຂົ້າຮ່ວມ.
ທ່ານນາງ ອີ ກຸລະວົງ ໄດ້ຍົກໃຫ້ເຫັນຄວາມໝາຍສໍາຄັນຂອງວັນດັ່ງກ່າວ ສະນັ້ນ ເພື່ອລະນຶກເຖິງມູນເຊື້ອ ປະຫວັດຄວາມເປັນຂອງວັນສ້າງຕັ້ງສະຫະພັນແມ່ຍິງລາວ ຄຸນງາມຄວາມດີ ນໍ້າໃຈຮັກຊາດ ພິລະອາດຫານຂອງແມ່ປ້ານ້າອາກໍຄືແມ່ຍິງລາວໃນທົ່ວປະເທດ ໃນໄລຍະຜ່ານມາບໍ່ວ່າຈະແມ່ນໄລຍະຕໍ່ສູ້ປົດປ່ອຍຊາດຕ້ານຈັກກະພັດຜູ້ຮຸກຮານກໍ່ຄືໃນໄລຍະປົກປັກຮັກສາ ແລະ ສ້າງສາພັດທະນາປະເທດຊາດ ແມ່ຍິງລາວບັນດາເຜົ່າໃນທົ່ວປະເທດຍາມໃດກໍ່ຄຽງບ່າຄຽງໄຫຼ່ຮ່ວມກັບອ້າຍນ້ອງຊາຍໃນການປະຕິບັດວຽກງານທີ່ຕົນເອງຮັບຜິດຊອບດ້ວຍນໍ້າໃຈຮັກຊາດອັນສູງສົ່ງໂດຍເຫັນໄດ້ຈາກຜົນງານອັນໂດດເດັ່ນ ແລະ ໃຫຍ່ຫຼວງ ຫຼາຍທ່ານໄດ້ຮັບນາມມະຍົດເປັນນັກຮົບແຂ່ງຂັນ ກາຍເປັນວິລະຊົນແຫ່ງຊາດໄດ້ຮັບການປະດັບຫຼຽນໄຊປະເພດຕ່າງໆ ແລະ ໄດ້ຮັບການຍ້ອງຍໍຊົມເຊີຍຫຼາຍລະດັບທີ່ແຕກຕ່າງກັນ.
ນອກຈາກນີ້ກອງປະຊຸມຍັງໄດ້ຮັບການໂອ້ລົມຂອງທ່ານຮອງລັດຖະມົນຕີ ເຊິ່ງທ່ານໄດ້ເນັ້ນຫຼາຍບັນຫາຄື ສະຫະພັນແມ່ຍິງຕ້ອງສືບຕໍ່ໍບຸກບືນພັດທະນາຕົນເອງໃນທຸກດ້ານໃຫ້ແຂງແຮງກ່ວາເກົ່າ ກ່ອນອື່ນໝົດຕ້ອງເອົາໃຈໃສ່ສຶກສາອົບຮົມທາງດ້ານການເມືອງ-ແນວຄິດ ໃຫ້ແກ່ສະມາຊິກແມ່ຍິງເພື່ອຕອບສະ ໜອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງໄລຍະໃໝ່ ສະຫະພັນແມ່ຍິງຕ້ອງສືບຕໍ່ເອົາໃຈໃສ່ປະຕິບັດພາລະບົດບາດເປັນຕົວແທນແຫ່ງສິດຜົ¬ປະໂຫຍດຂອງແມ່ຍິງ-ເດັກນ້ອຍ ເປັນຕົວແທນໃນການສ້າງອະລິຍະທຳທາງສັງຄົມ ເປັນບໍ່ເກີດແຫ່ງຄວາມສະຫງົບສຸກຂອງຄອບຄົວ ແລະ ສ້າງເງື່ອນໄຂໃຫ້ເອື້ອຍນ້ອງແມ່ຍິງໄດ້ຍົກລະດັບຄວາມຮູ້ທາງດ້ານທິດສະດີການເມືອງ ສ້າງຄວາມສາມາດທາງດ້ານວິຊາສະເພາະ ປຸກລະດົມຊຸກຍູ້ຂະບວນການຈັດຕັ້ງປະຕິບັດຂໍ້ແຂ່ງຂັນ 3 ດີໃຫ້ມີຜົນສຳເລັດ.
