ຟາບຣິຊິໂອ ໂຣມາໂນ ລາຍງານຂ່າວຫຼ້າສຸດວ່າ ອັນ-ນາສເຊີ ທີມຮອງແຊັມຂອງລີກ ຊາອຸດິ ອາຣາເບຍ ລະດູການຫຼ້າສຸດ ໃກ້ຈະເຊັນສັນຍາຄວ້າຕົວ ອະເລັກ ເຕວລິສ ແບັກຊ້າຍທີມຊາດບຣາຊິນຂອງ ແມນເຊັສເຕີ ຢູໄນເຕັດ ເຕັມທີ່ແລ້ວ ໂດຍມີການບັນລຸຂໍ້ຕົກລົງກັນທາງປາກເປົ່າແລ້ວລະຫວ່າງ 2 ສະໂມສອນ ຍັງເຫຼືອພຽງແຕ່ຂັ້ນຕອນການກວດສອບຄວາມຖືກຕ້ອງຂອງເອກະສານເທົ່ານັ້ນ.
ເຖິງແມ່ນ ອັນ-ນາສເຊີ ຈະຖືກ FIFA ຫ້າມບໍ່ໃຫ້ລົງທະບຽນຜູ້ຫຼິ້ນໃໝ່ ໂທດຖານຄ້າງຈ່າຍຄ່າເພີ່ມອີກ 390.000 ປອນໃນຂໍ້ຕົກລົງຂອງ ອາເໝັດ ມູຊ່າ ທີ່ຊື້ຈາກ ເລສເຕີ ຊີຕີ ຕັ້ງແຕ່ປີ 2018 ແຕ່ຄາດວ່າບໍ່ໜ້າເປັນບັນຫາຖ້າຫາກຊໍາລະຍອດຄົງຄ້າງ ພ້ອມກັບດອກເບ້ຍຄ່າປັບໃໝໃຫ້ຄົບ.
ຖ້າບໍ່ມີຫຍັງຜິດພາດ ເຕວລິສ ຈະໄດ້ຮ່ວມງານກັບ ຄຣິສເຕຍໂນ ໂຣນັນໂດ ອີກຄັ້ງ ຫຼັງຈາກທີ່ເຄີຍຢູ່ຮ່ວມກັນໃນທີມ ແມນຢູ ເມື່ອລະດູການ 2021-22 ກ່ອນທີ່ລະດູການກ່ອນ ເອຣິກ ເທນ ຮາກ ຈະສົ່ງເຂົາໄປຫຼິ້ນແບບຢືມຕົວໃຫ້ ເຊບີຢາ ຕະຫຼອດທັງລະດູການ.
ຢ່າງໃດກໍຕາມ, ຍັງບໍ່ມີການລາຍງານທີ່ຊັດເຈນວ່າຄ່າຕົວຂອງແບັກຊ້າຍຈອມຍິງໄກຢູ່ທີ່ເທົ່າໃດໃນຂະນະນີ້ ແຕ່ນີ້ຖືເປັນຂ່າວດີ ທີ່ ແມນເຊັສເຕີ ຢູໄນເຕັດ ສາມາດປ່ອຍນັກເຕະທີ່ບໍ່ໄດ້ຢູ່ໃນແຜນການສ້າງທີມຂອງ ເທນ ຮາກ ແລະ ບໍ່ໄດ້ເຂົ້າຮ່ວມການຝຶກຊ້ອມກ່ອນລະດູການໜ້າໃນລະດູຮ້ອນນີ້ອອກໄປໄດ້.
