ກົມເອກະສານແຫ່ງຊາດ ກະຊວງພາຍໃນ ສົມທົບກັບພະແນກພາຍໃນແຂວງໄຊຍະບູລີ ຈັດຕັ້ງເຜີຍແຜ່ກົດໝາຍ ວ່າດ້ວຍເອກະສານ, ຄໍາແນະນໍາ ກ່ຽວກັບການຈັດຕັ້ງປະຕິບັດກົດໝາຍ ວ່າດ້ວຍເອກະ ສານ ແລະ ວຽກງານຄຸ້ມຄອງ-ສໍາເນົາເອກະສານຂຶ້ນ ໃນວັນທີ 17 ກໍລະກົດ ນີ້ ທີ່ຫ້ອງປະຊຸມພະແນກສຶກສາທິການ ແລະ ກິລາແຂວງ ໂດຍການເປັນປະທານໃຫ້ກຽດເຜີຍແຜ່ຂອງ ທ່ານ ນາງ ທອງຈັນ ແກ້ວແສນຫອມ ຫົວໜ້າກົມເອກະສານແຫ່ງຊາດ, ເຂົ້າຮ່ວມກອງປະຊຸມຄັ້ງນີ້ມີຮອງຫົວໜ້າພະແນກການ, ກົມກອງ, ອົງການຈັດຕັ້ງມະຫາຊົນ, ຫົວໜ້າ, ຮອງຫົວໜ້າພາຍໃນເມືອງ 11 ເມືອງ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມ.
ໃນພິທີ ທ່ານ ນາງ ທອງຈັນ ແກ້ວແສນຫອມ ໄດ້ກ່າວວ່າ: ກົດໝາຍວ່າດ້ວຍເອກະສານທີ່ນໍາມາເຜີຍແຜ່ໃນຄັ້ງນີ້ ປະກອບມີ 10 ພາກ, 18 ໝວດ ແລະ 100 ມາດຕາ ຊຶ່ງໄດ້ກໍານົດກ່ຽວກັບຫຼັກການ, ລະບຽບການ ແລະ ມາດຕະການ ກ່ຽວກັບການສ້າງ, ການຄຸ້ມຄອງ, ການນໍາໃຊ້, ການຕິດຕາມກວດກາວຽກງານເອກະສານ ເພື່ອເຮັດໃຫ້ການເຄື່ອນໄຫວວຽກງານດັ່ງກ່າວເປັນລະບົບ, ມີປະສິດທິພາບ, ເປັນເອກະພາບ ແລະ ທັນສະໄໝ ແນໃສ່ປົກປັກຮັກສາ ແລະ ອະນຸລັກເອກະສານ ທີ່ມີຄຸນຄ່າທາງດ້ານປະຫວັດສາດ, ວັດທະນະທໍາ-ສັງຄົມ ແລະ ອື່ນໆຂອງຊາດ ຂອງແຂວງໄວ້ປະກອບເປັນຂໍ້ມູນຂ່າວສານ ຮັບໃຊ້ເຂົ້າໃນການຄົ້ນຄວ້າ ແລະ ເປັນຫຼັກຖານອ້າງອີງໃນຕໍ່ໜ້າ ແລະ ຍາວນານ. ທ່ານຍັງໄດ້ກ່າວຕື່ມວ່າ ການຄຸ້ມຄອງເອກະສານ ແລະ ການສໍາເນົາເອກະສານ ໄດ້ກໍານົດໄວ້ໃນກົດໝາຍ ເພື່ອໃຫ້ມີຄວາມເປັນເອກະພາບກັນໃນການຈັດຕັ້ງປະຕິບັດ ທັງເປັນການລົງເລິກເຖິງການສ້າງເອກະສານ ການຄຸ້ມຄອງເອກະສານ ແມ່ນການເຊັນເອກະສານ ແລະ ການປະທັບຕາ, ການຄຸ້ມຄອງເອກະສານຂາເຂົ້າ-ຂາອອກ ການສໍານວນເອກະສານ ແລະ ການສໍານວນເອກະສານຂອງການຈັດຕັ້ງ ສ່ວນການສໍາເນົາເອກະສານ ກໍໄດ້ເນັ້ນໜັກເຖິງການທ້ອນໂຮມເອກະສານ, ການຈັດລະບົບເອກະສານ, ການກໍານົດຄຸນຄ່າເອກະສານ, ການຂຶ້ນສະຖິຕິເອກະສານ, ການປົກປັກຮັກສາເອກະສານ, ການນໍາໃຊ້ເອກະສານ ແລະ ການທໍາລາຍເອກະສານທີ່ໝົດຄຸນຄ່າ ສ່ວນການທ້ອນໂຮມເອກະສານທາງປະຫວັດສາດຂອງຊາດ ຂອງແຂວງ ເພື່ອປົກປັກຮັກສາໄວ້ຢູ່ໃນພະແນກພາຍໃນແຂວງ, ບັນດາພະແນກການຕ່າງໆ ແລະ ບັນດາເມືອງຕ້ອງມີຫ້ອງສໍາເນົາເອກະສານ ເພື່ອເກັບຮັກສາເອກະສານຂອງອົງການຈັດຕັ້ງຂອງຕົນ ແລະ ມອບເອກະສານທີ່ມີຄຸນຄ່າປົກປັກຮັກສາຖາວອນ ແລະ ມີຄວາມໝາຍລະດັບຊາດໃຫ້ພະແນກພາຍໃນປົກປັກຮັກສາໄວ້ ຫຼັງຈາກນັ້ນພະແນກພາຍໃນແຂວງ ເລືອກເຟັ້ນເອົາເອກະສານທີ່ມີຄຸນຄ່າຖາວອນ ແລະ ມີຄວາມໝາຍລະດັບຊາດ ມອບໃຫ້ກະຊວງພາຍໃນເພື່ອປົກປັກຮັກສາໄວ້ຢ່າງລວມສູນຕາມກົດໝາຍທີ່ກໍານົດໄວ້. ພ້ອມດຽວກັນນີ້ຜູ້ເຂົ້າຮ່ວມຍັງໄດ້ຮັບຟັງການເຜີຍແຜ່ຮ່າງເອກະສານທາງການ, ການຄຸ້ມຄອງເອກະສານ ແລະ ການສໍາເນົາເອກະສານ ພ້ອມທັງລົງພາກປະຕິບັດຕົວຈິງຕື່ມອີກ. ຈຸດປະສົງ ກໍເພື່ອສ້າງຄວາມເຂັ້ມແຂງໃຫ້ແກ່ການຈັດຕັ້ງຂັ້ນແຂວງ, ຂັ້ນເມືອງ ໃຫ້ມີຄວາມຮັບຮູ້ເຂົ້າໃຈ ເປັນເອກະພາບກັນໃນການຈັດຕັ້ງປະຕິບັດກົດໝາຍ ວ່າດ້ວຍເອກະສານ ແນໃສ່ເພື່ອການຄຸ້ມຄອງເອກະສານຢ່າງລວມສູນ ເປັນເອກະພາບທັງຫັນວຽກເອກະສານເຂົ້າສູ່ລະບຽບກົດໝາຍ ແລະ ເປັນທັນສະໄໝເທື່ອລະກ້າວ. ກອງປະຊຸມເຜີຍແຜ່ກົດໝາຍວ່າດ້ວຍເອກະສານ, ຄໍາແນະນໍາ ກ່ຽວກັບການຈັດຕັ້ງປະຕິບັດກົດໝາຍວ່າດ້ວຍເອກະສານ ການສໍາມະນາວຽກງານຄຸ້ມຄອງ ແລະ ສໍາເນົາເອກະສານຄັ້ງນີ້ ດໍາເນີນເປັນເວລາ 2 ວັນຈຶ່ງສໍາເລັດ.
(ຂ່າວ-ພາບ: ບຸນທີ)
