ແຂວງອຸດົມໄຊ ຈັດກິດຈະກໍາຍ່າງມາຣາທອນ, ປູກຕົ້ນໄມ້, ປ່ອຍປາ ແລະ ເຕັ້ນແອໂຣບິກ ສະຫຼອງວັນສ້າງຕັ້ງແຂວງອຸດົມໄຊ, ວັນກິລາ-ກາຍະກຳແຫ່ງຊາດ, ວັນເກີດທ່ານປະທານສຸພານຸວົງ, ວັນອານຸລັກສັດນ້ຳສັດປ່າ ແລະ ວັນສຳຄັນຕ່າງໆຂອງຊາດຂອງພັກ ໃຫ້ມີຂະບວນການຟົດຟື້ນ ໃນວັນທີ 13 ກໍລະກົດ 2023 ທີ່ສະໜາມກິລາແຂວງ ໂດຍມີ ທ່ານ ບຸນຄົງ ຫຼ້າຈຽມພອນ ເຈົ້າແຂວງອຸດົມໄຊ ແລະ ທ່ານ ສົມສັກ ສຸພິໄລ ຫົວໜ້າພະແນກສຶກສາທິການ ແລະ ກິລາແຂວງ ພ້ອມດ້ວຍຄະນະນໍາຂອງແຂວງ, ພະແນກແນກການ, ຫ້ອງການອ້ອມຂ້າງ ແລະ ມວນຊົນພາຍໃນເທດສະບານແຂວງເຂົ້າຮ່ວມຢ່າງຄຶກຄື້ນ.
ໂອກາດນີ້, ທ່ານ ສົມສັກ ສຸພິໄລ ໄດ້ຜ່ານປະຫວັດການກໍາເນີດວັນກິລາ-ກາຍະກໍາແຫ່ງຊາດ ຄົບຮອບ 57 ປີ ໃຫ້ມວນຊົນໄດ້ຮັບຮູ້ເຖິງຄວາມໝາຍຄວາມສໍາຄັນຂອງວັນກິລາ-ກາຍະກຳ ກ່ຽວກັບປະຫວັດຄວາມເປັນມາ ແລະ ການເຕີບໃຫຍ່ຂະຫຍາຍຕົວຂອງວຽກງານກິລາ-ກາຍະກຳ ຊຶ່ງພາຍຫຼັງທີ່ກອງທັບປົດປ່ອຍປະຊາຊົນລາວ ໂດຍແມ່ນ ທ່ານ ພົນເອກ ສີສະຫວາດ ແກ້ວບຸນພັນ ຫົວໜ້າກອງເສນາທິການສູງສຸດ ໄດ້ປະກາດສ້າງຕັ້ງກອງກິລາຂອງຕົນຂຶ້ນຢ່າງເປັນທາງການ ໃນວັນທີ 13 ກໍລະກົດ 1966 ຊຶ່ງວັນດັ່ງກ່າວ ຈຶ່ງໄດ້ກາຍເປັນຂີດໝາຍແຫ່ງການກຳເນີດກິລາ-ກາຍະກຳລາວ ພ້ອມທັງໄດ້ມີການຂະຫຍາຍຕົວທາງດ້ານປະລິມານ ແລະ ຄຸນນະພາບ ຕາມແຕ່ລະຍຸກສະໄໝ ຈົນມາຮອດປັດຈຸບັນ. ໃນນີ້ສໍາລັບວຽກງານກິລາ-ກາຍະກຳ ຢູ່ແຂວງອຸດົມໄຊ ໃນໄລຍະຜ່ານມາ ກໍໄດ້ຮັບການຈັດຕັ້ງ ແລະ ເຄື່ອນໄຫວຢ່າງເປັນຂະບວນການກວ້າງຂວາງ ແລະ ຕໍ່ເນື່ອງ ເປັນຕົ້ນແມ່ນໄດ້ຈັດງານແຂ່ງຂັນກິລາປະເພດຕ່າງໆ ໃນໂຮງຮຽນ, ກິລາປະຈໍາປີ, ແຂ່ງຂັນກິລາຕ້ອນຮັບວັນສໍາຄັນຂອງຊາດ ແລະ ຂອງແຂວງ ລວມທັງການນໍາພານັກກິລາໄປເຂົ້າຮ່ວມງານແຂ່ງຂັນກິລາຢູ່ຕ່າງແຂວງ ໂດຍສະເພາະແມ່ນງານມະຫະກຳກິລາແຫ່ງຊາດ, ງານແຂ່ງຂັນກິລານັກຮຽນມັດທະຍົມສຶກສາທົ່ວປະເທດ ແລະ ງານແຂ່ງຂັນກິລາຄົນພິການແຫ່ງຊາດ ຊຶ່ງສາມາດຍາດໄດ້ໄຊຊະອັນໃຫຍ່ຫຼວງ ແລະ ຊື່ສຽງມາສູ່ແຂວງອຸດົມໄຊ.
ສະນັ້ນ, ວຽກງານກິລາ-ກາຍະກຳ ຈຶ່ງມີຄວາມສໍາຄັນຫຼາຍ ທີ່ທຸກພາກສ່ວນຕ້ອງໄດ້ພ້ອມກັນເອົາໃຈໃສ່ໂຄສະນາ, ປຸກລະດົມມວນຊົນທຸກເພດ-ທຸກໄວ ໃຫ້ໄດ້ຮັບຮູ້, ເຂົ້າໃຈ ທັງປະກອບສ່ວນເຂົ້າໃນຂະບວນການກິລາຕ່າງໆຫຼາຍຂຶ້ນ. ຈາກນັ້ນ ກໍໄດ້ເລີ່ມມີຂະບວນການຍ່າງມາຣາທອນໄປຕາມເສັ້ນທາງຫຼວງອ້ອມເທສະບານຂອງແຂວງ ແລ້ວມຸ່ງໜ້າເຂົ້າສູ່ສະໜາມກິລາຄືເກົ່າ ແລ້ວສືບຕໍ່ປູກຕົ້ນໄມ້ຢູ່ສະໜາມກິລາແຂວງ, ປ່ອຍປາ, ດຶງເຊືອກ ແລະ ເຕັ້ນແອໂຣບິກປະກອບສຽງເພງດ້ວຍຫຼາຍຈັ່ງຫວະ, ມ່ວນຊື່ນ, ເພື່ອສຸຂະພາບທີ່ດີ ທັງເປັນການປູກຈິດສໍານຶກໃຫ້ມ່ວນຊົນຫັນມາໃສ່ໃຈສຸຂະພາບຂອງຕົນ ດ້ວຍການອອກກໍາລັງກາຍ ຫຼາຍຂື້ນ.
ສ່ວນຕອນແລງຂອງວັນດຽວກັນ ໄດ້ຈັດການແຂ່ງຂັນກິລາເຕະບານຊາຍມິດຕະພາບ ຊຶ່ງເປັນການພົບກັນລະຫວ່າງທີມພະແນກສຶກສາທິການ ແລະ ກິລາແຂວງ ກັບ ທີມການນໍາຂອງແຂວງສົມທົບກັບຂົງເຂດວັດທະນະທຳ-ສັງຄົມ ດ້ວຍບັນຍາກາດຟົດຟື້ນ.
ໂດຍ: ວົງຄຳ (ສກຂ ອຸດົມໄຊ)
