ແຫລ່ງຂ່າວງຈາກ ແຂວງສາລະວັນ ໃຫ້ຮູ້ວ່າ: ເມື່ອບໍ່ດົນມານີ້, ສະພາການຄ້າ ແລະ ອຸດສາຫະກຳ ແຂວງສາລະວັນ ໄດ້ມອບແຄນຈຳນວນໜຶ່ງ ໃຫ້ພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ(ຖວທ) ແຂວງສາລະວັນ ເພື່ອນຳໃຊ້ເຂົ້າໃນການຝຶກອົບຮົມ ການເປົ່າແຄນ ທີ່ໄດ້ດໍາເນີນມາແລ້ວ 2 ອາທິດ, ຕາງໜ້າມອບໂດຍ ທ່ານ ນາງ ນວນໃສ ແກ້ວເມກ ຮອງປະທານສະພາການຄ້າ ແລະ ອຸດສາຫະກຳ ແຂວງສາລະວັນ ແລະ ກ່າວຮັບໂດຍ ທ່ານ ມະໄລວອນ ສີປະເສີດ ຫົວໜ້າພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວແຂວງສາລະວັນ ເຊິ່ງອຸປະກອນດັ່ງກ່າວ, ແມ່ນມີຄວາມສຳຄັນ ແລະ ຈໍາເປັນທີ່ຈະຕ້ອງໄດ້ນໍາໃຊ້ເຂົ້າໃນພາກປະຕິ ບັດຕົວຈິງ ເຊັ່ນ: ຮຽນເປົ່າຂອດ, ເປົ່າໃນຈັ່ງຫວະຕ່າງໆ ແລະ ທັກສະອື່ນໆ.
ໂອກາດນີ້, ທ່ານ ຫົວໜ້າພະແນກ ຖວທ ແຂວງ ກໍໄດ້ສະແດງຄວາມຂອບໃຈມາຍັງ ສະພາການຄ້າ ແລະ ອຸດສາຫະກຳ ແຂວງສາລະວັນ ທີ່ເຫັນໄດ້ຄວາມສຳຄັນຂອງວຽກງານດັ່ງກ່າວ ດ້ວຍການ ປະກອບ ສ່ວນຊຸກຍູ້ແຄນ ໃນຄັ້ງນີ້. ພ້ອມທັງໃຫ້ຮູ້ວ່າ ການຈັດຝຶກອົບຮົມດັ່ງກ່າວ ແມ່ນຫັນເອົາເນື້ອໃນມະຕິ 25 ຂອງກົມການເມືອງສູນກາງພັກ ວ່າດ້ວຍການເພີ່ມທະວີການນໍາພາາຂອງພັກ ຕໍ່ວຽກງານວັດທະນະທໍາໃນໄລຍະໃໝ່ ຜັນຂະຫຍາຍໃຫ້ເຂົ້າສູ່ລວງເລິກຕໍ່ວຽກງານຕົວຈິງ ແລະ ມີບາດກ້າວໃໝ່, ທັງເປັນການຟື້ນຟູ, ອະນຸລັກຮັກສາວັດທະນະທໍາອັນດີງາມຂອງຊາດຂອງທ້ອງຖິ່ນ ແລະ ເຜີຍແຜ່ໃຫ້ສັງຄົມ ກໍຄື ເຍົາວະຊົນຮຸ່ນໃໝ່ ໄດ້ຮຽນຮູ້ເຖິງຕົ້ນກຳເນີດ, ການວິວັດທະນາການມາແຕ່ລະໄລຍະ ແລະ ຈະເປັນຜູ້ສືບຕໍ່ອະນຸລັກ, ສົ່ງເສີມ ແລະ ປົກປັກຮັກສາໃຫ້ຍືນຍົງຕະຫລອດໄປ.
ຂ່າວ-ພາບ: ວິໄລວອນ ສິດທິໄຊ
