ມີບົດຄວາມທີ່ໜ້າສົນໃຈຈາກ Tyrone Marshall ຂຽນໃນ Manchester Evening News ກ່ຽວກັບ ຣາສມຸສ ຮອຍລຸນ ເຊິ່ງຈາກຈຸດຢືນຂອງ ອະຕາລັນຕາ ຫຼ້າສຸດນັ້ນ ເບິ່ງຄືວ່າຂໍ້ຕົກລົງນີ້ຈະກາຍເປັນເລື່ອງຍາກຫຼາຍເກີນກວ່າທີ່ ແມນເຊສເຕີ ຢູໄນເຕັດ ຈະບຸກເຂົ້າຫາໄດ້ອີກ. ແຕ່ວ່າ Tyrone Marshall ລະບຸວ່າໃນກໍລະນີນີ້ ບາງທີ ແມນຢູ ອາດຈະຈໍາເປັນຕ້ອງກັດແຂ້ວຍອມອະນຸຍາດໃຫ້ ອະຕາລັນຕາ ເອົາປຽບເລື່ອງຂອງ “ພາສີແມນຢູ” ຈັກຄັ້ງ ເນື່ອງຈາກສະຖານະການໃນຕະຫຼາດໃນເວລານີ້ ຫຼາຍທີມຊັ້ນແນວໜ້າ ກໍາລັງໄລ່ລ່າກອງໜ້າຕົວເປົ້າເຊັ່ນກັນ ບໍ່ໄດ້ມີພຽງແຕ່ ແມນຢູ ທີມດຽວ.
ພ້ອມກັບຍົກຕົວຢ່າງກໍລະນີຂອງ ບາເຢິນ ມິວນິກ ທີ່ກຳລັງຕິດຕາມຊັກຊວນ ແຮຣີ ເຄນ ກອງໜ້າຂອງ ທັອດແນມ ຮັອດສະເປີ ເຊິ່ງ Tyrone Marshall ເຊື່ອວ່າ ຖ້າສຸດທ້າຍ ບາເຢິນ ມິວນິກ ປິດຂໍ້ຕົກລົງ ແຮຣີ ເຄນ ບໍ່ໄດ້ ພວກເຂົາກໍໜ້າຈະບ່ຽງເປົ້າໝາຍມາລ່າຕົວກອງໜ້າຢ່າງ ຣາສມຸສ ຮອຍລຸນ ໄດ້ຄືກັນ.
ຕໍ່ມາກໍຄືເຫດຜົນຮອງຮັບວ່າເປັນຫຍັງໃນປັດຈຸບັນ ກອງໜ້າຕົວເປົ້າໃນຮູບແບບເລກ 9 ຈຶ່ງຂ້ອນຂ້າງຖືກຕີລາຄາເອົາໄວ້ສູງຫຼາຍ (ຖ້າຕໍາແໜ່ງໝາຍເລກ 9 ທີ່ບໍ່ໄດ້ໝາຍຄວາມວ່ານັກເຕະທີ່ໃສ່ເບີ 9) ເຊິ່ງ Tyrone Marshall ຂຽນວ່າ ມັນມີສ່ວນສໍາຄັນມາຈາກທີ່ທ່າອ່ຽງຂອງບານເຕະໃນຊຸມປີມໍ່ໆມານີ້ ທີມຊັ້ນແນວໜ້າຫຼາຍທີມບໍ່ໄດ້ເນັ້ນການມີກອງໜ້າຕົວເປົ້າ ແຕ່ນິຍົມຫຼາຍກັບພວກ 9 ປອມ ກັນຫຼາຍ ເຮັດໃຫ້ເກີດຂະບວນການພັດທະນາຜູ້ຫຼິ້ນໃນທົດສະວັດທີ່ຜ່ານມາ ມັກໃຫ້ນ້ໍາໜັກໄປທີ່ການພັດທະນານັກເຕະກອງໜ້າຕົວປະສົມກັນຫຼາຍ.
ໃນປັດຈຸບັນ ຫຼັງຈາກ 1-2 ປີມານີ້ ວົງການບານເຕະກັບຄືນມາຫຼິ້ນທ່າອ່ຽງກອງໜ້າຕົວເປົ້າອີກຄັ້ງ ມັນເລີຍເຮັດໃຫ້ກອງໜ້າຕົວເປົ້າໃນຄໍານິຍາມໝາຍເລກ 9 ຂ້ອນຂ້າງຂາດຕະຫຼາດ ເຊິ່ງເມື່ອມັນເປັນສິ່ງຂາດຕະຫຼາດ ເພາະບໍ່ໄດ້ຮັບການສະໜັບສະໜູນໃນຂະບວນການພັດທະນາຕາມລະບົບໃນສິບປີທີ່ຜ່ານມາ ເຮັດໃຫ້ຕອນນີ້ມີຜູ້ຫຼິ້ນໃນນິຍາມຂອງໝາຍເລກ 9 ທີ່ໂດດເດັ່ນໄປຕາມກະແສບານເຕະທີ່ກັບມາໃຫ້ນໍ້າໜັກໃຫ້ກັບກອງໜ້າໝາຍເລກ 9 ຫຼາຍຂຶ້ນອີກຄັ້ງລາຄາທີ່ອະຕາລັນຕາ ພະຍາຍາມຈະດຶງຈາກ ແມນເຊັສເຕີ ຢູໄນເຕັດ ຈຶ່ງເຊື່ອວ່າເປັນຜົນມາຈາກການທີ່ພວກເຂົາປະເມີນສິນຄ້າຂອງພວກເຂົາເອົາໄວ້ຢູ່ໃນລະດັບທີ່ສູງຈົນເປັນທີ່ຕ້ອງການຂອງຕະຫຼາດໃນປັດຈຸບັນ.
ອີກທັງຕະຫຼາດໃນປັດຈຸບັນ ຖ້າກວາດສາຍຕາເບິ່ງແທ້ໆ ຈະພົບວ່ານັກເຕະກອງໜ້າຕົວເປົ້າແບບໝາຍເລກ 9 ທີ່ມີຄຸນນະພາບອີຫຼີໆຍັງຖືວ່າມີໜ້ອຍ ນັ້ນຄືເຫດຜົນວ່າເປັນຫຍັງ ອະຕາລັນຕາ ຈຶ່ງຕັ້ງລາຄາຂອງ ຣາສມຸສ ຮອຍລຸນ ເອົາໄວ້ສູງຫຼາຍຂະໜາດນັ້ນນັ້ນເອງ. ຢໍ້າວ່ານີ້ເປັນການວິເຄາະຂອງ Tyrone Marshall ອີກເທື່ອໜຶ່ງ. ມັນຈະເປັນຄວາມຈິງກັນບໍ? ກໍອາດຈະເປັນໄປໄດ້ ເນື່ອງຈາກວ່າລາຍລະອຽດທີ່ເຂົາກ່າວເຖິງ ມັນກໍມີແງ່ມຸມທີ່ໜ້າຕິດຕາມເຊັ່ນກັນ.
