ແຫລ່ງຂ່າວຈາກ ແຂວງຫລວງພະບາງ ໃຫ້ຮູ້ວ່າ: ເມື່ອບໍ່ດົນມານີ້, ທ່ານ ຄໍາຂັນ ຈັນທະວີສຸກ ເຈົ້າແຂວງຫລວງພະບາງ ພ້ອມຄະນະ ໄດ້ລົງໄດ້ຕິດຕາມ ແລະ ຊຸກຍູ້ຂະບວນການຜະລິດລະດູ ຝົນ ໂດຍສະເພາະແມ່ນການປູກເຂົ້ານາປີ ຂອງປະຊາຊົນເມືອງນານ, ພ້ອມທັງໄດ້ຊຸກຍູ້ການປູກໜາກ ພ້າວຫອມ ຂອງປະຊາຊົນຢູ່ບ້ານໂພນ, ການປູກມັນຕົ້ນ ຂອງກະສິກອນຢູ່ບ້ານສີວີໄລ ແລະ ຢ້ຽມຢາມໂຮງງານພະລິດ ຢາງພາລາ ພາຍໃຕ້ໂຄງງານປູກພຶດທົດແທນການປູກຝິ່ນ ເຊິ່ງຕັ້ງຢູ່ບ້ານຫ້ວຍຫອຍ.
ການລົງເຄື່ອນໄຫວຄັ້ງນີ້, ທ່ານ ສຸລິໂຍ ໄຊວິສິດ ຫົວໜ້າຫ້ອງການກະສິກຳ ແລະ ປ່າໄມ້ເມືອງ ໄດ້ລາຍງານໃຫ້ຮູ້ວ່າ: ປັດຈຸບັນ, ຂະບວນການຜະລິດລະດູຝົນຢູ່ເມືອງນານ ກຳລັງສືບຕໍ່ດຳເນີນເປັນຂະ ບວນຟົດຟື້ນ ໂດຍສະເພາະການປູກເຂົ້ານາປີ, ເຊິ່ງມີເນື້ອທີ່ທັງໝົດ 2.080 ເຮັກຕາ, ມາຮອດປັດຈຸບັນ ຕົກກ້າສຳເລັດ 100%, ກຽມດິນ 90% ແລະ ປັກດໍາສຳເລັດແລ້ວ 45%. ສ່ວນເນື້ອທີ່ປູກພືດກະສິກຳ ມີ 7.400 ກວ່າເຮັກຕາ, ເນື້ອທີປູກມັນຕົ້ນ 5.000 ກວ່າເຮັກຕາ, ໝາກເດືອຍ 1.000 ກວ່າເຮັກຕາ, ສາລີ 380 ເຮັກຕາ, ໝາກແຕງສຸກ 80 ເຮັກຕາ, ມີຫລາຍຄອບຄົວເກັບໝາກແຕງສຸກຂາຍສ້າງລາຍຮັບໄດ້ 100 ລ້ານກວ່າກີບ, ສ່ວນການລ້ຽງສັດທົ່ວເມືອງນານ ມີສັດລ້ຽງ 180.000 ກວ່າໂຕ. ໃນນັ້ນ, ຄວາຍ 2.400 ກວ່າໂຕ, ງົວ 9.200 ກວ່າໂຕ, ໜູ 5.000 ກວ່າໂຕ ແລະ ແບ້ 3.000 ກວ່າໂຕ.
ໂອກາດນີ້ ທ່ານ ຄໍາຂັນ ຈັນທະວີສຸກ ໄດ້ຮຽກຮ້ອງໃຫ້ປະຊາຊົນ ກໍຄື ກະສິກອນພາຍໃນເມືອງນານ ເອົາໃຈໃສ່ປັກດໍາເຂົ້ານາປີໃຫ້ສໍາເລັດທັນກັບລະດູການ, ເຂດໃດທີ່ປັກດໍາແລ້ວ ຕ້ອງເອົາໃຈໃສ່ເບິ່ງແຍງ, ບົວລະບັດຮັກສາດ້ວຍການໃສ່ຝຸ່ນ, ໃສ່ປຸຍ ເພື່ອເຮັດໃຫ້ຜົນຂອງການຜະລິດໄດ້ຫລາຍ, ທັງມີຄຸນນະພາບ, ນອກຈາກການປູກເຂົ້າແລ້ວ ຕ້ອງເອົາໃຈໃສ່ປູກພືດເປັນສິນຄ້າ, ພ້ອມທັງປະກອບທຸລະກິດຂອງຕົນ ເພື່ອສ້າງໃຫ້ຄອບຄົວຮັ່ງມີ.
ຂ່າວ-ພາບ: ທະນູສິນ ອິດທິພົນ
