ແຫລ່ງຂ່າວຈາກ ແຂວງບໍ່ແກ້ວ ໃຫ້ຮູ້ວ່າ: ເມື່ອບໍ່ດົນມານີ້, ໄດ້ມີພິທີເຊັນບົດບັນທຶກຄວາມເຂົ້າໃຈ ເພື່ອຮ່ວມມື ຈັດຕັ້ງປະຕິບັດໂຄງການສົ່ງເສີມກະສິກໍາຍືນຍົງ ແລະ ອະນຸລັກຊັບພະຍາ ກອນທໍາມະຊາດ ຢູ່ເມືອງປາກທາ ໂດຍການຮ່ວມລົງນາມ ລະຫວ່າງ ທ່ານ ສີບຸນເຮືອງ ພັນທຸລັກ ຫົວໜ້າພະແນກກະສີກຳ ແລະ ປ່າໄມ້ແຂວງບໍ່ແກ້ວ ແລະ ທ່ານ ສອນເພັດ ຮັກໜໍ່ລາດ ປະທານສະມາຄົມອາສາຮ່ວມພັດທະນາແບບຍືນຍົງ (SAMDA), ມີພາກສ່ວນກ່ຽວຂ້ອງຂອງແຂວງ, ເມືອງປາກທາ ແລະ ພະນັກງານວິຊາການເຂົ້າຮ່ວມ.
ກິດຈະກຳຂອງໂຄງການ ແມ່ນສົ່ງເສີມການເຮັດກະສິກໍາຢູ່ເຂດເນີນສູງ, ການສະໜອງແນວພັນພືດສະບຽງອາຫານ ແລະ ອຸປະກອນຕ່າງໆ, ການເຮັດສວນຄົວໃນລະດູຝົນ, ລະດູແລ້ງ; ຝຶກອົບຮົມກ່ຽວກັບການນໍາໃຊ້ຜະລິດຕະພັນ ເຄື່ອງປ່າຂອງດົງໃຫ້ມີຄວາມຍືນຍົງ, ພ້ອມທັງສະໜອງອຸປະກອນຕ່າງໆທີ່ຈໍາເປັນໃຫ້ກັບບ້ານ ເປົ້າໝາຍໂຄງການ; ສົ່ງເສີມການລ້ຽງສັດນ້ອຍ ເຊັ່ນ: ແບ້, ໝູ, ສັດປີກ ແລະ ສະໜອງປັດໄຈການລ້ຽງສັດຂັ້ນພື້ນຖານ, ສົ່ງເສີມເຕັກນິກການປຸງແຕ່ງ ແລະ ການຖະໜອມອາຫານ; ໃຫ້ຄໍາແນະນໍາ ແລະ ປູກຈິດສໍານຶກດ້ານໂພຊະນາການ; ໃຫ້ຄວາມຮູ້ແກ່ກະສິກອນຕໍ່ກັບຜົນຂ້າງຄຽງ ຂອງການນໍາໃຊ້ສານເຄມີ ເຂົ້າໃນການຜະລິດກະສິກໍາ; ຝຶກອົບຮົມ ແລະ ສ້າງຄວາມເຂັ້ມແຂງໃຫ້ກຸ່ມຜະລິດກະສິກອນຂະໜາດນ້ອຍ ດ້ານການຄຸ້ມຄອງ, ການບໍລິຫານ; ສ້າງຄູຝຶກຂັ້ນບ້ານດ້ານການປູກຝັງ, ລ້ຽງສັດ ແລະ ພັດທະນາຊຸມຊົນ; ທັດສະນະສຶກສາ, ແລກປ່ຽນບົດຮຽນກ່ຽວກັບ ການຜະລິດກະສິກໍາຍືນຍົງ ຢູ່ພາຍໃນບ້ານເປົ້າໝາຍ.
ສຳລັບໄລຍະການຈັດຕັ້ງປະຕິບັດໂຄງການ ແມ່ນເລີ່ມແຕ່ວັນທີ່ອະນຸມັດ ເຖິງວັນທີ 29 ກຸມພາ 2024 ລວມມູນຄ່າທັງໝົດ 465 ລ້ານກວ່າກີບ, ຜູ້ໃຫ້ທຶນສະໜັບສະໜູນ ແມ່ນສະຖານທູດຝຣັ່ງ ປະຈໍາ ສປປ ລາວ ໂດຍຜ່ານການລະດົມທຶນຂອງ ສະມາຄົມອາສາຮ່ວມພັດທະນາແບບຍືນຍົງ.
ຂ່າວ-ພາບ: ສາຍສະໝອນ
