ສະຖາບັນພັດທະນາສີມືແຮງງານ ກະຊວງແຮງງານ ແລະ ສະຫວັດດີການສັງຄົມ (ຮສສ) ຮ່ວມກັບ ມາຄົມແລກປ່ຽນວັດທະນະທຳ ແຊລີ້ງ ສ ເກົາຫລີ ຈັດກິດຈະກຳແລກປ່ຽນບົດຮຽນ ແລະ ປະສົບການໃນການປຸງແຕ່ງອາຫານເກົາຫລີ ລະຫວ່າງ ພໍ່ຄົວຈາກ ສ ເກົາຫລີ ແລະ ພໍ່ຄົວຈາກ ສປປ ລາວ ໃນວັນທີ 14 ກໍລະກົດ ຜ່ານມາ ທີ່ສະຖາບັນພັດທະນາສີມືແຮງງານ ໂດຍມີ ທ່ານ ພົງສະຫວັນ ສຸລິຈັນ ຮອງຫົວໜ້າສະຖາບັນພັດທະນາສີມືແຮງງານ ກະຊວງ ຮສສ, ທ່ານນາງ ຢູຮັນຊຸກ ປະທານສະມາຄົມແລກປ່ຽນວັດທະນະທຳແຊລີ້ງ ສ ເກົາຫລີ, ພ້ອມດ້ວຍພໍ່ຄົວ ແລະ ຂະແໜງການກ່ຽວຂ້ອງ ເຂົ້າຮ່ວມ.
ທ່ານ ພົງສະຫວັນ ສຸລິຈັນ ໄດ້ໃຫ້ຮູ້ວ່າ: ການຈັດກິດຈະກຳດັ່ງກ່າວ, ກໍເພື່ອເປັນການແລກປ່ຽນວັດທະນະທຳທາງດ້ານອາຫານ ລະຫວ່າງ ສອງປະເທດລາວ-ເກົາຫລີ, ສາທິດການປຸງແຕ່ງອາຫານເກົາຫລີ ໂດຍສະເພາະແມ່ນ ພໍ່ຄົວຂອງສະຖາບັນພັດທະນາສີມືແຮງງານ ແລະ ພໍ່ຄົວທີ່ມາຈາກໂຮງແຮມ, ຮ້ານອາຫານທີ່ເປັນຄູ່ຮ່ວມງານຂອງ ສະຖາບັນພັດທະນາສີມືແຮງງານ. ນອກຈາກນັ້ນ, ຍັງເປັນແລກປ່ຽນບົດຮຽນ, ປະສົບການ ແລະ ເຕັກນິກໃນການປຸງແຕ່ງອາຫານເກົາຫລີ ໃຫ້ມີຄວາມແຊບ ຖືກຕາມຫລັກອະນາໄມ.
ປັດຈຸບັນ, ສປປ ລາວ ມີຮ້ານອາຫານເກົາຫລີ ຫລາຍແຫ່ງ, ບັນດາຜູ້ປະກອບການຮ້ານອາຫານກໍໄດ້ຖືເອົາເມນູອາຫານເກົາຫລີ ປະເພດຕ່າງໆ ປັນເມນູຫລັກໃນຮ້ານອາຫານຂອງຕົນ ເຊິ່ງການປຸງແຕ່ງຢູ່ຕາມຮ້ານອາຫານຕ່າງໆນັ້ນ ອາດຈະມີຄວາມແຕກຕ່າງກັນໄປຕາມສູດຂອງໃຜລາວ. ສະນັ້ນ, ໃນງານຄັ້ງນີ້ພໍ່ຄົວຈາກປະເທດເກົາຫລີ ໄດ້ນຳເອົາອາຫານ 3 ປະເພດມາປຸງແຕ່ງ ໃຫ້ໄດ້ຮຽນຮູ້ວິທີການປຸງແຕ່ງ ແລະ ຊີມລົດຊາດຂອງແຕ່ລະປະເພດເຊັ່ນ: ຊັບແຊ, ຕັອກປຸກກີ້ ແລະ ບູໂປຣກີ້.
ຂໍ້ມູນ-ພາບ: ຂ່າວສານ ຮສສ
