ນລະຫວ່າງວັນທີ 12 -14 ກໍລະກົດ 2023 ທ່ານ ຮສ ດຣ ນາງ ສຸພະວັດທະນາກອນ ວົງທະນະວະສຸ ອາດີດຄະນະບໍດີວິທະຍາໄລການປົກຄອງທ້ອງຖິ່ນ ມະຫາວິທະຍາໄລຂອນແກ່ນ ພ້ອມດ້ວຍຄະນະ ໄດ້ມາຢ້ຽມຢາມ ແລະເຮັດວຽກ ຮ່ວມກັບສູນກາງແນວລາວສ້າງຊາດ ແລະ ກຸ່ມບໍລິສັດພົງສະຫວັນ ຈຳກັດ ເຊິ່ງໄດ້ຮັບການຕອນຮັບຈາກທ່ານ ນາງ ແສງດາວ ບຸບພະກອນຄຳ ຮອງປະທານກຸ່ມບໍລິສັດພົງສະຫວັນ ຈຳກັດ ພ້ອມດ້ວຍຄະນະ.
ໂອກາດນີ້ຄະນະໄດ້ເຄື່ອນໄຫວຢ້ຽມຢາມ ແລະເຮັດວຽກຢູ່ 3 ແຂວງພາກໃຕ້ ແລະ ພາກກາງ ຄື: ແຂວງຄຳມ່ວນ ແຂວງສະຫວັນນະເຂດ ແລະ ແຂວງຈຳປາສັກ ພ້ອມກັນນັ້ນ ຄະນະກໍໄດ້ເຂົ້າຢ້ຽມຄຳນັບ ແລະ ລາຍງານຈຸດປະສົງການເຄື່ອນໄຫວເຮັດວຽກໃນຄັ້ງນີ້ໃຫ້ ທ່ານ ວັນໄຊ ຟອງສະຫວັນ ກຳມະການສູນກາງພັກເຈົ້າແຂວງຄຳມ່ວນ ທ່ານ ວິໄລວົງ ບຸດດາຄຳ ກຳມະການສູນກາງພັກ ເຈົ້າແຂວງຈຳປາສັກ ທ່ານ ທອງໃສ ໄຊຍະວົງຄຳດີ ຫົວໜ້າຫ້ອງວ່າການແຂວງສະຫວັນນະເຂດ ໄດ້ຮັບຊາບ ຫຼັງຈາກນັ້ນ ຄະນະຍັງໄດ້ພົບປະກັບຄະນະກຳມະການແນວລາວສ້າງຊາດ ແຂວງຈຳປາສັກ ໂດຍເປັນກຽດເຂົ້າຮ່ວມຂອງທ່ານ ນາງ ວາດສະໜາ ສີລິມາ ປະທານແນວລາວສ້າງຊາດແຂວງຈຳປາສັກ ແລະ ເຂົ້າພົບປະກັບຄະນະກຳມະການແນວລາວສ້າງຊາດ ແຂວງຄຳມ່ວນ ໂດຍການເຂົ້າຮ່ວມຂອງ ທ່ານ ພິດສະໄໝ ກອງຊາເດດ ປະທານແນວລາວສ້າງຊາດ ແຂວງຄຳມ່ວນ ເຊິ່ງທັງສອງຝ່າຍ ໄດ້ມີການແລກປ່ຽນທາງດ້ານວຽກງານການກະເສດ ເປັນຕົ້ນແມ່ນ: ວຽກງານວິທີການປູກ-ການລ້ຽງ ແລະ ການບັນລຸງຮັກສາ ປະເພດພືດຜັກ ເຂົ້າ ຕົ້ນໄມ້ໃຫ້ໝາກ ແລະ ສັດປະເພດຕ່າງໆ ເຊັ່ນ ປາ ເປັດ ໄກ່ ແບ້ ແລະ ງົວ ພ້ອມທັງໄດ້ແລກປ່ຽນກ່ຽວກັບວິທີການນຳເອົາເຕັກໂນໂລຢີ ມາໝູນໃຊ້ເຂົ້າ ໃນຂະແໜງກະສິກຳ ແລະ ການກະເສດ ເພື່ອເຮັດໃຫ້ວຽກງານດັ່ງເກົ່າ ໄດ້ຮັບປະສິດທິຜົນສູງຂຶ້ນ ແລະ ສາມາດຮັກສາຄຸນນະພາບ ຂອງປະເພດໝາກໄມ້ ໃຫ້ມີຄວາມສົດ ໃນໄລຍະເວລາການຂົນສົ່ງອີກດ້ວຍ.
ພ້ອມກັນນີ້ ຄະນະໄດ້ລົງໄປຢ້ຽມຢາມສະຫະກອນຊາວສວນກາເຟ ກອງທຶນບ້ານສາມັກຄີ ບ້ານພູໂອຍ ເມືອງປາກຊ່ອງ ແຂວງຈຳປາສັກ ຢ້ຽມຢາມສູນພັດທະນາ ແລະບໍລິການກະສິກຳ-ປ່າໄມ້ ໜອງເຕົ່າ ບ້ານໂພນສິມ ນະຄອນໄກສອນພົມວິຫານ ແຂວງສະຫວັນນະເຂດ ຢ້ຽມຢາມສູນຜະລິດກະສິກຳອິນຊີ ບ້ານກະ ປູດ-ຊຽງແຫວນ ເມືອງທ່າແຂກ ແຂວງຄຳມ່ວນ ເພື່ອສຳຫຼວດເນື້ອທີ່ທຳການຜະລິດ ສຳຫຼວດສະພາບອາກາດ ແລະ ນຳເອົາຕົວຢ່າງດິນໄປວິໄຈ ເພື່ອຈະສາມາດສົ່ງເສິມການປູກ-ການລ້ຽງ ໃຫ້ຖືກຕາມເປົ້າໝາຍ.
