ແຂວງຫຼວງນ້ຳທາ ຈັດກິດຈະກຳຍ່າງເພື່ອສຸຂະພາບ ເພື່ອສ້າງຂະບວນການສະເຫຼີມສະຫຼອງວັນກິລາ-ກາຍະກຳແຫ່ງຊາດ ຄົບຮອບ 57 ປີ (13 ກໍລະກົດ 1966-13 ກໍລະກົດ 2023) ໃນວັນທີ 13 ກໍລະກົດ 2023 ທີ່ສວນສາທາລະນະແຂວງ ໂດຍການນຳພາຂອງ ທ່ານ ວຽງສະຫວັດ ສີພັນດອນ ເຈົ້າແຂວງຫຼວງນໍ້າທາ, ມີບັນດາການນຳຂອງແຂວງ, ພະແນກການ, ກົມກອງ, ອົງການທຽບເທົ່າ, ຫົວໜ່ວຍທຸລະກິດ ແລະ ປະຊາຊົນ ເຂົ້າຮ່ວມຢ່າງຟົດຟື້ນ.
ໂອກາດນີ້, ທ່ານ ວຽງສະຫວັດ ສີພັນດອນ ກ່າວວ່າ: ການສ້າງຂະບວນການຄັ້ງນີ້ ແມ່ນເພື່ອເປັນ ສະເຫຼີມສະຫຼອງວັນກິລາ-ກາຍະກຳແຫ່ງຊາດ ຄົບຮອບ 57 ປີ (13 ກໍລະກົດ 1966-13 ກໍລະກົດ 2023) ຊຶ່ງວັນດັ່ງກ່າວຖືເປັນວັນໜຶ່ງທີ່ມີຄວາມໝາຍສຳຄັນທາງປະຫວັດສາດອັນຍາວນານຂອງຊາດລາວ ໂດຍສະເພາະໃນຍຸກສະໄໝເຈົ້າໄຊຍະເສດຖາທິລາດ ແລະ ເຈົ້າອະນຸວົງ ຖ້າຈະກ່າວເຖິງວຽກງານກິລາ-ກາຍະກຳ ສ່ວນຫຼາຍແມ່ນໃຊ້ຍຸດທະວິທີການຕໍ່ສູ້ ແລະ ວິທີຂອງການເອົາຕົວຫຼອດໃນການດຳລົງຊີວິດ ເຊັ່ນ: ການຍ່າງ, ແລ່ນ, ການຕໍ່ສູ້ດ້ວຍມື, ດ້ວຍອາວຸດ, ການນຳໃຊ້ຫອກ, ດາບ, ຄ້ອນ, ໜ້າເກັກ, ທະນູ, ປືນແກບ ແລະ ອື່ນໆ ເພື່ອຕໍ່ສູ້ກັບສັດຕູມາຮຸກຮານບ້ານເມືອງຂອງລາວ ດັ່ງນັ້ນ, ຕົກມາຮອດວັນທີ 13 ກໍລະກົດ 1966 ທ່ານ ພົນເອກ ສີສະຫວາດ ແກ້ວບຸນພັນ ຫົວໜ້າກອງເສນາທິການສູງສຸດ ໄດ້ປະກາດສ້າງຕັ້ງກອງກິລາຂອງຕົນຂຶ້ນຢ່າງເປັນທາງການ ຈຶ່ງໄດ້ກາຍເປັນຂີດໝາຍແຫ່ງການກຳເນີດກິລາ-ກາຍະກຳລາວ ພ້ອມທັງໄດ້ມີການຂະຫຍາຍຕົວທາງດ້ານປະລິມານ ແລະ ຄຸນນະພາບ ຕາມແຕ່ລະຍຸກສະໄໝ ຈົນມາຮອດປັດຈຸບັນ.
ດັ່ງນັ້ນ, ເພື່ອເຮັດໃຫ້ວັນດັ່ງກ່າວມີຄວາມໝາຍສຳຄັນ ແລະ ມີບັນຍາກາດຟົດຟື້ນເບີກບານມ່ວນຊື່ນ ໃນປີນີ້ ແຂວງຫຼວງນ້ຳທາຂອງເຮົາ ໄດ້ຈັດກິດຈະກຳການຍ່າງເພື່ອສຸຂະພາບ ເພື່ອເປັນການອອກກຳລັງກາຍເຮັດໃຫ້ສຸຂະພາບແຂງແຮງດີ ແລະ ໂອກາດນີ້ທ່ານກໍໄດ້ຮຽກຮ້ອງໃຫ້ຄູອາຈານ ແລະນັກຮຽນ-ນັກສຶກສາປັນຍາຊົນ ຈົ່ງເອົາໃຈໃສ່ຮັກສາສຸຂະພາບຂອງຕົນຄຽງຄູ່ກັບການປະຕິບັດຕາມ 5 ຫຼັກມູນຂອງການສຶກສາຄື: ປັນຍາສຶກສາ, ຄຸນສົມບັດສຶກສາ, ສິລະປະສຶກສາ, ພະລະສຶກສາ ແລະ ແຮງງານສຶກສາ ເພື່ອພັດທະນາຕົນເອງໃຫ້ມີຄວາມກ້າວໜ້າ ແລະ ເປັນຄົນດີຂອງສັງຄົມ.
ຂ່າວ: ກິ່ນນາລົມ
