ພາຍຫຼັງທີ່ໄດ້ສ້າງຕັ້ງສະໂມສອນ ດັບເບິນຢູໄອຈີ ນາຄາ ຫຼື WIG NAGA ໄດ້ພຽງ 1 ປີ ແຕ່ກໍສາມາດແຈ້ງເກີດສ້າງຊື່ສຽງໃຫ້ກັບວົງການບານທັງພາຍໃນ ແລະ ຕ່າງປະເທດ ໄດ້ຢ່າງໂດດເດັ່ນ ຊຶ່ງສາມາດກວາດແຊ໋ມມາຄອງໄດ້ເຖິງ 4 ລາຍການ, ໃນນັ້ນ ແຊ໋ມພາຍໃນປະເທດ 2 ລາຍການ ແລະ ແຊ໋ມນອກປະເທດ 2 ລາຍການ ໂດຍສະເພາະຜົນງານຫຼ້າສຸດ ແມ່ນຄອງແຊ໋ມການແຂ່ງຂັນເຕະບານລີກເຍົາວະຊົນ ລາຍການ ມັດສະດາ ຢູດລີກ ປະຈຳປີ 2023 ຮຸ່ນອາຍຸບໍ່ເກີນ 10 ປີ ຫຼື ຢູ-10 ມາຄອງໄດ້ຢ່າງຍິ່ງໃຫຍ່.
ການແຂ່ງຂັນເຕະບານ ລີກເຍົາວະຊົນ ຮຸ່ນອາຍຸບໍ່ເກີນ 10 ປີ ຫຼື ຢູ-10 ລະດັບປະເທດ ລາຍການ ມັດສະດາ ຢູດລີກ ຫຼື U10 Mazda youth league 2023 ນັດສຸດທ້າຍ ໂດຍດັບເບິນຢູໄອຈີ ນາຄາ ເປີດບ້ານຕ້ອນຮັບການມາຢາມຂອງສະໂມສອນ ມັດສະດາ ລາວ ຈີບີ ເອັບຊີ ທີມອັນດັບທີ 2 ຂອງຕາຕະລາງລາຍການດັ່ງກ່າວ ໄດ້ມີຂຶ້ນ ໃນວັນທີ 13 ກໍລະກົດ 2023 ທີ່ສະໜາມກິລາຫຍ້າທຽມ ລ້ານຊ້າງ ບ້ານໜອງໄຮ ເມືອງຫາດຊາຍຟອງ ນະຄອນຫຼວງວຽງຈັນ ໃຫ້ກຽດເຂົ້າຮ່ວມ ແລະ ມອບລາງວັນໂດຍ ທ່ານ ທິບພະເນດ ແກ້ວມະນີວົງ ປະທານບໍລິສັດ ແກ້ວໂອໂຕ ກຣຸບ ຈຳກັດ ຜູ້ດຽວ ຕົວແທນຈຳໜ່າຍລົດໃຫຍ່ Mazda ພຽງຜູ້ດຽວໃນສປປ ລາວ ທັງເປັນປະທານສະໂມສອນ ມັດສະດາ ລາວ ຈີບີ ເອັບຊີ ພ້ອມດ້ວຍຄະນະ ແລະ ບັນດາຄູຝຶກ ຕະຫຼອດຮອດພໍ່ແມ່ຜູ້ປົກຄອງ ແລະ ນັກກິລາຢ່າງພ້ອມພຽງ.
ການແຂ່ງຂັນລາຍການນີ້ ມີການຊີງໄຊທັງໝົດ 3 ຮຸ່ນ ຄື: ຢູ-10, ຢູ-12 ແລະ ຢູ-14 ສະເພາະຢູ-10 ມີ 6 ສະໂມສອນ, ຢູ-12 ແລະ ຢູ-14 ມີຮຸ່ນລະ 10 ສະໂມສອນ ຊຶ່ງທັງ 3 ຮຸ່ນແມ່ນນຳໃຊ້ລະບົບແຂ່ງຂັນແບບລີກ ໃນປະເພດ 6 ຮັບ 1 ມີແຂ່ງຂັນໃນຮອບຂາໄປ-ຂາກັບ ທີມໃດມີຄະແນນດີໄດ້ແຊ໋ມໄປຄອງ ສຳລັບ ຢູ-10 ຈຳນວນ 6 ສະໂມສອນ ປະກອບມີ ມັດສະດາ, ດັບເບິນຢູໄອຈີ ນາຄາ, ມາດເຕີເຊເວັນ ເອັບຊີ, ຈຳປາຮັກ, ເອໄອເອັດ ແລະ ວຽງຈັນ ເອັບທີ ສ່ວນຜົນການແຂ່ງຂັນໃນນັດສົ່ງທ້າຍ ຄູ່ບິກແມ໊ດ ປະກົດວ່າ: ດັບເບິນຢູໄອຈີ ນາຄາ ເປີດບ້ານໄລ່ເອົາຊະນະ ມັດສະດາ 3-0 ປະຕູ ຊຶ່ງເປັນໄຊຊະນະນັດທີ 10 ນັດ ລວມມີ 30 ຄະແນນ ໄດ້ແຊ໋ມລາຍການນີ້ໄປຄອງ ສ່ວນ ມັດສະດາ ລົງສະໜາມ 10 ນັດ ຊະນະ 8 ນັດ ເສຍ 2 ນັດ ລວມມີ 27 ແຕັມ ໄດ້ຮອງແຊ໋ມ. ຂະນະທີ່ຜົນງານອີກ 4 ສະໂມສອນນັ້ນ ຍັງຈະລົງສະໜາມນັດສຸດທ້າຍ ໃນວັນອາທິດ 16 ກໍລະກົດ 2023. ນອກຜົນງານໃນການຄອງແຊ໋ມແລ້ວ ທ້າວ ອານຸສັກ ວິໄລກຸນ ກອງກາງ ສະໂມສອນ ດັບເບິນຢູໄອຈີ ນາຄາ ກໍຍັງສາມາດຄວ້າລາງວັນນັກກິລາດີເດັ່ນໄດ້ອີກ 1 ລາງວັນ ສ່ວນລາງວັນຜູ້ຮັກປະຕູດີເດັ່ນເປັນຂອງ ທ້າວ ໄຊຍະສອນ ອິນລີ ນັກກິລາຜູ້ຮັກສາປະຕູຈາກສະໂມສອນ ມັດສະດາ.
ສຳລັບຜົນງານຂອງສະໂມສອນ ດັບເບິນຢູໄອຈີ ນາຄາ ພາຍຫຼັງທີ່ໄດ້ສ້າງຕັ້ງສະໂມສອນ ມາໄດ້ພຽງ 1 ປີ ແມ່ນສາມາດຄວ້າແຊ໋ມໄດ້ເຖິງ 4 ລາຍການ, ໃນນັ້ນ ແຊ໋ມພາຍໃນປະເທດ 2 ລາຍການ ແລະ ແຊ໋ມນອກປະເທດ 2 ລາຍການ ສະເພາະຜົນງານໃນປະເທດ ແມ່ນລາຍການ U10 Mazda Challenge Cup 2023 ແລະ U10 Mazda youth league 2023 ສ່ວນແຊ໋ມນອກປະເທດ ແມ່ນແຊ໋ມພາກອີສານ ຢູ-10 ປີ ຈັດຂຶ້ນທີ່ແຂວງໜອງຄາຍ ປະເທດໄທ ເມື່ອວັນທີ 21 ມັງກອນ 2023 ແລະ ແຊ໋ມ ລາຍການ ໂຂງ-ຊີ-ມູນ ຈູເນ່ຍ ຄັບ 2023 ທີ່ແຂວງມຸກດາຫານ ປະເທດໄທ ລະຫວ່າງວັນທີ 1-2 ເມສາ 2023.
ນອກນັ້ນຜົນງານໃນຮຸ່ນອາຍຸດັ່ງກ່າວແລ້ວ, ສະໂມສອນ ດັບເບິນຢູໄອຈີ ນາຄາ ກໍຍັງສາມາດຄອງແຊ໋ມ ຢູ-12 Mazda Challenge Cup 2023 ແລະ ໃນປັດຈຸບັນກໍຍັງມີລຸ້ນແຊ໋ມ ລາຍການ Mazda Youth League 2023 ອີກໜຶ່ງລາຍການ ຊຶ່ງລົງສະໜາມແຂ່ງຂັນໄປແລ້ວ 9 ນັດ ສາມາດເອົາຊະນະ 8 ນັດ ແລະ ສະເໝີ 1 ນັດ ມີ 24 ຄະແນນ ຈັ້ງເປັນທີມນໍາ ໂດຍມີອັນດັບ 2 ກໍຄື ຢູ-12 ຂອງ Mazda GB FC ທີ່ມີ 22 ຄະແນນ ຈາກການແຂ່ງຂັນ 9 ນັດເຕາຕະລາງຢ່າງໜ້ຽວແໜ້ນ.
ຂ່າວໂດຍ ສົງການ ພັນແພງດີ
