ກົມການສຶກສາກ່ອນໄວຮຽນ ຫຼື ກວຮ ກະຊວງສຶກສາທິການ ແລະ ກິລາ ຮ່ວມກັບ ບໍລິສັດ ສະຕາໂທລະຄົມ ຈຳກັດ ຫຼື ຢູນິເທວ ຈັດກິດຈະກຳແຂ່ງຂັນກິລາເຕະບານມິດຕະພາບ ເພື່ອສ້າງຂະບວນການຂ່ຳນັບຮັບຕ້ອນ ແລະ ສະເຫຼີມສະຫຼອງວັນສຳຄັນຕ່າງໆຂອງພັກ-ຂອງຊາດ ໂດຍສະເພາະແມ່ນວັນຄ້າຍວັນເກີດປະທານ ສຸພານຸວົງ ຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ ຄົບຮອບ 114 ປີ, ວັນສ້າງຕັ້ງກິລາ-ກາຍະກຳແຫ່ງຊາດ ຄົບຮອບ 57 ປີ ແລະ ວັນສ້າງຕັ້ງສະຫະພັນແມ່ຍິງລາວ ຄົບຮອບ 68 ປີ ພິເສດແມ່ນເພື່ອຕ້ອນຮັບກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ກະຊວງສຶກສາທິການ ແລະ ກິລາ ຄັ້ງທີ IX ໃຫ້ມີບັນຍາກາດຟົດຟື້ນ, ເບີກບານມ່ວນຊື່ນ ແລະ ມີຄວາມໝາຍສຳຄັນເລິກເຊິ່ງ.
ກິດຈະກຳແຂ່ງຂັນກິລາເຕະບານມິດຕະພາບຄັ້ງນີ້ ໄດ້ມີຂຶ້ນໃນຕອນແລງວັນທີ 14 ກໍລະກົດ 2023 ທີ່ສະໜາມກິລາຫຍ້າທຽມ ເຟີຣາຣີ ນະຄອນຫຼວງວຽງຈັນ, ໂດຍມີ ທ່ານ ນາງ ສີພາພອນ ມະນີວັນ ຫົວໜ້າກົມການສຶກສາກ່ອນໄວຮຽນ ກະຊວງສຶກສາທິການ ແລະ ກິລາ ແລະ ທ່ານ ບຸນມີ ມາລາວົງ ຮອງຜູ້ອຳນວຍການໃຫຍ່ ເຕັກໂນໂລຊີ ແລະ ການສື່ສານ ບໍລິສັດ ສະຕາໂທລະຄົມ ຈຳກັດ ພ້ອມດ້ວຍແຂກຖືກເຊີນທີ່ມາຈາກກົມ, ສະຖາບັນ, ສູນທີ່ກ່ຽວຂ້ອງ ຕະຫຼອດຮອດພະນັກງານທັງ 2 ພາກສ່ວນເຂົ້າຮ່ວມຢ່າງພ້ອມພຽງ.
ໂອກາດນີ້, ທ່ານ ນາງ ສີພາພອນ ມະນີວັນ ກ່າວວ່າ: ກິດຈະກຳແຂ່ງຂັນກິລາເຕະບານມິດຕະພາບຄັ້ງນີ້ ເພື່ອສ້າງຂະບວນການຂ່ຳນັບຮັບຕ້ອນ ແລະ ສະເຫຼີມສະຫຼອງວັນສຳຄັນຕ່າງໆຂອງພັກ-ຂອງຊາດ ໂດຍສະເພາະແມ່ນວັນຄ້າຍວັນເກີດປະທານ ສຸພານຸວົງ ຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ ຄົບຮອບ 114 ປີ (13 ກໍລະກົດ 1909-13 ກໍລະກົດ 2023), ວັນສ້າງຕັ້ງກິລາ-ກາຍະກຳແຫ່ງຊາດ ຄົບຮອບ 57 ປີ (13 ກໍລະກົດ 1966-13 ກໍລະກົດ 2023) ແລະ ວັນສ້າງຕັ້ງສະຫະພັນແມ່ຍິງລາວ ຄົບຮອບ 68 ປີ (20 ກໍລະກົດ 1955-20 ກໍລະກົດ 2023), ພິເສດແມ່ນເພື່ອຕ້ອນຮັບກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ກະຊວງສຶກສາທິການ ແລະ ກິລາ ຄັ້ງທີ IX ໃຫ້ມີບັນຍາກາດຟົດຟື້ນ, ເບີກບານມ່ວນຊື່ນ ແລະ ມີຄວາມໝາຍສຳຄັນເລິກເຊິ່ງ. ຄຽງຄູ່ກັນນີ້ກໍເພື່ອເປັນການສ້າງໃຫ້ພະນັກງານທັງສອງພາກສ່ວນມີສຸຂະພາບແຂງແຮງ, ຈິດແຈ່ມໃຈ ແລະ ເປັນການພົບປະແລກປ່ຽນບົດຮຽນເຊິ່ງກັນ ແລະ ກັນທັງໃນດ້ານກິລາ ແລະ ການປະຕິບັດໜ້າທີ່ວຽກງານຕ່າງໆອີກດ້ວຍ. ຢ່າງໃດກໍຕາມ, ງານຄັ້ງນີ້ຈະເກີດຂຶ້ນບໍ່ໄດ້ແນ່ນອນຖ້າຫາກພວກເຮົາບໍ່ມີການຮ່ວມມືກັນ ໂດຍສະເພາະແມ່ນການຊ່ວຍເຫຼືອຂອງບໍລິສັດ ຢູນິເທວ ໃນການພັດທະນາວຽກງານການສຶກສາກ່ອນໄວຮຽນ ສະນັ້ນຫວັງເປັນຢ່າງຍິ່ງວ່າພວກເຮົາທັງສອງພາກສ່ວນ ຈະມີການຮ່ວມມືກັນຕໍ່ໄປ ແລະ ມີກິດຈະກຳດີໆແບບນີ້ຕື່ມອີກໃນອະນາຄົດ.
ການແຂ່ງຂັນກິລາເຕະບານມິດຕະພາບຄັ້ງນີ້ ແມ່ນເຕັມໄປດ້ວຍບັນຍາກາດຟົດຟື້ນ, ເບີກບານມ່ວນຊື່ນ, ຮູ້ກິລາທັງສອງຝ່າຍ ຫຼິ້ນດ້ວຍໄມຕີຈິດມິດຕະພາບ, ຮູ້ໄດ້, ຮູ້ເສຍ ແລະ ຮູ້ໃຫ້ອະໄພເຊິ່ງກັນ ແລະ ກັນ ເມື່ອມີການປະທະກັນ ເຮັດໃຫ້ການແຂ່ງຂັນດຳເນີນໄປດ້ວຍຜົນສຳເລັດຢ່າງຈົບງາມ. ຜ່ານການແຂ່ງຂັນຜົນປະກົດວ່າ ທັງສອງທີມ ເຮັດໄດ້ພຽງສະເໝີກັນໄປ 5-5 ປະຕູ.
ຂ່າວໂດຍ: ລູກນ້ຳເຊ ອິນທະດາລິນ
