ສຳນັກຂ່າວຊິນຮວາ ຂອງ ສປຈີນ, ວັນທີ 12 ກໍລະກົດ, ສະຫະນະຄອນເອເມເຣັດອາຣັບ (ຢູເອອີ) ປະກາດຈະຫລຸດການປ່ອຍ ມົນລະພິດ ຈາກ 31% ເປັນ 40% ໃນປີ 2030. ໃນຂະນະທີ່ປະເທດນີ້ກຽມເປັນເຈົ້າພາບຈັດກອງປະຊຸມດ້ານສະພາບ ອາກາດເປັນຄັ້ງສຳຄັນໃນປີນີ້.
ໂດຍ ທ່ານ ມາຣຽມ ບິນ ໂມຮຳເຫມັດ ອັລເຮຣີ ລັດຖະມົນຕີກະຊວງການປ່ຽນແປງສະພາບອາກາດ ແລະ ສິ່ງແວດລ້ອມ ຂອງສະຫະນະຄອນເອເມເຣັດອາຣັບ ລະບຸວ່າ: ເປົ້າໝາຍຄັ້ງໃໝ່ນີ້ເພື່ອປ່ຽນແປງວິທີທາງຫລຸດຜ່ອນການປ່ອຍແກັສເຮືອນແກ້ວຂອງປະເທດ. ໂດຍສະເພາະການຜະລິດໄຟຟ້າ ແລະ ນໍ້າ, ອຸດສາຫະກຳໜັກ, ການຂົນສົ່ງ, ຂີ້ເຫຍື້ອຂອງເສຍ , ການກໍ່ສ້າງ ແລະ ການກະສິກຳ ຈະຮ່ວມກັນຫລຸດຜ່ອນການປ່ອຍມົນລະພິດຕາມເປົ້າໝາຍ ສະເພາະທີ່ກຳນົດໄວ້ໃນແຕ່ລະພາກສ່ວນ.
