ໃນຕອນເຊົ້າວັນທີ 13 ກໍລະກົດ ນີ້ ທີ່ວັງອະນຸລັກ ເຂດສະໜາມກິລາແຂວງ ໄດ້ຈັດພິທີປ່ອຍປາລົງສູ່ທຳມະຊາດ ວັງອະນຸລັກ ແມ່ນ້ຳກໍ, ເມືອງໄຊ ແຂວງອຸດົມໄຊ ເຂົ້າຮ່ວມການປ່ອຍປາມີ ທ່ານ ບຸນຄົງ ຫຼ້າຈຽມພອນ ເຈົ້າແຂວງອຸດົມໄຊ, ມີການນຳແຂວງ, ພະແນກການ, ອົງການປົກຄອງບ້ານຕະຫຼອດຮອດເຍົາວະຊົນ, ຊາວໜຸ່ມ ແລະ ພາກສ່ວນຕ່າງໆ.
ຈຸດປະສົງຂອງການປ່ອຍປາລົງສູ່ທຳມະຊາດ ກໍເພື່ອເປັນການສະເຫຼີມສະຫຼອງວັນປ່ອຍປາ ແລະ ອະນຸ ລັກສັດນ້ຳ – ສັດປ່າ ແຫ່ງຊາດ (13 ກໍລະກົດ) ຂອງແຕ່ລະປີໃຫ້ມີຄວາມໝາຍຄວາມສຳຄັນ ແລະ ຍັງເປັນການສະເຫຼີມສະຫຼອງ ວັນຄ້າຍວັນເກີດຂອງ ປະທານ ສຸພານຸວົງ ຄົບຮອບ 114 ປີ, ເພື່ອປູກຈິດສຳນຶກໃຫ້ແກ່ ນ້ອງນ້ອຍອານຸຊົນ, ເຍົາວະຊົນ, ຊາວໜຸ່ມ-ໄວໜຸ່ມ ຮັບຮູ້ ແລະ ເຂົ້າໃຈ ຕໍ່ກັບການອະນຸລັກຮັກສາສັດນ້ຳ-ສັດປ່າ ພ້ອມກັນເປັນເຈົ້າການກ່ຽວກັບວຽກງານອະນຸລັກສັດນ້ຳ-ສັດປ່າ ໂດຍການປ່ອຍແນວພັນສັດນ້ຳ-ສັດປ່າ ຄືນສູ່ທຳມະຊາດ ໂດຍສະເພາະແມ່ນການປ່ອຍປາລົງວັງອະນຸລັກ ແລະ ວັງສະຫງວນ ເຮັດໃຫ້ສັດນ້ຳ-ສັດປ່າ ມີການຂະຫຍາຍພັນນັບມື້ນັບເພີ່ມຂຶ້ນ, ແນໃສ່ເຮັດໃຫ້ລະບົບນິເວດມີຄວາມສົມດູນ ແລະ ຮັບປະກັນໃຫ້ມີຄວາມຍືນຍົງ.
ດັ່ງນັ້ນ ຫ້ອງການກະສິກຳ ແລະ ປ່າໄມ້ ເມືອງໄຊ, ອົງການປົກຄອງເມືອງໄຊ ສົມທົບກັບ ພະແນກກະສິກຳ ແລະ ປ່າໄມ້ ແຂວງ ຈຶ່ງໄດ້ພ້ອມກັນຈັດພິທີປ່ອຍປາ ໃນວັນປ່ອຍປາ ແລະ ອະນຸລັກສັດນ້ຳ-ສັດປ່າ ແຫ່ງຊາດ ສຳລັບປາທີ່ນຳມາປ່ອຍ ລົງໃນວັງອະນຸລັກ, ນ້ຳກໍ, ຂອບເຂດສວນສາທາລະນະບັນດາເຜົ່າ ມີທັງໝົດ 111.000ໂຕ ໃນນີ້ ມີ ປານິນ, ປາປາກ, ປາໄນ ແລະ ປາກແກງ. ສ່ວນວັງອະນຸລັກແຫ່ງນີ້ ແມ່ນໄດ້ກຳນົດເອົາແຕ່ ຂົວນ້ຳກໍ 3 ບ້ານຖິ່ນ ຮອດ ຂົວນ້ຳກໍ 4 ຂ້າງສະໜາມກິລາ ມີຄວາມຍາວ 3 ພັນກວ່າແມັດ. ໂອກາດນີ້, ທ່ານ ບຸນຄົງ ຫຼ້າຈຽມພອນ ເຈົ້າແຂວງອຸດົມໄຊ ກໍໄດ້ຕັດແຖບຜ້າ ປ່ອຍປາລົງສູ່ ວັງອະນຸລັກ, ແມ່ນ້ຳກໍ.
(ຂ່າວ-ພາບ: ແສງອາທິດ)
