ກະຊວງປ້ອງກັນປະເທດ ດໍາເນີນກອງປະຊຸມຄົບຄະນະກາງສະໄໝຂອງ ຄະນະບໍລິຫານງານພັກ ກະຊວງປ້ອງກັນປະເທດ ສະໄໝທີ V ໃນວັນທີ 12 ກໍລະກົດ 2023 ໂດຍການເປັນປະທານຂອງ ສະຫາຍ ພົນເອກ ຈັນສະໝອນ ຈັນຍາລາດ ກຳມະການກົມການເມືອງສູນກາງພັກ, ຮອງນາຍົກ ລັດຖະມົນຕີ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງປ້ອງກັນປະເທດ, ມີບັນດາສະຫາຍກຳມະການສູນກາງພັກ, ກຳມະການສຳຮອງສູນກາງພັກ, ຄະນະປະຈຳພັກ-ຄະນະບໍລິຫານງານພັກກະຊວງ, ຄະນະຫ້ອງວ່າການສູນກາງພັກ, ໜ່ວຍງານວິຊາການຈາກສູນກາງພັກ ເຂົ້າຮ່ວມ.
ສະຫາຍ ພົນເອກ ຈັນສະໝອນ ຈັນຍາລາດ ໄດ້ກ່າວວ່າ: ການດໍາເນີນກອງປະຊຸມຄົບຄະນະກາງສະໄໝຂອງຄະນະພັກກະຊວງ ກໍຄື ຄະນະພັກແຕ່ລະຂັ້ນໃນທົ່ວກອງທັບ ແມ່ນມີຄວາມໝາຍສຳຄັນຍິ່ງ ເພາະເປັນການປະຕິບັດຕາມກົດລະບຽບຂອງພັກ ກໍຄື ຄໍາສັ່ງ, ຄໍາແນະນໍາຂອງສູນກາງພັກ ເພື່ອກວດກາ-ຕີລາຄາ ແລະ ທົບທວນຄືນໝາກຜົນແຫ່ງການນຳພາ-ຊີ້ນຳ ຈັດຕັ້ງຜັນຂະຫຍາຍມະຕິ ກອງປະຊຸມໃຫຍ່ຄັ້ງທີ XI ຂອງພັກ, ກົດລະບຽບຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX, 2 ວາລະແຫ່ງຊາດ ກໍຄື ມະຕິກອງປະຊຸມໃຫຍ່ຄັ້ງທີ V ຂອງຄະນະພັກກະຊວງປ້ອງກັນປະເທດ ໃນຕະຫລອດໄລຍະ 2 ປີເຄິ່ງ ຜ່ານມາ; ກອງປະຊຸທຄັ້ງນີ້, ຈະເປັນພື້ນຖານເພື່ອສືບຕໍ່ປັບປຸງ, ເຊີດຊູສະຕິເຄົາລົບ ແລະ ປະຕິບັດກົດລະບຽບຂອງພັກ, ບັນດາຫລັກການ ແລະ ທິດນໍາກໍ່ສ້າງພັກ ເຊິ່ງກ່ອນອື່ນໝົດແມ່ນຫລັກການລວມສູນປະຊາທິປະໄຕ, ຫລັກການຕໍານິຕິຊົມຕົນເອງ ແລະ ຕຳນິຕິຊົມເຊິ່ງກັນ ແລະ ກັນ, ແກ້ໄຂປະກົດການຫຍໍ້ທໍ້ຕ່າງໆພາຍໃນພັກ. ພ້ອມນັ້ນ, ກໍເພື່ອກວດກາຄວາມຮັບຜິດຊອບຂອງບັນດາສະຫາຍ ໃນຄະນະບໍລິຫານງານພັກ ຕໍ່ກັບການນໍາພາລວມ ແລະ ຄວາມຮັບຜິດຊອບຂອງບຸກຄົນໃນຄະນະພັກ ຕາມການແບ່ງງານ, ແບ່ງຄວາມຮັບຜິດຊອບ; ຊອກໃຫ້ເຫັນດ້ານຕັ້ງໜ້າທີ່ຈະເສີມຂະຫຍາຍ, ດ້ານອ່ອນຄົງຄ້າງທີ່ຈະຕ້ອງປັບປຸງແກ້ໄຂ, ປັບປຸງຍົກສູງຄວາມຮັບ ຜິດຊອບການເມືອງຂອງແຕ່ລະສະຫາຍໃນຄະນະພັກ; ປະຕິບັດຫລັກການ ຕໍານິຕິຊົມຕົນເອງ ແລະ ຕິຊົມເຊິ່ງກັນ ແລະ ກັນພາຍໃນພັກ, ເພີ່ມທະວີຄວາມສາມັກຄີເປັນເອກະພາບພາຍໃນ ຄະນະພັກ, ຍົກສູງຄວາມຮັບຜິດຊອບ ແລະ ຄວາມເປັນແບບຢ່າງນໍາໜ້າ ຂອງບັນດາສະຫາຍຄະນະບໍລິຫານງານພັກ, ເຮັດໃຫ້ທົ່ວອົງຄະນະພັກກະຊວງປ້ອງກັນປະເທດ ມີຄວາມປອດໃສ ເຂັ້ມແຂງ ໜັກແໜ້ນ, ທັງເປັນການຍົກສູງພາລະບົດບາດຄວາມ ສາມາດນໍາພາຂອງຄະນະພັກ ໃຫ້ສົມຄູ່ກັບໜ້າທີ່ການເມືອງໃນໄລຍະ ໃໝ່ຂອງພັກ.
ກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກກະຊວງປ້ອງກັນປະເທດ ຈະດຳເນີນເປັນເວລາ 3 ວັນເຄິ່ງ ເຊິ່ງປະກອບມີ 3 ວາລະໃຫຍ່ຄື: ວາລະທີ 1. ທາບທາມຄວາມໄວ້ວາງໃຈຕໍ່ການນຳພາລວມ ແລະ ບຸກຄົນ ຄະນະບໍລິຫານງານພັກກະຊວງ ສະໄໝທີ V, ວາລະທີ 2. ກອງປະຊຸມເປີດກວ້າງຄົບຄະນະກາງສະໄໝ, ວາລະທີ 3. ດຳເນີນຊີວິດການເມືອງພາຍໃນຄະນະບໍລິຫານພັກກະຊວງ.
ໂອກາດນີ້, ສະຫາຍ ພົນເອກ ຈັນສະໝອນ ຈັນຍາລາດ ມີຄໍາເຫັນຊີ້ນໍາຕໍ່ການທາບທາມຄວາມໄວ້ວາງໃຈ, ພ້ອມທັງຮຽກຮ້ອງໃຫ້ຄະນະພັກ, ຄະນະບັນຊາແຕ່ລະຂັ້ນຕ້ອງປະຕິບັດຢ່າງເຖິງຖອງ, ຈິງໃຈ, ກ້າເບິ່ງສະພາບຕົວຈິງທີ່ເກີດຂຶ້ນຢູ່ໃນກຳລັງ, ທັງອັນລວມ ແລະ ອັນສະເພາະ ຢູ່ແຕ່ລະກົມກອງ-ທ້ອງຖິ່ນ ທີ່ຕົນຮັບຜິດຊອບນຳພາ, ຕີລາຄາໃຫ້ຖືກຕ້ອງ, ຊັດເຈນບັນຫາຄົງຄ້າງທີ່ເກີດຂຶ້ນ, ສ້າງຄວາມເຂົ້າໃຈເປັນເອກະພາບ ແລະ ຕັດສິນໃຈແກ້ບັນຫາຢ່າງເອົາຈິງເອົາຈັງ, ເຮັດໃຫ້ການຫັນເນື້ອໃນມະຕິກອງປະຊຸມໃຫຍ່ຄັ້ງທີ V ຂອງຄະນະພັກກະຊວງກາຍເປັນທິດທາງໜ້າທີ່ຕົ້ນຕໍ, ສອດຄ່ອງກັບສະພາບຕົວຈິງຂອງກົມກອງທ້ອງຖິ່ນຕົນ ໃຫ້ບັນລຸຕາມຄາດໝາຍ, ມີເນື້ອໃນເລິກເຊິ່ງ ແລະ ດີຂຶ້ນກວ່າເກົ່າ; ຮຽກຮ້ອງບັນດາສະຫາຍ ຄະນະປະຈຳພັກ-ຄະນະບໍລິຫານງານພັກກະຊວງ, ຄະນະຫ້ອງວ່າການສູນກາງພັກ, ໜ່ວຍງານວິຊາການຈາກສູນກາງພັກ ຍົກສູງຄວາມຮັບຜິດຊອບ, ສຸມສະຕິປັນຍາເຂົ້າໃນການຄົ້ນຄ້ວາ, ຕີລາຄາ, ໄຈ້ແຍກ ບັນຫາຕ່າງໆທີ່ຍົກຂຶ້ນ ໃຫ້ລະອຽດຈະແຈ້ງ ແລະ ກ້າຫານປະກອບຄໍາເຫັນຢ່າງສ້າງສັນ, ກົງໄປກົງມາ ໃຫ້ທຸກບັນຫາມີຄວາມກະຈ່າງແຈ້ງ, ຊັດເຈນ, ເປັນພື້ນຖານທີ່ໜັກ ແໜ້ນ ໃຫ້ແກ່ການນຳພາຊີ້ນຳຈັດຕັ້ງປະຕິບັດໃຫ້ເກີດໝາກຜົນຕົວຈິງ.
ຂ່າວ-ພາບ: ໜັງສືພິມກອງທັບ
