ຕາມຂ່າວຈາກວິທະຍຸສາກົນ ແຫ່ງ ສປ ຈີນ ວັນທີ 11 ກໍລະກົດນີ້ ທ່ານ ປຣະຢຸດ ຈັນໂອຊາ, ນາຍົກລັດຖະມົນຕີໄທ ໄດ້ປະກາດສິ້ນສຸດຊີວິດການເມືອງຂອງຕົນ ແລະ ຖອນນຕົວຈາກພັກລວມໄທສ້າງຊາດ. ຫລັງຈາກອອກຖະແຫລງການຜ່ານສື່ສັງຄົມອອນລາຍ ຂອງພັກລວມໄທສ້າງຊາດ ໂດຍໄດ້ຫວນຄືນຜົນງານທາງການເມືອງ ທີ່ໄດ້ຮັບໃນໄລຍະດຳລົງຕຳແໜ່ງ ນາຍົກລັດຖະມົນຕີໄທ ເປັນເວລາ 9 ປີຜ່ານມາ ແລະ ຫວັງວ່າ: ປະຊາຊົນໄທ ຈະສືບຕໍ່ສະໜັບສະໜູນພັກລວມໄທ ສ້າງຊາດ. ຂະນະທີ່ລັດຖະສະພາໄທ ຈະຈັດກອງປະຊຸມ ໃນວັນທີ 13 ກໍລະກົດນີ້ ເພື່ອລົງຄະແນນສຽງ ຕໍ່ຜູ້ຈະດຳລົງຕຳແໜ່ງ ນາຍົກລັດຖະມົນຕີໄທຄົນໃໝ່. ອີງຕາມສື່ມວນຊົນທ້ອງຖິ່ນ ລາຍງານວ່າ, ທ່ານປຣະຢຸດ ຈັນໂອຊາ ຈະສືບຕໍ່ດຳລົງຕຳແໜ່ງນາຍົກລັດຖະມົນຕີຮັກສາການຈົນກວ່າລັດຖະບານຊຸດໃໝ່ ຈະໄດ້ຮັບການຈັດຕັ້ງຂຶ້ນຢ່າງເປັນທາງການ.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
