ວິທະຍຸກະຈາຍສຽງຫວຽດນາມລາຍງານວ່າ: ວັນທີ 10 ກໍລະກົດ ຜ່ານມານີ້, ທ່ານ ໂຈ ໄບເດັ່ນ ປະທານາທິບໍດີ ອາເມຣິກາ ໄດ້ມີການພົບປະກັບ ທ່ານ ຣີຊີ ສູນາກ ນາຍົກລັດຖະມົນຕີ ອັງກິດ ໃນການເດີນຢ້ຽມຢາມ ແລະ ເຮັດວຽກຢູ່ ປະເທດອັງກິດ ສອງຝ່າຍໄດ້ປຶກສາຫາລື ແນໃສ່ປັບປຸງການພົວພັນຄວາມໝັ້ນຄົງດ້ານເສດຖະກິດ ແລະ ການຄ້າ ລະຫວ່າງສອງປະເທດ.
ຂ່າວລະບຸວ່າ: ໃນຂອບເຂດການຢ້ຽມຢາມ ອັງກິດ ຄັ້ງນີ້, ທ່ານ ໂຈ ໄບເດັ່ນ ກໍໄດ້ພົບປະກັບເຈົ້າຊີວິດ ຊາວສ ທີ III ຢູ່ ວັງ ວິນເຊີ. ໃນການພົບປະ, ທ່ານ ໂຈ ໄບເດັ່ນ ແລະ ເຈົ້າຊີວິດ ຊາວສ ທີ III ໄດ້ແລກປ່ຽນກ່ຽວກັບບັນດາບັນຫາສິ່ງແວດລ້ອມ ແລະ ການຮັບມືກັບການປ່ຽນແປງຂອງດິນຟ້າອາກາດ, ພົບປະກັບບັນດາຜູ້ແທນເຂົ້າຮ່ວມເວທີປາໄສລະດົມທຶນ ລະຫວ່າງ ອາເມຣິກາ – ອັງກິດ ໂດຍ ທ່ານ ເກຣນ ຊາບສ ລັດຖະມົນຕີກະຊວງພະລັງງານ ອັງກິດ ແລະ ທ່ານ ຈອນ ເຄີຣີ ທູດພິເສດກ່ຽວກັບດິນຟ້າອາກາດ ອາເມຣິກາ ເປັນປະທານ ເພື່ອແນໃສ່ສ້າງກອງທຶນຊ່ວຍບັນດາປະເທດທຸກຍາກຮັບມືກັບການປ່ຽນແປງຂອງດິນຟ້າອາກາດ.
