ວິທະຍຸກະຈາຍສຽງຫວຽດນາມລາຍງານວ່າ: ວັນທີ 12 ກໍລະກົດ ຜ່ານມາ ຢູ່ສຳນັກງານລັດຖະບານ ທີ່ ຮ່າໂນ້ຍ, ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ປະທານຄະນະກຳມະການຫັນເປັນດີຈີຕອນແຫ່ງຊາດ ໄດ້ເປັນປະທານກອງປະຊຸມທາງໄກທົ່ວປະເທດສະຫຼຸບ 6 ເດືອນຕົ້ນປີ 2023 ກ່ຽວກັບການຫັນເປັນດີຈີຕອນແຫ່ງຊາດ ແລະ ແຜນພັດທະນາຂໍ້ມູນພົນລະເມືອງ, ກຳນົດ ແລະ ຢັ້ງຢືນທາງເອເລັກໂຕຣນິກ ຮັບໃຊ້ການຫັນເປັນດີຈີຕອນແຫ່ງຊາດໃນໄລຍະ 2022 – 2025, ວິໄສທັດຮອດປີ 2030 (ແຜນແມ່ບົດ 06).
ທ່ານ ຟ້າມມິງຈິງ ກ່າວຄຳເຫັນໃນກອງປະຊຸມວ່າ: ການຫັນເປັນດີຈີຕອນ ແມ່ນວຽກງານການເມືອງສຳຄັນຂອງພັກ ແລະ ລັດ; ມຸ່ງໄປສູ່ເປົ້າໝາຍສຸດທ້າຍແມ່ນຮັບໃຊ້ປະຊາຊົນ, ຖືປະຊາຊົນເປັນໃຈກາງ, ເປັນເຈົ້າກຳ, ເປັນເປົ້າໝາຍ, ເປັນກຳລັງໜູນ ແລະ ເປັນແຫຼ່ງກຳລັງພັດທະນາ, ເພື່ອຮັບໃຊ້ປະຊາຊົນ ແລະ ວິສາຫະກິດໃຫ້ດີຂຶ້ນ. ທ່ານຍັງເນັ້ນໜັກວ່າ: ການກໍ່ສ້າງ ແລະ ພັດທະນາລະບົບນິເວດພົນລະເມືອງດີຈີຕອນແມ່ນພື້ນຖານອັນສຳຄັນຂອງການຫັນເປັນດີຈີຕອນແຫ່ງຊາດ, ເປັນສ່ວນໜຶ່ງທີ່ບໍ່ອາດຕັດແຍກອອກຈາກຊີວິດເສດຖະກິດ ແລະ ສັງຄົມໄດ້.
