ສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດ ໄດ້ຕ້ອນຮັບ ສະຫາຍ ທ່າຍ ແທງ ກຸ໋ຍ ກໍາມະການສູນກາງພັກ ເລຂາພັກແຂວງ ປະທານສະພາປະຊາຊົນແຂວງ ຫົວໜ້າຄະນະຜູ້ແທນສະພາແຫ່ງຊາດແຂວງເຫງະອານ ສສ ຫວຽດນາມ ພ້ອມຄະນະ ເຂົ້າຢ້ຽມຂ່ຳນັບ ໃນວັນທີ 13 ກໍລະກົດ ນີ້ ທີ່ຫ້ອງວ່າການສູນກາງພັກ.
ໃນໂອກາດັ່ງກ່າວ, ສະຫາຍ ບຸນທອງ ຈິດມະນີ ໄດ້ສະແດງຄວາມຕ້ອນຮັບ, ຊົມເຊີຍ ແລະ ຕີລາຄາສູງ ຕໍ່ຄະນະຜູ້ແທນດັ່ງກ່າວທີ່ເດີນທາງມາຢ້ຽມຢາມ ສປປ ລາວ ກໍຄືມາເຮັດວຽກກັບນະຄອນຫຼວງວຽງຈັນ ໃນຄັ້ງນີ້ ຊຶ່ງສະແດງໃຫ້ເຫັນເຖິງຄວາມສໍາຄັນ ທີ່ພັກ-ລັັດ ກໍຄືອໍານາດການປົກຄອງແຂວງເຫງະອານ ທີ່ມີຕໍ່ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ, ຫວຽດນາມ-ລາວ ເວົ້າລວມ, ເວົ້າສະເພາະ ນະຄອນຫຼວງວຽງຈັນ ແລະ ແຂວງເຫງະອານ, ພິເສດ ສະຫາຍ ແລະ ຄະນະ ໄດ້ນໍາເອົາໄມຕີຈິດມິດຕະພາບອັນດູດດື່ມ, ຄວາມສາມັກຄີຮັກເເພງອັນສະໜິດສະໜົມ ຂອງພັກ-ລັດ ກໍຄືແຂວງເຫງະອານ, ສສ ຫວຽດນາມ ອ້າຍນ້ອງ ມາຍັງ ພັກ-ລັດ ແລະ ນະຄອນຫຼວງວຽງຈັນ ເປັນການສືບຕໍ່ຮັດແໜ້ນການຮ່ວມມື ລະຫວ່າງ ນະຄອນຫຼວງວຽງຈັນ ແລະ ແຂວງເຫງະອານ ປະກອບສ່ວນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ຂອງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ໝັ້ນຄົງຂະໜົງແກ່ນຕະຫຼອດກາລະນານ.
ສະຫາຍ ບຸນທອງ ຈິດມະນີ ຍັງໄດ້ສະເໜີໃຫ້ມີການຮ່ວມມື ລະຫວ່າງ ນະຄອນຫຼວງວຽງຈັນ ແລະ ແຂວງເຫງະອານ ໃຫ້ມີການແລກປ່ຽນຄະນະຜູ້ແທນຂັ້ນສູງໄປມາຫາສູ່ກັນ ແລະ ໃຫ້ມີການແລກປ່ຽນຂໍ້ມູນຂ່າວສານ ໃນຂະແໜງການຕ່າງໆ ຂອງສອງຝ່າຍ ໂດຍສະເພາະວຽກງານການກໍ່ສ້າງພັກ, ວຽກງານຮາກຖານ, ວຽກງານຄຸ້ມຄອງບຸກຄະລາກອນ ແລະ ສະເໜີໃຫ້ມີການຮ່ວມມືດ້ານການຄ້າ-ການລົງທຶນ, ວຽກງານການທ່ອງທ່ຽວ, ວຽກງານການສຶກສາ ແລະ ວຽກງານການຄຸ້ມຄອງຕົວເມືອງ.
ສະຫາຍ ທ່າຍ ແທງ ກຸ໋ຍ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ, ພ້ອມທັງໄດ້ແຈ້ງຈຸດປະສົງຂອງການຂອງການມາຢ້ຽມຢາມ ສປປ ລາວ ໃຫ້ ສະຫາຍ ບຸນທອງ ຈິດມະນີ ໄດ້ຮັບຊາບ.
ຂ່າວ-ພາບ: ຫສພ
