ກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກກະຊວງໂຍທາທິການ ແລະ ຂົນສົ່ງ (ຍທຂ) ສະໄໝທີ V ໄດ້ຈັດຂຶ້ນໃນວັນທີ 13 ກໍລລະກົດ ນີ້ ທີ່ ກະຊວງ ຍທຂ ໂດຍໃຫ້ກຽດເຂົ້າຮ່ວມຂອງ ສະຫາຍ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ ຮອງປະທານປະເທດ ແຫ່ງ ສປປ ລາວ ແລະ ພາຍໃຕ້ການເປັນປະທານຂອງ ສະຫາຍ ງາມປະສົງ ເມືອງມະນີ ເລຂາຄະນະບໍລິຫານງານພັກກະຊວງ ລັດຖະມົນຕີກະຊວງ ຍທຂ, ມີບັນດາເລຂາຄະນະພັກ, ຮອງເລຂາຄະນະພັກ, ສະມາຊິກພັກ, ພາກສ່ວນກ່ຽວຂ້ອງເຂົ້າຮ່ວມຢ່າງພ້ອມພຽງ.
ສະຫາຍ ງາມປະສົງ ເມືອງມະນີ ໄດ້ກ່າວເປີດກອງຊຸມຄັ້ງນີ້ວ່າ: ກອງປະຊຸມຈະໄດ້ພ້ອມກັນຄົ້ນຄວ້າປະກອບຄໍາເຫັນໃສ່ບົດສະຫຼຸບຕີລາຄາການນໍາພາຂອງຄະນະບໍລິຫານງານພັກກະຊວງໃນໄລຍະກາງສະໄໝ, ຮັບຟັງການເຜີຍແຜ່ເຊື່ອມຊຶມຄໍາສັ່ງຂອງຄະນະເລຂາທິການສູນກາງພັກ, ຄໍາແນະນໍາຂອງຄະນະຈັດຕັ້ງສູນກາງພັກ, ມະຕິຂອງກົມການເມືອງສູນກາງພັກ, ວ່າດ້ວຍມາດຕະຖານຂອງພະນັກງານນໍາພາ-ຄຸ້ມຄອງ, ມາດຕະຖານສະມາຊິກພັກ, ຂໍ້ຫ້າມສໍາລັບສະມາຊິກພັກ, ສິດ ແລະ ໜ້າທີ່ຂອງຄະນະບໍລິຫານງານພັກກະຊວງ ທີ່ໄດ້ກໍານົດໄວ້ໃນກົດລະບຽບພັກສະໄໝທີ XI ແລະ ເປັນການເປີດກວ້າງປະຊາທິປະໄຕພາຍໃນພັກ ແລະ ໃຫ້ບັນດາສະຫາຍ ທີ່ເຂົ້າຮ່ວມການທາບທາມພ້ອມກັນເບິ່ງ ແລະ ມີຄວາມເຫັນຕີລາຄາບັນຫາຕ່າງໆ ທີ່ພົວພັນເຖິງການນໍາພາລວມ ແລະ ບຸກຄົນໃນຄະນະບໍລິຫານງານພັກກະຊວງ ສະໄໝທີ V, ການປະກອບຄໍາເຫັນ ທາບທາມຄວາມໄວ້ວາງໃຈຕໍ່ການນໍາພາລວມ ແລະ ບຸກຄົນຄະນະບໍລິຫານງານພັກກະຊວງ ເປັນເນື້ອໃນສໍາຄັນໃຫ້ແກ່ການດໍາເນີນຊີວິດການເມືອງສໍາຫຼວດກາງສະໄໝພາຍໃນຄະນະບໍລິຫານງານພັກກະຊວງ ໃຫ້ມີເນື້ອໃນກວ້າງຂວາງເລິກເຊິ່ງ ເພື່ອປັບປຸງຄຸນທາດການເມືອງ, ຄຸນສົມບັດສິນທໍາປະຕິວັດ, ແບບແຜນການດໍາລົງຊີວິດ, ຄວາມຮັບຜິດຊອບໜ້າທີ່ການເມືອງທີ່ໄດ້ຮັບມອບໝາຍ, ແບບແຜນນໍາພາ ແລະ ວິທີເຮັດວຽກ ຂອງແຕ່ລະສະຫາຍ ໃນຄະນະບໍລິຫານງານພັກກະຊວງ ໃຫ້ຖືກຕ້ອງ, ໜັກແໜ້ນ, ຮັບປະກັນຄວາມເປັນແບບຢ່າງຂອງຄະນະບໍລິຫານງານພັກກະຊວງ ສ້າງຄວາມເຊື່ອໝັ້ນ, ຄວາມເຫຼື້ອມໃສສັດທາ ຂອງສະມາຊິກພັກ, ພະນັກງານ ແລະ ປະຊາຊົນບັນດາເຜົ່າ ຕໍ່ການນໍາພາລວມຂອງຄະນະບໍລິຫານງານພັກກະຊວງ.
ສະຫາຍ ງາມປະສົງ ເມືອງມະນີ ໄດ້ກ່າວຕື່ມວ່າ: ກອງປະຊຸມຈະໄດ້ພ້ອມກັນຄົ້ນຄວ້າ ປະກອບຄໍາເຫັນໃສ່ຮ່າງບົດສະຫຼຸບ ຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນອົງຄະນະພັກ
ກະຊວງ ຍທຂ ຄັ້ງທີ V ກາງສະໄໝ ແລະ ກໍານົດທິດທາງແຜນການໃນຕໍ່ໜ້າ; ຮ່າງບົດສະຫຼຸບຕີລາຄາການຈັດຕັ້ງປະຕິບັດແຜນພັດທະນາ 5 ປີ (2021-2025) ຂອງກະຊວງ ຍທຂ ໄລຍະຜ່ານມາ ແລະ ກໍານົດທິດທາງແຜນການໃນຕໍ່ໜ້າ.
ຂ່າວ-ພາບ: ບຸນອູ້ມ
